Բայդենը ցանկանում է Պուտինի հետ քննարկել հարաբերությունների կարգավորումը. ԱՄՆ պետքարտուղար

ԱՄՆ նախագահ ՋոզեֆԲայդենը մտադիր է Ռուսաստանի նախագահ Վլադիմիր Պուտինի հետ քննարկել երկկողմ հարաբերությունների կայունացումը առաջիկա հանդիպման ժամանակ: Այս մասին այսօր հայտարարել է ԱՄՆ պետքարտուղար Էնթոնի Բլինկենը Լոնդոնում, Մեծ Բրիտանիայի արտաքին գործերի նախարար Դոմինիկ Ռաաբի հետ համատեղ մամուլի ասուլիսի ժամանակ:

«Նախագահ Բայդենը երկար ժամանակ, նույնիսկ նախագահ դառնալուց առաջ, հստակ հայտարարել է, որ եթե Ռուսաստանը որոշի անխոհեմ կամ ագրեսիվ գործել, մենք պատասխան քայլեր կձեռնարկենք: Բայց մենք չենք ձգտում սրել երկկողմ հարաբերությունները, մենք կնախընտրեինք ունենալ ավելի կայուն, ավելի կանխատեսելի հարաբերություններ: Եվ եթե Ռուսաստանը շարժվում է այս ուղղությամբ, ապա մենք՝ նույնպես: Եվ ես կարծում եմ, որ Նախագահ Բայդենը հնարավորություն կունենա, երբ հանդիպի նախագահ Պուտինին, ուղղակիորեն խոսել այդ մասին»,- ասել է Պետդեպարտամենտի ղեկավարը:

Որպես երկկողմ համագործակցության օրինակ ՝ նա բերել է փետրվարին ռազմավարական հարձակողական զենքի հետագա կրճատման և սահմանափակման միջոցառումների ռուս-ամերիկյան պայմանագրի 5 տարով երկարացումը:

 «Իրոք, կան ոլորտներ, որտեղ համագործակցության ուղիների որոնումը բխում է երկու երկրների շահերից. Ռազմավարական կայունությունը, հավանաբար, այս ցուցակի առաջին տեղում է, չնայած մեր խորը տարաձայնություններին: Մենք կարողացանք հինգ տարով երկարացնել հարձակողական զենքի կրճատման նոր պայմանագիրը: Մենք այլ հնարավորություններ կփնտրենք, բայց Դոմինիկի կարծիքով ՝ դա կախված է նրանից, թե Ռուսաստանը ինչ կորոշի անել կամ չանել», - ասել է  ԱՄՆ արտգործնախարարը ՝ հավելելով, որ Վաշինգտոնը «մեծ ուշադրություն է դարձնում Ռուսաստանի գործողություններին և նրան, թե որ ուղին է ընտրվելու»:

Միևնույն ժամանակ, Բլինկենը աջակցություն է հայտնել նոր բրիտանական միջազգային հակակոռուպցիոն պատժամիջոցներին, որոնք Լոնդոնը սահմանել է Ռուսաստանի 14 քաղաքացիների դեմ փաստաբան Սերգեյ Մագնիտսկու գործի կապակցությամբ:

«Ես նաև ուզում եմ շնորհակալություն հայտնել Միացյալ Թագավորությանը՝ անխոհեմ և ագրեսիվ գործողությունների համար Ռուսաստանին պատասխանատվության ենթարկելու գործում մեզ աջակցելու համար: Մենք նաև համատեղ վերահաստատեցինք մեր անսասան աջակցությունը Ուկրաինայի անկախությանը, ինքնիշխանությանը և տարածքային ամբողջականությանը»,-ասել է Բլինկենը:

Նրա խոսքով,  երկու երկրները լիովին հավատարիմ են ՆԱՏՕ-ին և սատարում են անդրատլանտյան միասնությունը` ընդհանուր արժեքները պաշտպանելու և ուղղակի սպառնալիքներին պատասխանելու հարցում:

Ինչպես նշված է բրիտանական պատժամիջոցների ցուցակում, ռուսաստանցիների նկատմամբ սահմանափակող միջոցներ են մտցվել «Ռուսաստանի Դաշնության 230 միլիոն ԱՄՆ դոլարին համարժեք պետական միջոցների հափշտակման համար` օգտագործելով 2007 թվականին իրականացված հարկերի վերադարձման կեղծ սխեմա »: Այս միջոցների մի մասը, ինչպես նշված է Լոնդոնում, դուրս է բերվել արտերկիր: Մեծ Բրիտանիայի տարածքում պատժամիջոցների տակ ընկած բոլոր ռուսների  ամբողջական ակտիվները, եթե հայտնաբերվեն, կսառեցվեն, նրանց նաև արգելվում է մուտք գործել Թագավորության տարածք:

2018-ի մայիսին Բրիտանիայի խորհրդարանի Համայնքների պալատը ռուսների դեմ ընդունեց «Մագնիտսկու փոփոխությունը» պատժամիջոցների և փողերի դեմ լվացման դեմ օրենքում, որն ուժի մեջ է մտել անցյալ տարվա հուլիսի 6-ից:

Միացյալ Նահանգների նախագահը ապրիլի 13-ին Ռուսաստանի նախագահի հետ հեռախոսազրույցում առաջ քաշեց առաջիկա ամիսներին երրորդ երկրում ռուս-ամերիկյան գագաթնաժողով անցկացնելու գաղափարը: Դրանից հետո ԱՄՆ վարչակազմի ղեկավարը բացատրեց, որ իր ռուս գործընկերոջը հրավիրել է ամռանը հանդիպել Եվրոպայում: ԱՄՆ-ի վարչակազմի ղեկավարը հունիսի կեսերին կլինի Եվրոպայում ՝ մասնակցելու G7- ի ու ՆԱՏՕ-ի գագաթնաժողովներին: Անցյալ շաբաթ Ռուսաստանի նախագահի խոսնակ Դմիտրի Պեսկովը հայտնեց, որ ԱՄՆ-ի թշնամական քայլերը դեպի Ռուսաստան դժվարացնում են իրավիճակի վերլուծությունը Պուտինի համար, որպեսզի որոշի Բայդենի հետ հանդիպման հնարավորությունը:

Լրատվամիջոցները նշում են, որ հանդիպում, ամենայն հավանականությամբ, տեղի կունենա ու բացի այդ, մինչ սպասվող հանդիպումը տարբեր ոլորտներում մի շարք խմորումներ կլինեն, որոնց լուծումը կտրվի Բայդենի ու Պուտինի կողմից հենց հանդիպման ժամանակ:

Մարտի կեսին Բայդենը ABC- ին տված հարցազրույցում ասել էր, որ ինքը Պուտինին մարդասպան է համարում: Նա պատասխանել էր «այո» լրագրողի համապատասխան հարցին: Բայդենը նաև ասել էր, որ Պուտինը ստիպված կլինի պատասխան տալ ամերիկյան ընտրություններին միջամտելու փորձերի համար:

«Նա կվճարի դրա համար», - հարցազրույցում ասել էր ԱՄՆ նախագահը: Նա չի մանրամասնել, թե ինչ նկատի ուներ ՝ խոստանալով, որ շուտով Պուտինը հետևանքները կզգա: Բայդենի հայտարարություններից հետո Ռուսաստանի արտգործնախարարությունը ԱՄՆ-ում ՌԴ դեսպանին հրավիրել էր Մոսկվա ՝ խորհրդակցությունների: Դիվանագետը մինչ օրս դեռ չի վերադարձել Վաշինգտոն:

«Ով իր մասին ինչ մտածում, դիմացինին է վերագրում», - շուտով մեկնաբանել էր Բայդենի խոսքերը Պուտինը և մեղադրանքներին ի պատասխան, առողջություն մաղթել  ԱՄՆ 78-ամյա նախագահին:

«Մենք իսկապես ճանաչում ենք իրար անձամբ և վաղուց: Եվ ինչ կպատասխանեի ես նրան: Ես կասեի՝ առողջ եղիր: Ես նրան միայն առողջություն եմ մաղթում: Ես դա ասում եմ առանց հեգնանքի, առանց կատակների», - ասել էր Պուտինը և ավելացրել, որ մարդիկ, գնահատելով այլ պետություններին կամ ժողովուրդներին, միշտ «հայելու մեջ են նայում» ու իրենց տեսնում են այնտեղ:

Բայդենի հայտարարությունից հետո Միացյալ Նահանգները հայտարարել էր Ռուսաստանի դեմ պատժամիջոցների ընդլայնման մասին ՝ քաղաքական գործիչ Ալեքսեյ Նավալնիի թունավորումը որպես պատճառ նշելով: ԱՄՆ Առևտրի նախարարությունն էլ հայտարարել էր, որ մարտի 18-ից կսահմանափակի ազգային անվտանգությանը վերաբերող սարքավորումների, տեխնոլոգիաների և ծրագրակազմի, առաջին հերթին զենքի արտահանումն ու վերաարտահանումը Ռուսաստան:

Ի պատասխան ԱՄՆ-ի սահմանած վերջին պատժամիջոցների, պաշտոնական Մոսկվան  պատժամիջոցներ է սահմանել ԱՄՆ-ի վարչակազմի 8 բարձրաստիճան պաշտոնյաների նկատմամբ: Երկրի արտաքին գործերի նախարարությունից այսօր հայտնել են, որ բացի այդ, առաջարկվել է ՌԴ-ում դիվանագիտական ծառայություն իրականացնող մեկ տասնյակ ամերիկացի դիվանագետի երկրից վտարել: