Միհրան Պողոսյանը դատի է տվել Ոստիկանության անձնագրային եւ վիզաների վարչությանը. պարզվում է նա ՌԴ-ում ուսում էր ստանում

ՀՀ Ազգային ժողովի նախկին պատգամավոր, ԴԱՀԿ նախկին պետ Միհրան Պողոսյանը դատի է տվել ՀՀ ոստիկանության անձնագրային եւ վիզաների վարչությանը: Այս մասին տեղեկանում ենք Դատական տեղեկատվական համակարգից:

Նա մայիսի 29-ին դիմել է դատարան պահանջելով անվավեր ճանաչել 28.05.2021 թվականի թիվ 84 որոշումը: Հայցը մակագրվել է Վարչական դատարանի դատավոր Աղասի Դարբինյանին եւ հենց դրա հաջորդ օրն էլ քննվել:

Ինչպես օրեր առաջ հայտնի դարձավ Միհրան Պողոսյանը ընդգրկված է «Պատիվ ունեմ» դաշինքի ցուցակում: Պողոսյանը մայիսի 18-ին դիմել է անձնագրային վարչություն՝ վերջին 4 տարիներին ՀՀ-ում բնակվելու վերաբերյալ իրեն տեղեկանք տրամադրելու համար, սակայն մերժվել:

Սահմանադրության համաձայն՝ թեկնածուն վերջին չորս տարում ՀՀ-ում մշտապես բնակվող չի համարվում, եթե նշված տեղեկանքը ստանալու նպատակով Վարչություն դիմում տալու օրվան նախորդող 1461 օրերի ընթացքում առնվազն 731 օր բացակայել է ՀՀ-ից: Բացառություն է սահմանված այն դեպքերի համար, երբ անձի բացակայությունը պայմանավորված է եղել ՀՀ հանրային ծառայության շրջանակներում ծառայողական նպատակներով արտերկրում գտնվելու կամ էլ արտերկրում բարձրագույն ուսումնական հաստատություններում ուսումնառության հանգամանքներով: 

Նշենք, որ Միհրան Պողոսյանը 2019 թվականից հետախուզման մեջ է գտնվում՝ մեղադրվելով խոշոր չափերով գույք յուրացնելու կամ վատնելու եւ պաշտոնեական լիազորությունները չարաշահելու մեջ:

Սակայն պարզվում է հետախուզման մեջ գտնվող Պողոսյանը Մոսկվայում ուսում էր ստանում:

Նա ՌԴ գիտության եւ բարձրագույն կրթության նախարարության «Մոսկվայի պոլիտեխնիկական համալսարան» (Մոսկվայի պոլիտեխ) բարձրագույն կրթության դաշնային պետական բյուջետային կրթական հաստատությունից փաստաթուղթ է ներկայացրել անձնագրային վարչություն, նշելով, թե 15.01.2020 թվականից մինչև 31.05.2020 թվականի ժամանակաշրջանում «Մարդկային կապիտալի կառավարում» ուղղությամբ նախապատրաստական կուրս է անցել, ինչը հանդիսանում է «Մոսկվայի պոլիտեխնիկական համալսարանի» պետական կրթական ծրագրի մի մասը:

Ըստ վերոնշյալ փաստաթղթի՝ 11.07.2020 թվականին Միհրան Պողոսյանն ընդունվել է նույն համալսարանի վճարովի կրթական ծառայությունների մատուցման պայմանագրով «Մարդկային կապիտալի կառավարում» մագիստրատուրայի ծրագրով առկա ուսուցմամբ առաջին կուրս: 17.02.2021 թվականի եւ 24.05.2021 թ. համալսարանի տեղեկանքների համաձայն՝ Միհրան Պողոսյանը հանդիսանում է սովորող, 1 կուրս՝ մագիստրատուրա, առկա՝ «Որակի կառավարում» ուղղությամբ:

Այսպիսով անձնագրայինից դրական պատասխան չստանալով Միհրան Պողոսյանը մայիսի 24-ին Վարչական դատարան էր դիմել՝ պահանջելով իրեն տեղեկանք տրամադրել վերջին 4 տարում ՀՀ-ում բնակվելու վերաբերյալ, ինչը բավարարվել էր դատավոր Գեւորգ Սոսյանի կողմից:

Որոշումից հետո Պողոսյանին տեղեկանք էր տրամադրվել, սակայն՝ անձնագրային վարչությունը այն անվավեր էր ճանաչել:

Մայիսի 29-ին ԴԱՀԿ նախկին պետը դիմել էր Վարչական դատարան՝ պահանջելով անվավեր ճանաչել իրեն տրամադրված տեղեկանքն անվավեր ճանաչելու որոշումը:

Վարչական դատարանի դատավոր Աղասի Դարբինյանը երեկ որոշել է հայցը կարճել, քանի որ հայցվորի ներկայացուցիչները դատարան ներկայացրած դիմումով եւ նիստի ժամանակ հրաժարվել են հայցից:

ոստիկանության պարզաբանումը

Ըստ ոստիկանության պարզաբանման՝ ՀՀ ոստիկանության անձնագրային եւ վիզաների վարչությունը հարցում է կատարել Մոսկվայի պոլիտեխնիկական համալսարան պարզելու Միհրան Պողոսյանի նախապատրաստական դասընթացների ընդգրկելու մասին փաստաթղթի իսկությունը: Մինչ հարցման պատասխանը ստանալը Պողոսյանի լիազորված անձը հայց է ներկայացրել ՀՀ վարչական դատարան՝ տեղեկանքը տրամադրելուն պարտավորեցնելու պահանջով։ 2021թ. մայիսի 25-ին դատարանն իր որոշման հիմքում դնելով նաև Մոսկվայի պոլիտեխնիկական համալսարանի՝ Միհրան Պողոսյանին նախապատրաստական դասընթացների ընդգրկելու մասին հրամանը բավարարել է հայցը, ՀՀ ոստիկանության անձնագրային եւ վիզաների վարչությանը պարտավորեցրել է տրամադրելու տեղեկանքը: Վճիռը եղել է վերջնական, առանց բողոքարկման իրավունքի։ Ի կատարումն դատարանի վճռի՝ 25.05.2021թ. Միհրան Պողոսյանին տրվել է հայցվող տեղեկանքը:

«Այնուհետև 26.05.2021թ. ՀՀ ոստիկանության անձնագրային և վիզաների վարչությունում ստացվել է Մոսկվայի պոլիտեխնիկական համալսարանի պատասխան գրությունը, որով նշվել է, որ Միհրան Պողոսյանը նախապատրաստական դասընթացների չի ընդգրկվել, ինչպես եւ հերքվել է Մոսկվայի պոլիտեխնիկական համալսարանի կողմից 15.01.2020թ. թիվ 0089- ОД հրամանն արձակելու և 21.05.2021թ. թիվ 1427 տեղեկանքը տրամադրելու փաստը»,- նշված է անձնագրային վարչության պատասխանում:

Դրանից հետո անձնագրային վարչությունը նշված հանգամանքի վերաբերյալ անմիջապես տեղեկացրել է ՀՀ Կենտրոնական ընտրական հանձնաժողով, ծանուցվել է նաեւ Միհրան Պողոսյանի ներկայացուցիչը:

Վերջինս նույն օրը անձնագրային վարչություն է մուտքագրել երրորդ դիմումը եւ ներկայացրել Բելգորոդի պետական ազգային հետազոտությունների ինստիտուտից տրված տեղեկանք առ այն, որ Միհրան Պողոսյանը 15.01.2020-31-05.2020թթ. ընդգրկված է եղել նշված հաստատությունում կազմակերպված «Մարդկային կապիտալի կառավարում» ծրագրով նախապատրաստական դասընթացներին:

«Վերոնշյալ տեղեկանքի իսկությունը ստուգելու նպատակով հարցում է կատարվել Բելգորոդի պետական ազգային հետազոտությունների ինստիտուտ։ 2021թ. մայիսի 30-ի դրությամբ նշված հարցման պատասխանը դեռևս չի ստացվել, ուստի օրենքով սահմանված եռօրյա ժամկետը լրանալու հանգամանքով պայմանավորված՝ Միհրան Պողոսյանին տրվել է նոր տեղեկանք»,- հայտնեցին ՀՀ ոստիկանության անձնագրային եւ վիզաների վարչությունից: