Մեսսին իր հետևից է տանում Արգենտինային ու սլանում դեպի 6-րդ Ոսկե գնդակը. նրան կարող են խանգարել Նեյմարն ու թիմակիցները

Ֆուտբոլի Եվրոպայի առաջնությանը զուգահեռ Հարավային Ամերիկայում՝ Բրազիլիայում ընթանում է ֆուտբոլի Հարավային Ամերիկայի առաջնությունը: Ժամային գոտիների և թիմերի մակարդակները, իհարկե, այդ առաջնությունը թողնում են Եվրոպայի առաջնության ստվերում: Եթե նախկինում Եվրոն ու Կոպա Ամերիկան անցկացվում էին մեկ տարվա տարբերությամբ և ֆուտբոլասերների ուշադրությունը Կոպա Ամերիկայի նկատմամբ բավականին մեծ էր, ապա կորոնավիրուսով պայմանավորված Եվրոպայի առաջնության հետաձգումը մի փոքր փոխեց ֆուտբոլասերների ծրագրերը:

Իհարկե, դա պատահական չէ: Եվրոպայի առաջնությունում են հանդես գալիս եվրոպական ակումբային ֆուտբոլի աստղերի մեծ մասը, ընդ որում՝ տարբեր հավաքականների կազմում, մինչդեռ Հարավային Ամերիկայի ուժեղագույն ֆուտբոլիստների 80 տոկոսը կենտրոնացած են երկու հավաքականների՝ Բրազիլիայի և Արգենտինայի կազմում: Ժամային գոտիների տարբերությունը ևս քիչ հնարավորություն է տալիս եվրոպացի ֆուտբոլասերներին հետևել առաջնության ընթացքին: Մինչդեռ հենց Բրազիլիայում է այս պահին, միգուցե, որոշվում 2021թ.-ի լավագույն ֆուտբոլիստի՝ «Ոսկե գնդակի» դափնեկրի հարցը:

Երկու մրցաշարերն էլ ընթանում են գրեթե զուգահեռ, և մինչ Իտալիան դրամատիկ, էմոցիաներով լի խաղում իր ճանապարհն էր հարթում դեպի եզրափակիչ՝ հետխաղյա 11 մետրանոցներով պայքարից դուրս թողնելով Իսպանիայի հավաքականին, Բրազիլիայի մայրաքաղաքում նմանատիպ սցենարով հանդիպում էր ընթանում Արգենտինայի և Կոլումբիայի միջև. հաղթողը դուրս էր գալու եզրափակիչ, որտեղ նրան սպասելու էր տանտերերի հավաքականը:

Վիճակահանությունը երկու տարբեր խմբեր էր բաժանել մրցաշարի ֆավորիտներին՝ Բրազիլիայի և Արգենտինայի հավաքականներին: Ստացվում էր այնպես, որ խմբերում առաջին տեղը զբաղեցնելու դեպքում այս երկու հավաքականներն իրար կարող էին հանդիպել միայն եզրափակիչում: Լիոնել Սկալոնիի ու Տիտեի սաներն իրենց առջև դրված խնդիրը խմբային փուլում գերազանց կատարեցին՝ տանելով երեք հաղթանակ ու մեկ հանդիպում էլ ավարտելով ոչ-ոքի: Խմբային փուլում դժվարություններ ունեցան ֆավորիտների շարքին դասվող Չիլին ու Կոլումբիան, մինչդեռ Ուրուվգայի հավաքականը, որը, հերթական անգամ, բավականին լավ կազմ է հավաքել, իր խմբում զիջեց միայն Արգենտինայի հավաքականին: Սակայն քառորդ եզրափակչում ուրուգվայցիներ զիջեցին Կոլումբիային: Բրազիլացիները դժվարությամբ հաղթեցին Չիլիին, Արգենտինան հաղթահարեց Էկվադորի արգելքը: Կիսաեզրափակչի վերջին մասնակիցը դարձավ մրցաշարի անակնկալ Պերուի հավաքականը, որը հաղթեց Պարագվային: Պերուացիները նաև բավականին լավ հանդիպում անցկացրին կիսաեզրափակչում՝ դիմակայելով տանտերերի հավաքականին, ու եթե խմբային փուլում նրանք զիջել էին Բրազիլիային 0-4 հաշվով, ապա կիսաեզրափակչում գրանցվեց միայն մեկ գոլ, որի հեղինակը դարձավ բրազիլացի Լուկաս Պակետան: Վերջինիս խփած գոլը հաղթանակ է պարգևում Բրազիլիային արդեն երկրորդ խաղում անընդմեջ:

Արգենտինան, իր հերթին, խմբային փուլի սկզբում բավականին անշուք խաղ էր ցուցադրում. առաջին երեք խաղերում թիմը մեկական գնդակ էր խփում: Բայց, արդյունքը, միևնույն է, գոհացնում էր. այդ երեք խաղերում թիմը երկու հաղթանակ տարավ նվազագույն հաշվով, մեկ խաղ էլ ոչ-ոքի ավարտեց Չիլիի ամուր հավաքականի հետ: Փլեյ-օֆֆին մոտ՝ արգենտինացիների խաղը բարելավվեց, նրանք 4-1 հաշվով ջախջախեցին Բոլիվիային, քառորդ եզրափակչում էլ հնարավորություն չտվեցին Էկվադորին՝ 3-0: Կիսաեզրափակչում արգենտինացիներն դիմակայում էր Կոլումբիայի հավաքականը, որը հայտնի է իր կոպիտ խաղով: Լարված խաղն ավարտվեց 1-1 հաշվով, թիմերը հաղթողին որոշելու համար դիմեցին հետխաղյա 11 մետրանոցների հարվածաշարի օգնությանը, ճիշտ այնպես, ինչպես ժամեր առաջ եղել էր Իտալիա - Իսպանիա խաղում: 11 մետրանոցներն ավելի դիպուկ իրացրին արգենտինացիները:

«Ալբիսելեստեի» կազմում այս մրցաշարում փայլում է թիմի ավագն ու առաջատարը՝ Լիոնել Մեսսին: Նա, կարծես, գտել է իր իդեալական թիմակցին հարձակման գծում. «Ինտերի» ֆուտբոլիստ Լաուտարո Մարտինեսը շատ լավ է համագործակցում Մեսսիի հետ: Արգենտինացիների առաջատարն արդյունավետ գործողությունների հեղինակ է դառնում մրցաշարի բոլոր հանդիպումներում՝ բացառությամբ խմբային փուլի Պարագվայի հետ հանդիպման: Չիլիի հետ խաղում՝ գոլ, Ուրուգվայի հետ՝ գոլային փոխանցում, Բոլիվիայի հետ խաղում՝ դուբլ+գոլային փոխանցում, Էկվադորի հետ՝ գոլ + երկու գոլային փոխանցում, Կոլումբիայի հետ՝ գոլային փոխանցում, ինչպես նաև հետխաղյա 11 մետրանոցների հարվածաշարում դիպուկ իրացրած 11 մետրանոց: Մեսսին մասնակից է մրցաշարում իր թիմի խփած 11 գոլերից 9-ին (4 գոլ, 5 գոլային փոխանցում): Ֆենոմենալ ցուցանիշ: Գոլերն ու գոլային փոխանցումներն էլ մեկը մյուսից գեղեցիկ:

Մրցաշարում հաղթելու դեպքում Մեսսին կդառնա «Ոսկե գնդակի» գլխավոր ֆավորիտը, թեև ակումբային ֆուտբոլում արգենտինացին այս տարի լուրջ ձեռքբերումներ չի ունեցել (խոսքը թիմային ձեռքբերումների մասին է): Մեսսիի գլխավոր մրցակիցները «Ոսկե գնդակի» համար պայքարում նույնպես ունեցել են խնդիրներ տարվա ընթացքում. Լևանդովսկին «Բավարիայի» հետ դուրս մնաց Չեմպիոնների լիգայի քառորդ եզրափակչից, Նեյմարն ու Կիլիան Մբապեն չկարողացան ՊՍԺ-ին առաջ տանել Չեմպիոնների լիգայում: Ընդ որում, Նեյմարը Կոպա Ամերիկայում էլ լավագույնը չէ, իսկ Մբապեն ձախողեց Եվրոպայի առաջնությունը: Ֆրանսիացի Նգոլո Կանտեն էլ «Չելսիի» կազմում հաղթեց Չեմպիոնների լիգան, բայց Ֆրանսիայի հավաքականի հետ ձախողվեց Եվրոպայի առաջնությունում: Փաստացի, մնում է միայն Իտալիայի հավաքականի կիսապաշտպան Ժորժինյոն, բայց դժվար է հավատալ, որ նա շատ ձայներ կստանա «Ոսկե գնդակի» համար պայքարում: Վաղուց այդ մրցանակը չեն շնորհում թիմային հաջողությունների համար, մեծ հաշվով «Ոսկե գնդակը» դարձել է հարձակվողների համար մրցանակ, որը երբեմն նաև բաժին է հասնում կիսապաշտպաններին:

Այնպես, որ Մեսսին սլանում է դեպի իր 6-րդ «Ոսկե գնդակը», բայց նրան այդ գործում կարող են խանգարել իր մոտ ընկեր Նեյմարն ու թիմակիցները: Բրազիլիան ցանկանում է սեփական հարկի տակ հաղթել Կոպա Ամերիկան, կազմի ընտրության հարցում էլ գերազանցում է Արգենտինային: Բայց Մեսսին փայլուն հնարավորություն ունի վերջապես տիտղոս նվաճել նաև հավաքականի կազմում, և, թվում է՝ հուլիսի 11-ին, գիշերը ժամը 4-ին կայանալիք եզրափակչում ամեն ինչ անելու է դրան հասնելու համար: