Պուտինն ու Բայդենը կհանդիպեն հունիսի 16-ին, Ժնևում. ինչ է հայտնի հանդիպման մասին

Ռուսաստանի նախագահ Վլադիմիր Պուտինը և ԱՄՆ-ի նախագահ Ջոզեֆ Բայդենը կհանդիպեն հունիսի 16-ին՝ Շվեյցարիայում, Ժնևում:

«Ձեռք բերված պայմանավորվածության համաձայն, Ռուսաստանի Դաշնության Նախագահ Վլադիմիր Պուտինը հունիսի 16-ին բանակցություններ կվարի երրորդ երկրում՝ Ժնևում,Ամերիկայի Միացյալ Նահանգների Նախագահ Ջոզեֆ Բայդենի հետ», - ասված է Կրեմլի հայտարարության մեջ:

Հայտնի է, որ կողմերը կքննարկեն ռազմավարական կայունության, համաճարակի դեմ պայքարի, միջազգային օրակարգի և տարածաշրջանային հակամարտությունների մասին հարցեր:

«Մանրամասները դեռ պետք է համաձայնեցվեն», - ասել է Պուտինի խոսնակ Դմիտրի Պեսկովը ՝ պատասխանելով այն հարցերին, թե որքա՞ն ժամանակ են նախատեսվում բանակցությունները, որքա՞ն կտևի ամբողջ հանդիպումը, լրագրողները ներկա կլինե՞ն հանդիպմանը և արդյո՞ք արդյունքներին հաջորդող մամուլի ասուլիս է սպասվելու:

Այնուամնայնիվ, Պեսկովը որոշ հարցեր հստակեցրել է. «Ռազմավարական կայունության և սպառազինությունների վերահսկման հարցերը, իհարկե, թեմաներ են, որոնք հուզում են աշխարհի բոլոր երկրներին: Եվ, իհարկե, ռազմավարական կայունությունն ու սպառազինությունների վերահսկումը անպայման քննարկումների օրակարգում կլինեն:

Նախատեսվում է քննարկել ռուս-ամերիկյան հարաբերությունների հետագա զարգացման վիճակը և հեռանկարները, ռազմավարական կայունության խնդիրները, ինչպես նաև միջազգային օրակարգի արդիական թեմաները, ներառյալ կորոնավիրուսային համաճարակի դեմ պայքարում փոխգործակցությունը և տարածաշրջանային հակամարտությունների կարգավորումը»,-մանրամասնել է Կրեմլի ներկայացուցիչը:

Սպիտակ տան հրապարակած հայտարարության մեջ էլ ասվում է. «Առաջնորդները կքննարկեն հրատապ հարցերի ամբողջ շրջանակը, քանի որ մենք ձգտում ենք վերականգնել կանխատեսելիությունն ու կայունությունը ԱՄՆ-ՌԴ հարաբերություններում»: 

Իր հերթին, Բայդենի վարչակազմի ներկայացուցիչ Ջեն Փսակին չի բացառել, որ պետությունների ղեկավարները կանդրադառնան միջուկային կայունության հարցերի շուրջ Մոսկվայի և Վաշինգտոնի փոխգործակցության խնդրին:

Ռուսաստան-ԱՄՆ վերջին լայնամասշտաբ գագաթնաժողովը տեղի է ունեցել 2018-ին Հելսինկիում, երբ Պուտինը հանդիպեց Դոնալդ Թրամփի հետ: Նոր հանդիպումը նախաձեռնել է ամերիկյան կողմը:

Բայդենը առաջարկել էր Պուտինին հանդիպել երրորդ երկրում ապրիլի կեսերին: Կրեմլը այն ժամանակ չէր հստակեցրել՝  արդյո՞ք Մոսկվան ընդունելու է անձնական հանդիպման առաջարկը:

Այս տարվա մարտի սկզբին Բայդենը դրական պատասխանեց լրագրողի այն հարցին, թե նա համարու՞մ էր Պուտինին մարդասպան: Նախագահը հավելել էր, որ Պուտինը «կվճարի» ամերիկյան ընտրություններին Ռուսաստանի միջամտության փորձերի համար: Ի պատասխան՝ Կրեմլը հետ էր կանչել ԱՄՆ-ում իր դեսպանին ավելի քան 20 տարվա ընթացքում առաջին անգամ: Այնուհետև Ռուսաստանի արտգործնախարարությունը խորհուրդ էր տվել ԱՄՆ դեսպան Ջոն Սալիվանին «խորհրդակցությունների համար» մեկնել Վաշինգտոն: Սալիվանը դեռ այնտեղ է:

Պուտինը, ի պատասխան Բայդենի խոսքերի, ասաց, որ «յուրաքանչյուր ոք ուրիշների մասին կարծիք է կազմում սեփական անձի օրինակով»: Միաժամանակ նա ասաց, որ պատրաստ է զրուցել ԱՄՆ նախագահի հետ: «Ես այս հարցը հեռու անկյունում գտնվող արկղի մեջ չէի փակի:  Մենք պատրաստ ենք ամերիկյան կողմին հարմար ցանկացած պահի գնալ քննարկումների ու հանդիպման», - ասել էր նա: Պուտինը նաև առաջարկել էր անցկացնել ուղիղ եթերում հեռուստաբանավեճեր:

Ապրիլին ԱՄՆ նախագահ Ջո Բայդենը նոր պատժամիջոցներ կիրառեց Ռուսաստանի դեմ ՝ պնդելով, որ դա պատասխան է կիբերհարձակումներին և 2020 թ. նախագահական ընտրություններին միջամտելու փորձերին: Դրանից հետո պաշտոնական Վաշինգտոնն ու Մոսկվան հայտարարեցին դիվանագետներին փոխադարձաբար արտաքսելու մասին:

Ավելի վաղ լրատվամիջոցները երկու առաջնորդների պլանավորված հանդիպման մասին հրապարակումներում նշել էին, որ որպես երրորդ երկիր դիտարկվում է  Շվեյցարիան: Բայդենը մայիսի սկզբին հայտարարել էր, թե ինքը սպասում է, որ Պուտինի հետ կհանդիպի հունիսի կեսին, երբ մեկնի Եվրոպա ՝ հանդիպելու ՆԱՏՕ-ի առաջնորդներին  G7- ի գագաթնաժողովի և ԱՄՆ-ԵՄ բանակցությունների շրջանակներում:

Հիշեցնենք, մայիսի 20-ին Ռեյկյավիկում տեղի ունեցավ Ռուսաստանի և ԱՄՆ-ի դիվանագիտական գերատեսչությունների ղեկավարների ՝ Սերգեյ Լավրովի և Էնթոնի Բլինքենի առաջին հանդիպումը: Ինչպես հայտարարվել էր, նախագահների սպասվող բանակցությունների  մասին որոշումը մեծապես կախված էր այդ հանդիպման արդյունքներից: Սերգեյ Լավրովն ասել է, որ Մոսկվան աշխատում է Ռուսաստանի և ԱՄՆ-ի նախագահներ Վլադիմիր Պուտինի և Ջո Բայդենի հանդիպման կազմակերպման ուղղությամբ: Նրա խոսքով, ԱՄՆ պետքարտուղար Էնթոնի Բլինկենը Ռեյկյավիկում բանակցությունների ընթացքում կառուցողական տրամադրություն ուներ: