Այսուհետ Երեւանի քաղաքապետի որոշմամբ կարող է քանդվել համայնքային հողում կառուցված ցանկացած ինքնակամ շինություն

Երեւանի ավագանին այսօր հաստատեց մի նախագիծ, համաձայն որի՝ Երեւան համայնքի սեփականությունը հանդիսացող հողամասում կառուցված ինքնակամ կառույցը այսուհետ կարող է քանդվել Երեւանի քաղաքապետի որոշմամբ, անկախ կառույցի ավարտվածության աստիճանից եւ օրինականացման ենթակա լինել-չլինելու հանգամանքից:

Երեւանի ավագանին փոփոխություններ եւ լրացումներ կատարեց Երեւան քաղաքի ավագանու 2020 թվականի դեկտեմբեր 23-ի «Երեւան քաղաքի սեփականություն հանդիսացող գույքը օգտագործման տրամադրելու եւ օտարման 2021 թվականի ծրագրի վերաբերյալ» N 315-Ն որոշման մեջ:

Ըստ այդ փոփոխությունների՝ N 315-Ն որոշման 2-րդ կետի 3-րդ ենթակետը ճանաչվեց ուժը կորցրած, 2-րդ կետը լրացվեց նոր ենթակետով, որը ենթադրում է՝ Երեւան համայնքի սեփականությունը հանդիսացող հողամասում կառուցված ինքնակամ կառույցը, անկախ ավարտվածության աստիճանից եւ օրինականացման ենթակա լինել կամ չլինելու հանգամանքից, կարող է քանդվել Երեւանի քաղաքապետի որոշմամբ:

Բանն այն է, որ օրինական ճանաչված ինքնակամ շինությունների եւ դրանցով ծանրաբեռնված հողամասերի տնօրինումը իրականացվում է Հայաստանի Հանրապետության կառավարության 2006 թվականի մայիսի 18-ի N 912-Ն որոշմամբ սահմանված կարգով միայն այն դեպքում, եթե ինքնակամ շինությունը ճանաչվել է օրինական մինչեւ 2021 թվականի հունվարի 31-ը ներկայացված դիմումի հիման վրա:

Երևան քաղաքի ավագանու 2020 թվականի դեկտեմբերի 23-ի թիվ 315-Ն որոշման 2-րդ կետի 3-րդ ենթակետի համաձայն՝ ինքնակամ կառույցների օտարման կամ օգտագործման տրամադրելու հետ կապված հարաբերությունները ենթակա են կարգավորման Հայաստանի Հանրապետության կառավարության 2006 թվականի մայիսի 18-ի N912-Ն որոշմանը համապատասխան: Այսուհետ այդ ենթակետը համարվում է ուժը կորցրած:

Բանն այն է, որ ՀՀ քաղաքացիական օրենսգրքի համաձայն (188-րդ հոդվածի 2-րդ մաս) պետական կամ համայնքային սեփականություն հանդիսացող հողամասում գտնվող ինքնակամ կառույցի նկատմամբ ճանաչվում է պետության կամ համայնքի սեփականությունը, անկախ նրանից, թե ով է այն կառուցել:

Երեւանի ավագանու համապատասխան որոշման հիմնավորման մեջ նաեւ նշվում է, որ ՀՀ Սահմանադրությամբ կամ որեւէ այլ իրավական ակտով, այդ թվում՝ ՀՀ քաղաքացիական օրենսգրքով, սահմանված չէ որեւէ այլ կանոն համայնքային սեփականություն հանդիսացող հողամասում գտնվող ինքնակամ կառույցների տնօրինման վերաբերյալ: Սահմանված չէ նաեւ որեւէ մարմին, որին վերապահված է գույքի տնօրինման կարգ ընդունելու իրավասություն, ինչից բխում է, որ այդ գույքը օրինական ճանաչվելուց հետո այն համայնքային սեփականություն է, որի տնօրինման կարգը պետք է սահմանի Երեւան համայնքի ավագանին:

Այս հիմնավորումը ավագանու որոշման մեջ ներկայացվել է՝ հիմք ընդունելով «Երևան քաղաքում տեղական ինքնակառավարման մասին» օրենքի կարգավորումները (12-րդ հոդվածի 1-ին մասի 18-րդ կետ), համաձայն որի՝ Երեւան ավագանին որոշում է ընդունում Երևանի սեփականություն հանդիսացող գույքը օգտագործման տրամադրելու եւ օտարման տարեկան ծրագրի վերաբերյալ, որում պետք է նշվեն օգտագործման տրամադրման կամ օտարման եղանակը, ժամկետները, նպատակը:

«Վերոգրյալից բխում է, որ Երևան համայնքի ավագանին ինքնակամ կառույցների տնօրինման հետ կապված սեփական կարգ չի սահմանել եւ որոշել է, որ այն պետք է կարգավորվի ՀՀ կառավարության 18.05.2006 թվականի N912-Ն որոշմամբ սահմանված կարգով: Ներկայումս առաջարկվում է Երեւան քաղաքի ավագանու քննարկվող որոշումից նշված կարգավորումները հանել և ինքնակամ կառույցների տնօրինումը իրականացնել Երևան քաղաքի ավագանու որոշմամբ համայնքային այլ գույքերի տնօրինման համար սահմանված ընդհանուր կարգով: Միաժամանակ ամրագրել, որ Երեւանի քաղաքապետը իրավասու է քանդել համայնքի սեփականությունը հանդիսացող հողամասում կառուցված ինքնակամ շինությունը՝ անկախ դրա օրինականացման ենթակա լինելու հանգամանքից»,- մասնավորապես նշված է ավագանու որոշման հիմնավորման մեջ: Որոշումն ընդունվեց 39-ը կողմ, 0 դեմ, 2 ձեռնպահ ձայների արդյունքում:
Երեւանի ավագանու այսօրվա նիստին մասնակցում են ավագանու 42 անդամ: