Մարտունի ԲԿ-ից Ինֆեկցիոն հիվանդանոց տեղափոխվածների թիվը ավելացել է. նրանց վիճակը գնահատվում է թեթև և միջին ծանրության

Աղիքային վարակին բնորոշ ախտանշաններով Մարտունու բժշկական կենտրոնից Երեւանի Ինֆեկցիոն հիվանդությունների ազգային կենտրոն տեղափոխված անձանց թիվը ավելացել է երկուսով: Այս պահին Ինֆեկցիոն հիվանդանոցում բուժում է ստանում 14 պացիենտ, որոնցից 13-ը 2-4 տարեկան երեխաներ են, 1-ը՝ մեծահասակ: Նրանց վիճակը գնահատվում է թեթև և միջին ծանրության: Այս մասին «Հայկական ժամանակին» հաղորդեց Հիվանդությունների կանխարգելման ազգային կենտրոնի վարակիչ եւ ոչ վարակիչ հիվանդությունների համաճարակաբանության վարչության պետ Ռոմելա Աբովյանը:

Հարցին՝ վարակի օջախը կրկի՞ն մանկապարտեզն է (վերջերս Երեւանի մանկապարտեզներից մեկի տասնյակ սաներ նույն ախտանշաններով ընդունվել էին Ինֆեկցիոն ազգային կենտրոն, մանկապարտեզի սաների մոտ աղիքային վարակի դեպքեր գրանցվել էին նաեւ Վայքում), Ռոմելա Աբովյանը նշեց, որ այս դեպքում երեխաները տարբեր բնակավայրերից են, բժշկական կազմակերպությունից դուրս նրանք ընդհանրություն չունեն:

Նրա խոսքով՝ աղիքային վարակի պատճառը բացահայտելու ուղղությամբ իրականացվել է համաճարակաբանական հետազոտություն, շրջակա միջավայրից վերցվել են լվացումներ աղիքային խմբի մանրէների և պաթոգեն միկրոֆլորայի նկատմամբ, վերցվել են նաեւ ջրի նմուշներ, բաժանմունքում բուժում ստացող պացիենտներից, նաեւ բուժանձնակազմից են նմուշներ վերցրել:  

Նա նշեց, որ աղիքային վարակի ախտորոշում ունեցող երկու երեխաների մոտ հայտնաբերվել է ներհիվանդանոցային վարակի հարուցիչ՝ Կլոստրիդիում դիֆիցիլ: Նրա տեղեկացմամբ՝ հարուցիչը հիմնականում գլուխ է բարձրանում այն ժամանակ, երբ պացիենտները երկարատև անտիբիոտիկ թերապիա են անցնում:

«Հաշվի առնելով, որ մեզ մոտ շատերը կորոնավիրուսի ժամանակահատվածում հակամանրէային դեղերը ոչ նպատակային և ինքնաբուժման ձեւով են օգտագործել, իսկ այդ դեղերը ճնշում են իմունիտետը՝ չի բացառվում, որ նշված հարուցիչը հենց այդ պատճառով է առաջացել: Ուստի հորդորում եմ հակամանրէային դեղերն օգտագործել միմիայն բժշկի ցուցմամբ, ինքնաբուժմամբ չզբաղվել եւ հաճախ լվանալ, ախտահանել ձեռքերը, որովհետեւ վարակը կարող է տարածվել կոնտակտային ճանապարհով: Այս պահին մենք աշխատանքներ ենք իրականացնում՝ բացահայտելու ներհիվանդանոցային վարակի փոխանցման աղբյուրի ջրային կամ կոնտակտային ծագման բնույթը»,- ասաց նա:

Ռոմելա Աբովյանը նշեց, որ աղիքային վարակիչ հիվանդությունների թիվը ամռան ամիսներին շատացել է, քանի որ աղիքային վարակիչ հիվանդություններն ունեն սեզոնայնություն, այսինքն՝ շոգ եղանակներին ընդառաջ հարուցիչներն ակտիվանում են, և կախված նաև հիգիենիայի կանոնները չպահպանելուց՝ աղիքային վարակիչ հիվանդությունների արձանագրման ռիսկը մեծանում է, ուստի պետք է զգոն լինել, պահպանել ձեռքերի հիգիենայի կանոնները, ոչ սառնարանային պայմաններում պահվող սննդամթերքներ չգնել, մասնավորապես՝ թխվածքաբլիթներ, խմորեղեններ, իսկ մրգերն ու բանջարեղենները լվանալ հոսող ջրի տակ, անպայման ստուգել մթերքների պիտանելիության ժամկետը:

Մարտունու ԲԿ-ի տնօրեն Անդրանիկ Հարությունյանն էլ մեր զրույցում նշեց, որ ԲԿ-ում նախնական քննության արդյունքում պարզվել է, որ վարակի փոխանցման աղբյուրը ջուրը չէ: Նրա խոսքով՝ ներհիվանդանոցային վարակի տարածման հավանական վարկածը տորթն է եղել. մանկական բաժանմունքում բուժվող երեխաների մայրիկները միմյանց հյուրասիրել են, հետո մայրիկներից մեկի մոտ ինֆեկցիա է եղել, եւ նրա միջոցով տարածվել է:

Այս վարկածը, սակայն, Հիվանդությունների կանխարգելման ազգային կենտրոնի վարակիչ եւ ոչ վարակիչ հիվանդությունների համաճարակաբանության վարչության պետ Ռոմելա Աբովյանը չհաստատեց՝ նշելով, որ պետք է սպասել հետազոտությունների արդյունքներին:

Հիշեցնենք՝ ՀՀ առողջապահության նախարարությունից այսօր հաղորդել էին, որ հունիսի 12-13-ը Մարտունի ԲԿ-ից «Ինֆեկցիոն հիվանդությունների ազգային կենտրոն» է տեղափոխվել աղիքային վարակին բնորոշ ախտանշաններով (ընդհանուր թուլություն, փսխում, լուծ) 1-4 տարեկան 12 երեխա: