Հայաստանում կորոնավիրուսի երրորդ ալիքի նվազում է նկատվում. ինչով է դա պայմանավորված՝ պարզաբանում է մասնագետը

Հայաստանում վերջին մի քանի օրերի ընթացքում նկատվում է կորոնավիրուսային հիվանդության երրորդ ալիքի նվազում։ Դրա մասին են վկայում թե մասնագետները, և թե հիվանդության հաստատված դեպքերի թիվը։ Եթե նախորդ ամսվա վերջում, օրինակ, մեզ մոտ կորոնավիրուսով վարակված  2294 քաղաքացի ստանում էր ստացիոնար բուժում, ապա հիմա ստացիոնարում բուժում ստացող քաղաքացիների թիվը  1187 է։

Դրան զուգահեռ՝ փակվում են նաև մարզային վերապրոֆիլավորված բուժկենտրոները, որոնք բացվել էին քովիդով հիվանդներին սպասարկելու համար։ Այդպիսի 22 բուժկենտրոն էր գործում, մայիսի 18-ի դրությամբ փակվել է դրանցից 5-ը՝ Վեդու բժշկական կենտրոնը, Գյումրու ինֆեկցիոն կենտրոնը, Գյումրու ԲԿ-ն, Մարտունու բժշկական կենտրոնը, Հրազդան ԲԿ-ն և Երևանում գործող «Արմենիա» բժշկական կենտրոնը։ Հիմա գործում է ընդամենը 17  բուժկենտրոն, որոնցից 5-ը մարզերում, 12 Երևանում։ Այս մասին տեղեկատվությունը մեզ տրամադրեցին առողջապահության նախարարությունից։

Համավարակի երրորդ ալիքի նվազումն, ըստ մասնագետների, պայմանավորված է տարբեր հանգամանքներով, բայց վիրուսի տարածմանը վերջ տալու միակ տարբերակը շարունակում է մնալ պատվաստումը։ Հանրային առողջության մասնագետ Վարդուհի Պետրոսյանը մեզ հետ զրույցում  նշում է՝ կորոնավիրուսային հիվանդության թվերի ավելացումը և նվազումը բազմաֆունկցիոնալ երևույթ է: «Օրինակ, երբ որ եղանակը տաք է լինում, մարդիկ  շատ քիչ ժամանակ են ծախսում փակ տարածքներում, երբ որ մարդիկ  սկսում են պատվաստվել, դա էլ է պատնեշ առաջացնում վիրուսի տարածման համար»,- նշեց նա։

Ըստ մասնագետի, այն երկրներում, որտեղ սկսվել է վիրուսի դեմ պատվաստումների գործընթացը, արդեն նկատվում է դեպքերի նվազում։ Նրա խոսքով՝ մեծ թվով պատվաստումները շատ արագ կապահովեն, որպեսզի վիրուսի տարածումը կանխվի։ «Այն երկրները, որոնք սկսել են պատվաստումը, հինգ շաբաթ անց նկատում են դրական դինամիկա, մեր երկիրն էլ, եթե հասնի բավական քանակի պատվաստման, կարող ենք կանխել վիրուսի տարածումը, այդպիսով՝ վիրուսի հետևանքով մահերը կդառնան հատուկենտ»,- ասում է հանրային առողջության մասնագետը։

Իսկ ո՞րն է պատվաստման «բավական քանակը»: Ըստ մասնագետի, այդ չափանիշը տարբեր երկրներում տարբեր է։  «Օրինակ, երբ որ 30 տոկոսից բարձրանում է պատսվատվողների թիվը, բավականին դրական տեղաշարջ է լինում, սակայն, տարբեր երկրներում այդ տեղաշարժը տարբեր է, կոնկրետ տոկոս, չափ չենք կարող նշել։ Մեր երկրում, ճիշտ է, շատ դանդաղ սկսվեց պատվաստման գործընթացը, այսինքն՝ մարդիկ սկզբից հապաղում էին պատվաստվել, սպասում էին՝ ինչպես է անցնում պատվաստումը, օրինակ, իրենց այն ծանոթի մոտ, որը պատվաստվել է, բայց հիմա այդ գործընթացը արագ է տեղի ունենում, մարդիկ հասկանում են՝ ինչքան կարևոր է պատավստումը»,- շեշտում է Պետրոսյանը։   

Մասնագետն ասում է՝ Հայաստանի քաղաքացիների համար պատվաստվելու դրական ազդակ կարող է լինել նաև այն փաստը, որ մեզ մոտ պատվաստվում են նաև օտարերկյա քաղաքացիները․ «Երկրներ կան, որտեղ պատավստումները հասանելի չեն  լայն հասարակության համար, այդ պատճառով էլ մենք տեսնում ենք՝ այն արտասահմանցիները, ովքեր մեր երկրում են, գալիս են և պատվաստվում են, որովհետև իրենք էլ կարող են վարակի տարածման աղբյուր լինել և կարող են նպաստել վիրուսի տարածմանը, բայց պատվաստվելով, օգնում են, որպեսզի վիրուսի շղթան կտրվի։ Սա պետք է դրական ազդակ լինի մեր հասարակության համար, որ իրենք էլ այդ վստահությունը ունենան և պատվաստվեն»։  

Պետրոսյանը շեշտում է՝ ճիշտ է, երրորդ ալիքը մարում է, բայց հասարակությունը ուրախանալու հետ մեկտեղ, պետք է շարունակի պահպանել զգոնությունը։ Եթե մարդիկ օգտվեն այն փաստից, որ ալիքը դանդաղում է և պատվաստվեն, հնարավոր է ավելի շուտ մոտենա բնականոն կյանքին վերադառնալու օրը, և կանխարգելենք 4-րդ ալիքը:

«Մենք տեսնում ենք, թե տարբեր երկրներում ալիքները ինչպես են ընթանում։ Պետք է ամեն ինչ անել, որ խուսափենք նոր ալիքից և վիրուսի նոր դեպքերից, որովհետև մենք տեսնում ենք, որ պատվաստումները օգնում են ճնշել վիրուսի նոր շտամները։ Ես իմ անձնական օրինակով փորձել եմ ցույց տալ մարդկանց, որ պետք չէ վախենալ պատվաստանյութերից, քանի որ հետևանքները ավելի ապահով են։ Այսինքն՝ երբ որ մարդը պատվաստվում է, արդեն առաջանում է պաշտպանվածություն վիրուսի նկատմամբ, և եթե նույնիսկ նա հիվանդա վիրուսով, ապա նրա մոտ հիվանդությունը ծանր չի ընթանա, բացի դրանից արդեն ապացուցված է, որ պատվաստվածների մոտ խիստ նվազում է վիրուսի տարածումը ու վարակվելու հավանականությունը, որը բերում է խմբային պաշտպանվածության»,- հավելում է հանրային առողջության մասնագետը ու շեշտում՝ մարդիկ պետք է հասկանան, որ վիրուսի հետագա ալիքներից խուսափելուն և վիրուսի տարածումը կանխելուն կարող է նպաստել վիրուսի դեմ պատվաստումը։

Հավելենք, որ մայիսի 17-ի դրությամբ Հայաստանում COVID19-ի դեմ պատվաստվել է 20 հազար 99 մարդ։ Պատվաստումները իրականացվում են ինչպես պոլիկլինիկաններում, այնպես էլ առողջապահության նախարարության պատվաստման շարժական կայաններում, որոնք տեղադրված են Հայաստանի տարբեր մարզերի և Երևանի հանրային վայրերում։ Պատվաստումներն իրականացվում են «Աստրազենեքա», «Սպուտնիկ Վ», նաև չինական «Կորոնավակ» պատվաստանյութերով։

Մերի Խաչատրյան