Սևերի ու սպիտակների չենք բաժանելու, առողջ ծրագրեր ունեցողների հետ կհամագործակցենք. Ստեփանավանում ՀԱԿ թեկնածու

Սույն թվականի նոյեմբերի 14-ին Լոռու մարզի Ստեփանավան համայնքում ևս սպասվում են ՏԻՄ ընտրություններ:

«Հայկական ժամանակը» զրուցել է Ստեփանավանում «Հայ ազգային կոնգրես» կուսակցության համայնքապետի թեկնածու Վանո Հակոբյանի հետ՝ կուսակցության առաջարկների, համայնքի խնդիրների և հավանական կոալիցիաների մասին:

- Պարոն Հակոբյան, Դուք ծնվել, մեծացել ու արարել եք Ստեփանավանում: Բնականաբար, խորքային ծանոթ կլինեք համայնքին վերաբերող խնդիրներին: Որո՞նք են դրանք և ի՞նչ լուծումներ են պահանջում:

- Ստեփանավան խոշորացված համայնքի և կոնկրետ Ստեփանավան համայնքի կարևոր խնդիրներից մեկը ճանապարհաշինությունն է: Համայնքային մի շարք ճանապարհներ վերջին անգամ նորոգվել են 70-ականներին, և ոչ մի անգամ այդ ճանապարհների վրա վերանորոգման աշխատանքներ չեն իրականացվել: Առկա է նաև ջրաֆիկացման խնդիրը: Համայնքներ կան՝ խմելու ջուր չունեն, մարդիկ գետից են վերցնում ջուրը: Գազաֆիկացման խնդիր նույնպես առկա է համայնքում. գյուղեր կան՝ գազ չունեն: Գյուղատնտեսությունը նույնպես զարգանալու տեղ ունի, դրա զարգացման վրա դրական ազդեցություն կունենա հակակարկտակայանների կառուցումը:

- Դուք 2000-2006 թվականներին աշխատել եք որպես Կաթնաղբյուր համայնքի ղեկավարի տեղակալ, այսինքն՝ համայնք ղեկավարելու փորձ ունեք: Ընտրվելու դեպքում Ձեր մատնանշած խնդիրներին ինչպե՞ս եք պատկերացնում լուծում տալ:

- Համայնքային բյուջեի միջոցներով այս բոլոր խնդիրները լուծել հնարավոր չէ: Պետք է ներդրումների և հանգանակությունների միջոցով գումարներ հավաքվեն: Մեծ թվով մեր հայրենակիցներ, որոնք այժմ երկրում չեն, պատրաստ են իրենց ներդրումն ունենալ համայնքի զարգացման հարցում: Ես կարող եմ մատնանշել և ասել՝ ովքեր են պատրաստ:

- Իսկ ո՞րն է եղել պատճառը, որ այս տարիների ընթացքում այդ մարդիկ համայնքում չեն արել ներդրում:

- Պատճառներից մեկն այդ ուղղությամբ կազմակերպչական աշխատանքի բացակայությունն է: Բայց մեզ ներդրումներ են պետք, որպեսզի շատանան նաև աշխատատեղերը: Համայնքի բնակիչների մեծ մասը թողել է տունը, գնացել է այլ երկրում աշխատելու, գտել է իր հացը վաստակելու մինիմալ ձևը:

- Համայնքի հետագա ապագան, զարգացումը կախված է երիտասարդներից: Ի՞նչ անել, որ երիտասարդները մնան և շենացնեն իրենց համայնքը, ոչ թե, օրինակ, ուսման նպատակով գնան մայրաքաղաք և ավերտելուց հետո մնան այնտեղ:

- Ես չէի ասի, թե երիտասարդները գնում և մնում են մայրաքաղաքում: Ավելի շատ թողնում են երկիրը և հեռանում: Միակ ելքը աշխատատեղեր բացելն է, նրանց մեջ հետաքրքրություն առաջացնելը: Մեզ մոտ նույնիսկ տարրական խնդիրները հիմա չեն լուծվում: Օրինակ՝ ճանապարհների վատ լինելու պատճառով շտապօգնության մեքենաները շատ ժամանակ չեն կարողանում ժամանակին հասնել համայնք և օգնություն ցուցաբերել:

Պարոն Հակոբյան, Ստեփանավանը քիչ թե շատ ակտիվ տուրիստական կենտրոն է. Դենդրոպարկ, Լոռվա բերդ, մի շարք եկեղեցիներ և այլ տեսարժան վայրեր: Ի՞նչ քայլեր պետք է ձեռնարկվեն, որ այն ավելի զարգանա և դառնա հայտնի տուրիստական ուղղություն:

- Նախ, պետք է Ստեփանավան համայնքի մաքրությանը ուշադրություն դարձվի, ինչպես նաև բնակիչների շփումն ու վերաբերմունքը տուրիստների նկատմամբ պետք է փոխվի: Ծառայությունները, որոնք գործում են Ստեփանավանում, պետք է զարգացնել, ավելի բարձր մակարդակի հասցնել: Բայց ասեմ՝ այն համայնքը, որտեղ կա սոցիալական խնդիր, տուրիզմը զարգացնելը բարդ է: Նախ այդ ուղղությամբ պետք է աշխատել:

- ՏԻՄ ընտրությունների արդյունքներով եթե կարիք լինի կոալիցիա կազմելու, պատրա՞ստ եք համագործակցել «Քաղաքացիական պայմանագիր» կամ «Բարգավաճ Հայաստան» կուսակցությունների հետ:

- Մենք ապրում ենք մի երկրում, որտեղ խնդիրները շատ են, սևերի ու սպիտակների չենք բաժանելու: Առողջ ծրագրեր ու գաղափարներ ունեցող կուսակցությունների հետ մենք պատրաստ ենք համագործակցել: Ամեն բան պետք է անենք, որպեսզի մեր տարածաշրջանը զարգանա. քաղաքական նկատառումները մեզ համար երկրորդական են, մեր սկզբունքն առողջ դատողությունն է:

Անյուտա Աթանեսյան