Խաղ, որից շատ բան է կախված. ինչպես է Հայաստանի հավաքականը մոտենում մակեդոնացիների հետ խաղին

Հայաստանի հավաքականը ֆուտբոլի 2022թ.-ի աշխարհի առաջնության ընտրական փուլում հերթական երեք հանդիպումները կանցկացնի: Սեպտեմբերի 2-ին Խոակին Կապառոսի սաները մրցակցի կհանդիպեն Հյուսիսային Մակեդոնիային, երեք օր անց կհյուրընկալվեն Գերմանիային, սեպտեմբերի 8-ին էլ Հանրապետական մարզադաշտում կընդունեն Լիխտենշտեյնին:

Ախորժակը բացվել է. սեպտեմբերյան հանդիպումները մեծ նշանակություն ունեն

Մարտ ամսին ունեցած աննախադեպ հաջողությունից հետո (երեք հաղթանակ երեք խաղերում), ֆուտբոլասերների, ինչու ոչ նաև հավաքականի տղաների ախորժակը բացվել է: Ռեալ հնարավորություն է ստեղծվել խմբում առաջին երկու տեղերի համար պայքարելու, որը կարող է ճանապարհ բացել դեպի Քաթար: Այդ տեսանկյունից սեպտեմբերյան հանդիպումներն առանցքային նշանակություն են ստանում: Առաջիկա երկու խաղերում Հայաստանի հավաքականը հանդիպելու է իրենից երեք միավորով հետ մնացող Մակեդոնիայի և Գերմանիայի հավաքականներին: Եվ եթե հաշվի առնենք, որ Գերմանիան, չնայած մարտին Մակեդոնիայից կրած պարտությանը, շարունակում է համարվել խմբի հաղթողի բացահայտ ֆավորիտը, Մակեդոնիայի հետ հանդիպման կարևորությունն էլ ավելի է ընդգծվում:

Առանց երեք կարևոր ֆուտբոլիստների, բայց Մխիթարյանի հետ

Սկոպյեում Կապառոսի տրամադրության տակ չեն լինելու հիմնական կազմի երեք կարևոր ֆուբոլիստներ՝ Վարազդատ Հարոյանը, Տիգրան Բարսեղյանը և Խորեն Բայրամյանը, նրանք որակազրկված են: Ու եթե վերջին երկուսին փոխարինել հնարավոր է, քանի որ հարձակման գծում ընտրությունը շատ մեծ է, ապա Հարոյանի բացակայությունը լուրջ խնդիրներ կարող է առաջացնել պաշտպանությունում: «Կադիսի» պաշտպանը պաշտպանության առաջատարն է, նրան փոխարինելն այս պահին շատ դժվար է: Կապառոսը պետք է ընտրի Տարոն Ոսկանյան - Հրայր Մկոյան զույգից: Ոսկանյանը շատ լավ մրցաշրջան անցկացրեց, բացի այդ եվրագավաթային հանդիպումներում լավ փորձ ձեռք բերեց, իսկ 35-ամյա Մկոյանը իր կարիերայի լավագույն խաղերից է ցուցադրում «Արարատում»:

Զգալի կլինի նաև Բարսեղյանի բացակայությունը, նա դարձել է հավաքականի շարժիչն առջևի գծում. Տիգրանի արագացումները մեծ զենք են Հայաստանի հավաքականի համար, այժմ իսպանացի մասնագետը պետք է նոր զենքեր գտնի իր զինանոցից: Իհարկե, Կապառոսին շատ կօգնի այն, որ հավաքականին միացել է թիմի ավագն ու առաջատարը՝ Հենրիխ Մխիթարյանը: Լավ մարզավիճակում են Վահան Բիչախչյանն ու Էդուարդ Սպերցյանը, առաջնությունում շատ լավ է խաղում Հայաստան վերադարձած Էրիկ Վարդանյանը: Այնպես որ, առջևի գծում ընտրության պակաս չկա:

Անսպասելի խնդիր

Եվս մեկ խնդիր կարող է լինել Դավիթ Յուրչենկոյի հավանական բացակայությունը: Հավաքականի հիմնական դարպասապահը վնասվածք է ստացել, նրա մասնակցությունը խաղին դեռ հարցականի տակ է: Յուրչենկոն մարզվում է, թիմի հետ մեկնել է Սկոպյե, բայց վերջնական պատասխանը պետք է բժիշկները տան: Վնասվածքից նոր է ապաքինվել ու խաղային պրակտիկայի պակաս ունի նրա փոխարինողը՝ Արսեն Բեգլարյանը: Եթե Յուրչենկոն չհասցնի ապաքինվել, նրան կփոխարինի կամ Անատոլի Այվազովը կամ հավաքականի նորեկ՝ «Փյունիկի» դարպասապահ Ստանիսլավ Բուչնևը: Վերջինս հայկական արմատներ ունի, ինչը թույլ տվեց ՖԻՖԱ-ի հետ արագորեն լուծել փաստաթղթային հարցերը: Բայց, իհարկե, Յուրչենկոյին համարժեք փոխարինում այս պահին հավաքականում չկա:

Եվս մեկ նորեկ

Հավաքականում ևս մեկ նորեկ կա. Կալինինգրադի «Բալթիկայի» հարձակվող Իշխան Գելոյանը: 28-ամյա հարձակվողը երկու տարի առաջ տեղափոխվեց Ռուսաստանի Պրեմիեր լիգայում հանդես եկող «Տամբով», բայց լուրջ վնասվածքի պատճառով այդպես էլ ոչ մի հանդիպում չանցկացրեց: Այժմ Իշխանն ապաքինվել է վնասվածքից, աստիճանաբար վերականգնում է մարզավիճակը Ռուսաստանի առաջին դիվիզիոնում հանդես եկող «Բալթիկայում»: Կապառոսին անհրաժեշտ են հարձակվողներ, եթե Ալեքսանդր Կարապետյանի ու Սարգիս Ադամյանի խաղը չստացվի, և Գելոյանի հրավերը տրամաբանական է:

Առաջիկա մրցակիցը

Մակեդոնիայի հավաքականը Եվրոպայի առաջնությունից հետո մի փոքր փոփոխված տեսք ունի: Փոխվել է գլխավոր մարզիչը, թիմը գլխավորել է երիտասարդական հավաքականի նախկին գլխավոր մարզիչ Միլևսկին: Հավաքականում իր կարիերան ավարտել է թիմի բազմամյա առաջատար, մակեդոնական ֆուտբոլի լեգենդ Գորան Պանդևը, որը նույնիսկ 38 տարեկանում եղանակ էր ստեղծում հավաքականում: Վնասվածք ունի Զագրեբի «Դինամոյի» կիսապաշտպան Ադեմին: Փոխարենը մյուս առաջատարները՝ Էնես Բարդին, Էրսան Ալիոսկին և Էլիֆ Էլմասը լավ մարզավիճակում են: Մակեդոնացիները, ավանդաբար, թույլ պաշտպանություն ունեն, դրանից պետք է փորձի օգտվել Հայաստանի հավաքականը:

Միավորների հաշվարկ

Մրցաշարային աղյուսակի տեսանկյունից Մակեդոնիայի հավաքականի հետ խաղում Հայաստանի հավաքականի ձեռնտու է ոչ-ոքի արդյունքը: Դրանով Կապառոսի սաները թույլ չեն տա մակեդոնացիներին մոտենալ իրենց մրցաշարային աղյուսակում: Դե իսկ հաղթանակը գերազանց արդյունք կլինի, որը թույլ կտա 6 միավորով պոկվել առաջ հիմնական մրցակիցներից մեկից:

Ռաֆայել Խալաթյան