Հայտնի է «Գյումրին կռնա՛» դաշինքի քաղաքապետի թեկնածուն. դաշինքի փաթեթը պատրաստ է, բայց դեռ չի ներկայացվել հանձնաժողովին

Հոկտեմբերի 17-ին Գյումրիում կայանալիք ՏԻՄ ընտրություններին ընդառաջ ազգային գաղափարախոսություն կրող քաղաքական ուժեր են միավորվել: Համագործակցության հուշագիր է ստորագրվել Գյումրու Ազգային արժեք ակումբի, Նժդեհյան Ցեղակրոն, Հայք (Հայկազուններ), Քրիստոնեա-ժողովրդական վերածնունդ կուսակցությունների միջև Գյումրիի համայնքային ընտրություններում միասնական «Գյումրին կռնա՛» դաշինքով հանդես գալու վերաբերյալ:

Մինչ դաշինքի կազմի և նպատակի ու անելիքների մասին խոսելը, ընտրացուցակը գլխավորող, այսինքն՝ Գյումրու քաղաքապետի թեկնածու Վարդան Սրտաշյանը նախ հստակեցրեց տարածվող մի թյուրիմացություն: Ասաց՝ սխալ մեկնաբանություններ ու կարծիքներ կան՝ կապված հուշագիրը ստորագրած կողմերի հետ:

«Տեղեկատվություն է տարածվել, թե դաշինքի մեջ ենք մտել Շանթ Հարությունյանի «Ցեղակրոն» կուսակցության հետ։ Իրականում խոսքը մեր գործընկեր Գևորգ Հովսեփյանի «Նժդեհյան Ցեղակրոն» կուսակցության մասին է, որը կապ չունի Շանթ Հարությունյանի կուսակցության հետ։ Մարդիկ շփոթել էին: Որոշակի անճշտություններ նաև եղան Սոս Գիմիշյանի Քրիստոնեա-ժողովրդական վերածնունդ կուսակցության հետ, որովհետև խառնում էին Լևոն Շիրինյանի Քրիստոնեա-դեմոկրատական վերածնունդ կուսակցության հետ»,- մանրամասնեց Սրտաշյանը:

Ինչո՞ւ համագործակցեցին հենց այդ կուսակցությունների հետ՝ Սրտաշյանն ասաց՝ ժամանակի ընթացքում քաղաքական պրոցեսներից զերծ մնացած կուսակցություններ են, գաղափարական մարդկանց համախումբ է:

«Երեք հիմնական գաղափարական ուղղություն կար՝ քրիստոնեությունը, նժդեհյան ցեղակրոնությունը և գենետիկ հիմքի վրա հայրենասիրական ու ժառանգության պահպանումը: Այս 3 գաղափարական հիմքերի համադրմամբ մենք ներկայացնում ենք մեր պատկերացումներն այսօրվա քաղաքական դաշտի վերաբերյալ»,- մեզ հետ զրույցում ասաց Վարդան Սրտաշյանը:

Ընտրացուցակի կազմում ամենատարբեր ոլորտների ներկայացուցիչներ են՝ մտավորականներ, գործարարներ, բժիշկներ, դասախոսներ, տուրիզմից՝ մինչև մշակութային ոլորտ:

Դաշինքը գլխավորում է «Արաքս-95» ՍՊԸ տնօրեն Վարդան Սրտաշյանը, ընտրացուցակի 2-րդ համարը Շիրակի նախկին փոխմարզպետ, գործարար Վարդան Գրիգորյանն է: 3-րդ համարը «Իրական դպրոց» կրթամշակութային հիմնադրամի Գյումրու համակարգող, դասախոս Վարդուհի Բալոյանն է:

Դաշինքի կազմում են նաև Մայիսյանի միջնակարգ դպրոցի տնօրեն Հրաչյա Մսրյանը, «Գյումրին առանց տնակների» հիմնադրամի նախկին տնօրեն Մհեր Խաչատրյանը, Ախուրյանի Մոր և Մանկան առողջության կենտրոնի բժիշկ Աստղիկ Հյուսյանը, Տիրամայր արհեստի դպրոց, դասախոս Գագիկ Սերոբյանը, անհատ ձեռներեց Արթուր Գրիգորյանը, մենեջեր Արթուր Մելիքյանը, Գյումրու տեխնոլոգիական կենտրոն, SMM/PR պատասխանատու Սեդա Սահակյանը, «Արաքս-95» ՍՊԸ, ադմինիստրատոր Հարություն Փահլևանյանը, Կարեն Մկրտչյանը, Իրինա Ծերունյանը, Գյումրու ակադեմիական վարժարանի ուսուցիչ Սամվել Փիլոսյանը, «Էյ-Ի-Ջի սերվիս» ՍՊԸ, համակարգչային օպերատոր Ելենա Ավետիսյանը, Ջրափիի միջնակարգ դպրոցի ուսուցիչ Արմեն Հովհաննիսյանը, Սարակապի միջնակարգ դպրոցի ուսուցիչ Մխիթար Մխիթարյանը և այլք:

Դաշինքը կազմել են, ցուցակի առաջին համարը հայտնի է, հստակ են նաև մյուս թեկնածուները: Փաստաթղթերը, սակայն, տարածքային ընտրական հանձնաժողով դեռ չեն ներկայացրել: Սրտաշյանն ասաց՝ պատճառ ունեին: «Դեռ ընտրությունները հայտարարված չէին, մեր փաթեթն արդեն պատրաստ էր, մենք գիտեինք, թե ինչ ենք անելու: Ուղղակի մեր ընկերներից մեկը պատճառ ուներ, մեկնել էր Ռուսաստան, երեկ է վերադարձել, իր տեղեկանքն էր պակաս: Վաղը դա էլ կունենանք ու կներկայանանք հանձնաժողովին»,- տեղեկացրեց Սրտաշյանը:

Սամսոն Մատինյան