Ոչ նախկիններին ենք սպասարկել, ոչ ներկաներին ենք սպասարկում, ոչ էլ ապագաներին ենք սպասարկելու. Վազգեն Ռշտունի

ՀՀ վերաքննիչ քրեական դատարանի նախագահ Վազգեն Ռշտունին, այսօր լրագրողների հետ զրույցում անդրադառնալով այն հարցին, որ բոլոր այն դատավորների նկատմամբ, ովքեր իշխանությանը ոչ հաճո որոշումներ են կայացնում, գործողություններ են իրականացվում, ասաց, որ չգիտի այդպիսի ցուցակի մասին, բայց նշեց, որ դատավորների նկատմամբ իրականացվում են որոշակի վերահսկողական գործողություններ.

«Դատավոր Մխիթար Պապոյանի կողմից ներկայացվել էր հաղորդում այն հրապարակումների վերաբերյալ, թե իբր մենք (իմ ընկերական շրջապատը, որ դատավորներ են) մասնակցել են հանրապետության երկրորդ նախագահի դատական ակտը գրելու պրոցեսին. միջամտել ենք: Դրա հետ կապված եղել են պրոցեսներ, արդեն իսկ ունենք մեր կոլեգաների կողմից բողոքարկված դատական ակտեր, ինչի արդյունքում պարզ է դառնում, որ մեր նկատմամբ եղել է որոշակի վերահսկողություն՝ օպերատիվ-հետախուզական գործողություններ։ Այդ պրոցեսները, բնականաբար, ոչ մեկին հաճելի չեն, այդ թվում՝ ինձ։ Օրինակ՝ դուք խարդախության մասին հաղորդում տաք, բայց ձեր տանը խուզարկություն կատարեն»,- ասաց դատավորը:

Անդրադառնալով պաշտոնյաների կողմից դատավորներին քննադատելուն, թիրախավորելուն, նաև հարցին՝ դա դատավորների անկախությանը վնասո՞ւմ է՝ Վերաքննիչ քրեական դատարանի նախագահն ասաց.

«Բնականաբար, ոչ մեկին դուրեկան չէ, որ քննադատում են։ Քննադատությունը կարելի է ընդունել, եթե այն առողջ է։ Բայց հաճախ լսում ենք քննադատություններ, որոնք վերաբերում են օրինական ուժի մեջ մտած դատական ակտերին, որոնք, իմ կարծիքով, թույլատրելի երևույթներ չեն։ Թույլատրելի երևույթներ չեն հատկապես պետական բարձրաստիճան պաշտոնյաների կողմից։ Բայց այդ քննադատությունները, կամ անհարիր գնահատականներն իմ գործունեության վրա չեն ազդում»։

Անդրադառնալով այն հարցին, որ դատական իշխանության ներկայացուցիչները սպասարկում են նախկին իշխանություններին՝ դատավորն ասաց.

«Ո՛չ նախկիններին ենք սպասարկել, ո՛չ ներկաներին ենք սպասարկում, ո՛չ էլ ապագաներին ենք սպասարկելու»:

ՀՀ վերաքննիչ քրեական դատարանի նախագահ Վազգեն Ռշտունին, անդրադառնալով Դատական օրենսգրքում փոփոխություններ կատարելու օրինագծին, մասնավորապես, որ դատավորի վարույթում գտնվող քրեական գործը ԲԴԽ-ն կարող է վերցնել եւ մակագրել այլ դատավորի, Ռշտունին ասաց.

«Նախկինում դատարանի նախագահն ուներ մակագրության լիազորություն, դա քննադատությունների էր ենթարկվում, հիմա համակարգչի միջոցով այդ գործերը մակագրվում են, այսինքն՝ այդ ամենը լինում է պատահականության սկզբունքով։ Հիմա վերցնել և տալ մյուս դատավորին, ԲԴԽ-ն ասում է, որ այդ կարգերը հստակ կսահմանենք, բայց կարծում եմ՝ դա նախատեսելու անհրաժեշտություն չկար։ Ստացվում է մի իրավիճակ, որ դատավորի նկատմամբ վստահության խնդիր կա, եթե ԲԴԽ-ն մի դատավորից վերցրեց որպես բարդ գործ և տվեց մեկ այլ դատավորի, կողմի մոտ այդ դատավորի նկատմամբ անվստահություն է առաջացնելու»:

Անդրադառնալով նաև այն կետին, որ ֆիզիկական և իրավաբանական անձինք նույնպես կկարողանան դիմել ԲԴԽ՝ դատավորի նկատմամբ կարգապահական վարույթ հարուցելու համար՝ դատավորը նշեց.

«Վերջերս ԲԴԽ անդամների հետ հանդիպում էր տեղ ունեցել Վերաքննիչ դատարանում, մենք մեր կարծիքը բացասական առումով ներկայացրել ենք։ Վարույթ հարուցող երկու սուբյեկտ կա՝ արդարադատության նախարար և կարգապահական հանձնաժողով, չեմ հասկանում, թե երրորդ սուբյեկտն ավելացնելու իմաստը որն է։ Եթե քաղաքացին կարողանում է դիմել թե՛ կարգապահական հանձնաժողովին, թե՛ արդարադատության նախարարին, ուրեմն այդ փոփոխության իմաստը չեմ կարողանում հասկանալ։ Եթե ԲԴԽ-ի նպատակն է ազդեցության լծակներն ավելացնել դատավորների նկատմամբ, ես չեմ կարծում, որ ԲԴԽ-ն ունի այդ առաքելությունը, որովհետև ԲԴԽ-ի առաջնային առաքելություններից մեկը դատավորներին պաշտպանելն է, ոչ թե դատավորների նկատմամբ լրացուցիչ լծակներ ձեռք բերելը»։

Խոսելով ԲԴԽ լիազորությունները կասեցված նախագահ Ռուբեն Վարդազարյանի քրեական գործի մասին՝ Վազգեն Ռշտունին նկատեց՝ Վարդազարյանի հետ կապված պրոցեսներ են ընթանում առաջին ատյանի դատարանում.

«Իմ կանխատեսմամբ՝ դրանք հայտնվելու են նաեւ Վերաքննիչ դատարանի տիրույթում, դրա համար իմ կողմից այդ պրոցեսներին գնահատական տալը ճիշտ չէ։ Չի բացառվում, որ ես լինեմ հետագայում այդ պրոցեսները քննող դատավորը»:

Հիշեցնենք, որ այսօր Կարեն Դեմիրճյանի անվան մարզահամերգային համալիրում տեղի է ունենում դատավորների ընդհանուր ժողովը։

Նշենք, որ օրակարգում երկու հարց է՝ Արդարադատության ակադեմիայի խորհրդի անդամի ընտրությունը և Դատավորների ընդհանուր ժողովի ուսումնական հարցերի հանձնաժողովի անդամի ընտրությունը։