Թող չփորձեն նախարարության անունից ինչ-որ հրամաններ ցիտելով ծնողներից անկողին ուզել. Հռիփսիմե Խաչատրյան

Վերջին օրերին նախադպրոցական տարիքի երեխաների ծնողների մոտ անհանգստության ալիք է բարձրացել, թե ինչու են Երևանի համայնքային մանկապարտեզներում ծնողներից անկողնային 3 հավաքածու պահանջում: «Մանկապարտեզը և երեխաները» ֆեյսբուքյան խմբում երեխաների ծնողներից ոմանք նշել են, որ մանկապարտեզի տնօրենն ուղղակի կատարող է, հրաման եղել է առողջապահության նախարարի կողմից:

Երևանյան մի շարք մանկապարտեզների տնօրեններից հետաքրքրվեցինք՝ ինչ նոր հրահանգ են ստացել առողջապահության նախարարությունից:

Թիվ 8 մանկապարտեզի տնօրենը մեզ հետ զրույցում նշեց, որ նախարարությունից ոչ մի նոր հրահանգ չի եղել, անկողնու 3 հավաքածու ունենալու պահանջը նախարարի 2002 թվականի հրաման է, սակայն իրենց մանկապարտեզում ծնողներից ոչ մի անկողնային հավաքածու չեն պահանջում: Իրենք ունեն անկողնու լրացուցիչ հավաքածուներ, տեղում լվանում են և փոխում:

Նմանատիպ պատասխան ստացանք նաեւ մի քանի այլ մանկապարտեզներից:

Թիվ 39 մանկապարտեզի տնօրենի խոսքով էլ իրենց մանկապարտեզում լվացքատուն չկա, այդ պատճառով ծնողներից անկողնու երկու հավաքածու են ուզում.

«Մենք ծնողներից 2 հատ ենք ուզում, որպեսզի երբ մեկը տանեն լվանան, այդ ընթացքում մյուսը օգտագործենք: Ես չգիտեմ՝ ինչ հրահանգ է, բայց անկողնու 3 հավաքածու ունենալը նորմատիվով սահմանված է. մանկապարտեզը դրանք պետք է ունենա: Մենք նախկինից մնացած անկողնային պարագաներ էլ ունենք. եթե անհրաժեշտություն է առաջանում, տրամադրում ենք դրանց կարիքն ունեցող երեխաներին»,- ասաց նա:

Մեկ այլ մանկապարտեզի տնօրենն էլ նշեց, որ իրենք ծնողներից անկողնու երեք հավաքածու են ուզել, որովհետեւ 2002 թվականի հրամանով (առողջապահության նախարարի) հրահանգված է՝ մեկն ունենալ օգտագործման, երկուսը՝ փոխարինման համար, սակայն մանկապարտեզը չունի այդ հնարավորությունը:

Հարցին՝ իսկ 2002 թվականի հրամանի մասին նո՞ր են տեղեկացել, տնօրենը պատասխանեց, որ այդ նորմի վրա հիմա են սկսել շատ մեծ ուշադրություն դարձնել, նույնիսկ քաղաքապետարանից տեղեկացրել են մանկապարտեզներին, որ այդ կետը ևս պետք է պահպանվի: Նրա խոսքով՝ եթե տեսչական ստուգումների ժամանակ բացահայտեն, որ չկա համապատասխան թվով անկողին, մանկապարտեզը կտուգանվի:

Առողջապահության նախարարարի մամուլի խոսնակ Հռիփսիմե Խաչատրյանը, մեր հարցերին ի պատասխան, ասաց, որ անկողնու երեք հավաքածու ունենալու պահանջը 2002 թվականին ընդունված սանիտարական նորմ է, այն համավարակով ընդհանրապես պայմանավորված չէ, նոր հրահանգ առավել ևս չկա.

«Հիվանդությունների վերահսկման ազգային կենտրոնը ևս մանկապարտեզների երեխաների ծնողներից զանգեր է ստացել պարզաբանման համար, թե ինչու է նախարարությունը սպիտակ անկողնու 3 հավաքածուի պահանջ դրել: Չեմ կարող ասել՝ ինչից ելնելով են մանկապարտեզները նոր հիշել 2002 թվականին ընդունված սանիտարական նորմի մասին: Անկողնու երեք հավաքածու ունենալու պահանջը 2002 թվականին ընդունված նորմ է, որն ուղղված է ոչ թե սաներին, այլ մանկապարտեզներին: Մանկապարտեզներից է պահանջվում երեխաների համար ապահովել, օրինակ, անկողնու 3 հավաքածու, կլոր անկյուններով սեղան, սրբիչներ և այլն: Թե ինչ իրավունքով են ծնողից պահանջում մի բան, որը պետք է մանկաապրտեզներն իրենք ապահովեն, չեմ հասկանում: Եվ թող չփորձեն նախարարության անունից ինչ-որ հրամաններ կամ հրահանգներ ցիտելով ծնողներից անկողին ուզել»,- նշեց առողջապահության նախարարի մամուլի խոսնակը:

Երևանի քաղաքապետարանի լրատվական վարչությունից փորձեցինք տեղեկանալ՝ հնարավոր տեսչական ստուգումների պատճառով մանկապարտեզներից պահանջվե՞լ է ապահովել նախարարի հրամանով հաստատված վերոնշյալ սանիտարական նորմը: Փորձեցինք ճշտել նաեւ օրենքի պահանջը. ի վերջո, այդ անկողնային հավաքածուները մանկապարտե՞զը պետք է ապահովի, թե՞ պետք է ուզի ծնողներից։ Քաղաքապետարանի լրատվության վարչությունից խնդրեցին դիմել գրավոր հարցումով: Պատասխանները կհրապարակենք դրանք ստանալուց հետո: