Վերջին շանսը. հայ ըմբիշների մրցակիցներն ու հնարավորությունները վարկանիշային վերջին մրցաշարում

Ըմբշամարտի Հայաստանի հավաքականները օլիմպիական ուղեգիր նվաճելու վերջին փորձը կձեռնարկեն հաջորդ շաբաթ՝ մայիսի 6-9-ը, այս անգամ Բուլղարիայի մայրաքաղաք Սոֆիայում: Եթե նախկինում ըմբշամարտի վերջին վարկանիշային մրցաշարը համեմատաբար հեշտ էր տրվում ուղեգիր չունեցող հայ ըմբիշներին, ապա այժմ իրավիճակը մի փոքր այլ է: Այո, աշխարհի առաջատար ըմբիշներից շատերն արդեն ուղեգիր ունեն, բայց մրցակցությունը վերջին տարիներին շատ է ուժեղացել, և հիմա ոչ մի մրցաշարում հեշտ պայքար չի սպասվում:

Սոֆիա են ժամանելու մի շարք ուժեղ ըմբիշներ, որոնք ոչ միայն կարող են վարկանիշ ձեռք բերել, այլև Տոկիոյում մեդալների համար պայքարել: Բավական է նշել, որ ազատ ոճի ըմբշամարտի 65 կգ քաշային կարգում կարգով մոտավորապես հավասար 6-7 ըմբիշ կա՝ օլիմպիական խաղերի չեմպիոն, աշխարհի, Եվրոպայի և Ասիայի առաջնությունների բազմակի մրցանակակիրներ: Լավ է, որ այդ քաշային կարգում Հայաստանն արդեն ուղեգիր ունի, իսկ մյուս քաշային կարգերում ահեղ մրցակցություն է սպասվում:

Ազատ ոճի ըմբշամարտ

Ազատոճայինները Սոֆիա կմեկնեն ընդամենը երկու մարզիկներով, թեև 4 քաշային կարգերում Հայաստանն ուղեգիր չունի: Ծանր քաշային կարգերում Հայաստանը ներկայացված չի լինի. 97 կգ քաշային Հաջիմուրադ Գացալովը վնասվածք ունի: Նա, հավանաբար, այդպես էլ հանդես չի գա Հայաստանի դրոշի ներքո: Աշխարհի նախկին բրոնզե մեդալակիր 125 կգ քաշային Լևան Բերիանիձեն խոստանում էր մասնակցել վերջին վարկանիշային մրցաշարին, բայց նրա անունը նորից բացակայում է: Հավանաբար, վրացի ըմբիշին և այլևս չենք տեսնի Հայաստանի դրոշի ներքո:

74 կգ քաշային կարգում գլխավոր մարզիչ Հաբեթնակ Կուրղինյանը որոշել է հնարավորություն տալ երիտասարդ Արման Անդրեասյանին: Դա կանխատեսել էինք նախկին վերլուծություններում. Անդրեասյանը լավ հաջողություններ է գրանցում 70 կգ քաշային կարգում, մինչև 74 կգ քաշային Հրայր Ալիխանյանը դեռ լուրջ հաջողություններ չունի: Այլ հարց է, թե որքանով կկարողանա իրեն լավ դրսևորել Անդրեասյանը, այն էլ՝ Եվրոպայի առաջնությունից հետո, որտեղ նա բրոնզե մեդալակիր դարձավ: Մրցակիցները շատ լուրջ են՝ Եվրոպայի նորընծա չեմպիոն Թայմուրազ Սալկազանովը (Սլովակիա), աշխարհի առաջնությունների մրցանակակիրներ Սոներ Դեմիրթաշը (Թուրքիա), Խետիգ Ցաբոլովը (Սերբիա), տանտերի կարգավիճակով հանդես եկող Ումարփաշաևը (Բուլղարիա):

86 կգ քաշային Հովհաննես Մխիթարյանը Եվրոպայի առաջնությանը չմասնակցեց, պատրաստվեց վարկանիշային մրցաշարին: Ամեն դեպքում, վանաձորցի ըմբիշից սպասելիքները մեծ չեն, մրցակցությունն այստեղ նույնպես բավականին ուժեղ է: Առանձնանում են վրացի Սանդրո Ամինաշվիլին, ադրբեջանցի Աբուբակար Աբակրովը, Իսպանցիան ներկայացնող Թայմուրազ Ֆրիևը: Նույնիսկ լավ վիճակահանությունը Մխիթարյանի համար կարող է բավական չլինել:

Հունահռոմեական ոճ

Հավաքականի գլխավոր մարզիչները հավաքականի կազմը որոշել էին մինչև Եվրոպայի առաջնությունը. նրանք ովքեր մեկնում Սոֆիա, Վարշավայում հանդես չեն եկել:

60 կգ քաշային Արմեն Մելիքյանը նորից հնարավորություն է ստանում իրեն դրսևորելու հավաքականի կազմում: Երիտասարդ ըմբիշի վերջին հաջողությունը 2019թ.-ին էր. նա դարձավ Մ23 աշխարհի չեմպիոն: Դրանից հետո Մելիքյանը չի կարողանում արդարացնել սպասելիքներ՝ մրցաշարերից դուրս մնալով առաջին փուլերում: Սակայն նրա հիմնական մրցակիցը Հայաստանում՝ Գևորգ Ղարիբյանը, 2020թ.-ի Եվրոպայի չեմպիոնի կոչումը նվաճելուց հետո նույնպես լուրջ արդյունքներ չի գրանցում: Այնպես որ մարզչական շտաբի որոշումը կանխատեսելի էր: Ճիշտ է, վերջին մրցաշարերում Ղարիբյանը հիմնականում հաղթում է Մելիքյանին, բայց վերջինս նույնպես արժանի է շանս ստանալուն: Այս քաշային կարգում առնվազն 5-6 ըմբիշ հավակնում է ուղեգրի, այդ թվում՝ Բուլղարիան ներկայացնող Էդմոնդ Նազարյանը: Այնպես որ Մելիքյանը շատ ջանք պետք է թափի Տոկիո հասնելու համար:

Սպասելի էր նաև 67 կգ քաշային կարգում տեսնել Կարեն Ասլանյանին: Եվրոպայի առաջնությունների մրցանակակիրն արժանի է գոնե մեկ հնարավորություն ստանալուն: Թեև, պետք է նշել, որ այս քաշային կարգում Սլավիկ Գալստյանը ևս բավականին լավ է հանդես գալիս, ու եթե Կարենը կարողանա ուղեգիր ձեռք բերել, մարզչական շտաբը պետք է լրջորեն մտածի՝ ում ուղարկել Տոկիո: Ասլանյանը ուղեգիր նվաճելու իրական հավակնորդներից է, բայց շատ ուժեղ ըմբիշներ են ներկայացնելու նաև Ադրբեջանը (Ռասուլ Չունաև), Լեհաստանը (Գևորգ Սահակյան), Ղազխաստանը (Ալմաթ Կեբիսպաև): Այդ ըմբիշներն իրենց ակտիվում բազմաթիվ պարգևներ ունեն և մեծ ցանկություն ունեն նաև լինելու Տոկիոյում:

87 կգ քաշային Արթու Շահինյանին բաղձալի ուղեգիր նվաճելուն կփորձեն խանգարել օլիմպիական չեմպիոն Դավիդ Չակվետաձեն (Վրաստան), աշխարհի չեմպիոն Մետեհան Բաշարը (Թուրքիա), Եվրոպայի չեմպիոն Զուրաբի Դատունաշվիլին (Սերբիա), իրանցի Նասեր Ալիզադեն: Լավ վիճակահանության դեպքում Շահինյանը շանսերը քիչ չեն, կարևորը՝ վճռական պահին հոգնածությունը չխանգարի: Արթուրն արդեն բավականին մեծ է այս մարզաձևի համար՝ 34 տարեկան, իսկ ֆիզպատրաստությունը այս ոճում մեծ նշանակություն ունի:

130 կգ քաշային կարգում մրցակցությունն այդքան էլ մեծ չէ, բայց Դավիթ Օվասափյանն էլ քաշային կարգի ֆավորիտներից չէ: Ամեն դեպքում, հետաքրքիր կլինի հետևել երիտասարդ ըմբիշի ելույթին: Դավիթը տարեցտարի առաջադիմում է, և մոտ ապագայում կարող ենք գերծանր քաշային կարգում ուժեղ ներկայացուցիչ ունենալ:

Վերջում ավելացնենք, որ մասնակիցների թիվը մրցաշարին շատ մեծ է: Յուրաքանչյուր քաշային կարգում 30-35 մարզիկ է հայտավորված, իսկ դա նշանակում է, որ ուղեգիր ձեռք բերելու համար հարկ կլինի 4 գոտեմարտ հաղթել:

Ռաֆայել Խալաթյան