Կոռուպցիա, յուրացումներ, պաշտոնի չարաշահում. ՖԻՖԱ-ի և ՈՒԵՖԱ-ի նախկին ղեկավարները մեղադրյալի կարգավիճակում են

Շվեյցարիայի դատախազությունը երեքշաբթի օրը խարդախության մեղադրանք է ներկայացրել համաշխարհային և եվրոպական ֆուտբոլի նախկին առաջնորդներ Զեպ Բլատերին և Միշել Պլատինիին։

Բացի խարդախությունից, շվեյցարացիները նաև հետաքննում են ենթադրյալ կոռուպցիան ՖԻՖԱ-ում և ՈՒԵՖԱ-ում՝ Քաթարը որպես Աշխարհի առաջնությունը հյուրընկալող երկիր ընտրելիս: Դա եղել է այն ժամանակ, երբ Բլատերն ու Պլատինին ղեկավարում էին այդ կազմակերպությունները, սակայն այս կոնկրետ մեղադրանքը վերաբերվում է այլ դրվագի:

Շվեյցարիայի դատախազությունը հայտարարել է, որ երկու միլիոն շվեյցարական ֆրանկ (2,19 միլիոն ԱՄՆ դոլար) է վճարվել Միշել Պլատինիին: Այդ գումարը տնօրինել է Զեպ Բլատերը  2011 թվականին։

Դատախազության տվյալներով՝ վճարումը «վնասել է ՖԻՖԱ-ի ակտիվներին և հանգեցրել Պլատինիի անօրինական հարստացմանը»։

Այժմ Ֆուտբոլային ասոցիացիաների միջազգային ֆեդերացիայի (ՖԻՖԱ) նախկին նախագահ շվեյցարացի Զեպ Բլատերը և Ֆուտբոլի Եվրոպական Միության (ՈՒԵՖԱ) նախկին նախագահ և 1980-ականների ֆուտբոլի գերաստղ Միշել Պլատինին առաջիկա ամիսներին կկանգնեն Շվեյցարիայի Բելինզոնա քաղաքում դատարանի առաջ:

Բլատերն ու Պլատինին պնդում են, որ վճարումը միանգամայն օրինական է եղել։ Խոսքը աշխատավարձի բարձրացման մասին է, որը Պլատինին հետադարձ ուժով պահանջել է ՖԻՖԱ-ում Բլատերի խորհրդական աշխատելու իր տարիների համար ՝ 1998-ից 2002 թվականներին։ Երկուսն էլ պնդում են, որ իրենք համաձայնել են այս բարձրացմանը նույնիսկ այն ժամանակ, երբ Պլատինին խորհրդական էր:

Այնուամենայնիվ, դատախազները նշում են, որ Պլատինին խնդրել է իրեն վճարել «խորհրդատվական գործունեության ավարտից ավելի քան ութ տարի անց»: Նրանք այս վճարը տեսնում են այլ լույսի ներքո. 2011-ին Զեպ Բլատերը պատրաստվում էր վերընտրվել ՖԻՖԱ-ի նախագահի պաշտոնում, և Պլատինին, ենթադրաբար, կարող էր ազդել այն գործընթացի վրա, թե ինչպես կքվեարկեին Եվրոպայի պատվիրակները:

Բլատերն ու Պլատինին մեղադրվում են խարդախության, յուրացումների, պաշտոնեական դիրքի չարաշահման և փաստաթղթերի կեղծման մեջ։

Այս գործի հետաքննությունը սկսվել է 2015 թվականին, և միաժամանակ Բլատերն ու Պլատինին հեռացվել են ֆուտբոլից։ Երկուսն էլ վիճարկել են այս որոշումը դատարաններում, բայց ամենուր պարտվել են։

85-ամյա Զեպ Բլատերը մինչև 2015 թվականը 17 տարի ղեկավարում էր ՖԻՖԱ-ն, իսկ 66-ամյա Միշել Պլատինին այն ժամանակ պատրաստվում էր փոխարինել նրան:

Պլատինիի փաստաբան Դոմինիկ Նելենը երեքշաբթի օրը BBC-ին ասել է, որ իր պաշտպանյալը «կտրականապես հերքում է կեղծ մեղադրանքները»:

«Գործի նյութերում կան բավարար ապացույցներ և փաստաթղթեր, որոնք ապացուցում են իմ պաշտպանյալի անմեղությունը: Ես 100%-ով վստահ եմ, որ մենք կարող ենք ապացուցել իմ պաշտպանյալի անմեղությունը դատարանում»,-ասել է Նելենը:

Բլատերը հայտարարություն է արել նոր մեղադրանքների վերաբերյալ և ասել, որ անհամբեր սպասում է դատավարությանը, որը, հուսով է, «վերջ կդնի այս պատմությանը»:

 ՖԻՖԱ-ի նախկին ղեկավարը բացատրել է, որ վճարումը կատարվել է բանավոր պայմանավորվածությունների հիման վրա, իսկ ուշացումը պայմանավորված է նրանով, որ համաշխարհային ֆուտբոլի ֆեդերացիան չի կարողացել ամբողջ գումարը փոխանցել իրեն ժամանակին։ Բլատերի խոսքով՝ Պլատինիի որոշումը հաստատվել է ՖԻՖԱ-ի բոլոր պատասխանատու մարմինների կողմից, և ստացողը դրանից բոլոր հարկերը վճարել է Շվեյցարիայում։

2010 թվականի վերջում ՖԻՖԱ-ն քվեարկեց 2018 և 2022 թվականների աշխարհի առաջնությունները ընդունող երկրների վերաբերյալ։ 2018 թվականի առաջնությունը հաղթել է Ռուսաստանը, իսկ 2022 թվականի առաջնությունը՝ Քաթարը։ Այս վերջին որոշումը՝ չեմպիոնությունը փոքր, ոչ ֆուտբոլային և ոչ շատ թեժ երկրին տալը, շվեյցարական դատախազության առանձին հետաքննության առարկա է, և թե՛ Բլատերը, թե՛ Պլատինին նույնպես ներգրավված են այս հետաքննության մեջ։