Տոկիո 2020. Ֆերդինանդ Կարապետյան. Վարդենիսի օլիմպիական հույսը

Հուլիսի 23-ին Ճապոնիայի մայրաքաղաք Տոկիոյում կմեկնարկեն 23-րդ ամառային Օլիմպիական խաղերը: Աստիճանաբար ուրվագծվում է խաղերին մասնակցող Հայաստանի օլիմպիականների կազմը: Այս պահին Տոկիոյի ուղեգիր ունեն Հայաստանի 14 ներկայացուցիչներ:

«Հայկական ժամանակը» սկսում է ծանոթացնել հայ օլիմպիականներին, որոնք Ճապոնիայի մայրաքաղաքում փորձելու են պայքար մղել օլիմպիական բարձր պարգևների համար:

Շարքը սկսում ենք այն մարզիկից, որն այս պահի դրությամբ ամենավերջինն է արժանացել այդ ուղեգրին՝ ձյուդոիստ Ֆերդինանդ Կարապետյան:

Մարզիկի մասին

Ֆերդինանդ Կարապետյանը 28 տարեկան է, ծնվել է Գեղարքունիքի մարզի Վարդենիս քաղաքում: Վաղ տարիքում Կարապետյանի ընտանիքը տեղափոխվել է Ռուսաստան` Հյուսիսային Օսեթիայի Դիգորա քաղաք, որտեղ էլ Կարապետյանը սկսել է զբաղվել ձյուդոյով և ըմբշամարտով: Ռուսաստանցի անվանի մասնագետ Իրբեկ Այլարովի գլխավորությամբ Կարապետյանը գերազանց հաջողություններ է գրանցել և շուտով համալրել է Ռուսաստանի պատանեկան հավաքականի կազմը:

19 տարեկան հասակում Կարապետյանը բրոնզե մեդալակիր դարձավ Ռուսաստանի երիտասարդական առաջնությունում, իսկ մեկ տարի անց հիանալի ելույթ ունեցավ արդեն մեծահասակների առաջնությունում` դառնալով փոխչեմպիոն:

Ճանապարհը դեպի Ռուսաստանի հավաքական բացվում էր, բայց մեծ մրցակցությունն ի վերջո ստիպեց երիտասարդ ձյուդոիստին ճակատագրական որոշում կայացնել. Ֆերդինանդը փոխեց մարզական քաղաքացիությունն ու տեղափոխվեց Հայաստանի դրոշի ներքո: Նա արագորեն դարձավ Հայաստանում իր քաշային կարգի առաջատարը, բայց ժամանակը չհերիքեց Ռիոյի օլիմպիական խաղերի ուղեգիր նվաճելու համար:

Ճանապարհը դեպի Տոկիո

Նոր օլիմպիական շրջափուլը Կարապետյանը բավականին լավ սկսեց. մի քանի մեդալներ գրան պրիներում, որին հաջորդեց փայլուն հաղթանակը Եվրոպայի 2018թ.-ի առաջնությունում: Թվում էր` օլիմպիական ուղեգիր նվաճելը մեծ խնդիր չէր լինի. մի քանի հաջող մասնակցություն գրան պրիներին, և ուղեգիրն ապահովված կլիներ: Բայց գործին խանգարեցին բազմաթիվ վնասվածքները, որոնց պառճառով Կարապետյանը բաց թողեց Մեծ սաղավարտի և գրան պրիի մի քանի մրցաշարեր, մի քանիսին էլ մասնակցեց վնասվածքով ու չկարողացավ լավ արդյունք ցույց տալ: Դրա հետևանքով Կարապետյանը վարկանիշային աղյուսակում նահանջեց 5-րդ տասնյակ:

Իրավիճակը սկսեց շտկվել 2021թ.ին, երբ Կարապետյանը հաջող ելույթներ ունեցավ Թել Ավիվի գրան պրիում և Տաշքենդի Մեծ սաղավարտի մրցաշարում` զբաղեցնելով մրցանակային տեղեր: Ի վերջո, Ֆերդինանդը բարձրացավ 33-րդ հորիզոնական, որի շնորհիվ ստացավ բաղձալի ուղեգիրը:

Մրցակիցներն ու շանսերը Տոկիոյում

73 կգ քաշային կարգը բավականին ներկայացուցչական է, չկան ընդգծված առաջատարներ ու ֆավորիտներ:
Պատահական չէ, որ վերջին չորս առաջնություններում այս քաշային կարգում տարբեր չեմպիոններ ու մրցանակակիրներ են եղել: Ավանդաբար ուժեղ են Ճապոնիայի, Վրաստանի, Ռուսաստանի ներկայացուցիչները: Մեդալների հավակնորդներ են Ադրբեջանի, Իսրայելի, Շվեդիայի, Թուրքիայի, Ուզբեկստանի, Ղազախստանի, Իտալիայի մարզիկները:

Հայաստանի ձյուդոիստները օլիմպիական խաղերում լուրջ հաջողություններ չեն գրանցել: Արմեն Նազարյանն ու Հովհաննես Դավթյանը 4 անգամ հնարավորություն են ունեցել օլիմպիական խաղերում հանդես գալու, բայց մեդալ չեն կարողացել նվաճել, թեև երկուսն էլ ժամանակին Եվրոպայի չեմպիոն են եղել:

Ֆերդինանդ Կարապետյանը առանձին-առանձին ունակ է հաղթելու նրանցից յուրաքանչյուրին: Բայց մրցաշարային ցանցում մի քանի անընդմեջ լուրջ մրցակիցների դիմակայելը բավականին բարդ է: Ամեն դեպքում, այս քաշային կարգում Ֆերդինանդը գրեթե բոլոր հզորներին մեկ անգամ հաղթել է, այդ թվում՝ ադրբեջանցի Ռուստամ Օրուջովին, որը վարկանիշային աղյուսակում երկրորդն է, իտալացի Ֆաբիո Բազիլեին, որը Ռիոյի օլիմպիական խաղերի չեմպիոնն է: Ճիշտ է, նույն ձյուդոիստների հետ մրցավեճերում Կարապետյանը նաև պարտություններ ունի: Մնում է, որ բոլոր հանգամանքները միատեղվեն Տոկիոյում, որպեսզի հայ մարզիկը մտնի մեդալների համար պայքարի մեջ: Չէ որ օլիմպիական մեդալ նվաճելու շանս կարող է երկրորդ անգամ չընձեռվել: