Քաշքշուկ, ուշագնացություն, ռումբի մասին ահազանգ․ Փարաքարում կրկին չի հաջողվում համայնքապետ ընտրել

Այսօր Արմավիրի մարզի Փարաքար խոշորացված համայնքում կրկին փորձում են համայնքապետ ընտրել, սակայն, ինչպես նախկին բոլոր դեպքերում, այսօր ևս համայնքապետի ընտրությունը հարթ չի անցնում:

Մինչ ավագանու նիստի մեկնարկը՝ Փարաքարի մշակույթի տան դիմաց բախում տեղի ունեցավ «Ապրելու երկիր» կուսակցության աջակիցների և ոստիկանների միջև, ինչի հետևանքով ոստիկաններից և քաղաքացիներից մեկը ուշագնաց եղան:

Ավագանու նիստի մեկնարկը տրված էր 10։00-ին, սակայն «Ապրելու երկիր» կուսակցության ներկայացուցիչներն ուշացել էին. «Դավիթ Մինասյան» դաշինքի և «Քաղաքացիական պայմանագիր» կուսակցության ավագանու անդամները նիստը սկսեցին առանց նրանց։

Նշենք, որ դեկտեմբերի 5-ին կայացած ՏԻՄ ընտրություններում Փարաքարում 10 մանդատ է ստացել «Ապրելու երկիր» կուսակցությունը, 5 մանդատ՝ «Դավիթ Մինասյան» կուսակցությունների դաշինքը, 6-ը՝ «Քաղաքացիական պայմանագիր»-ը։

Նիստը բացեց «Դավթի Մինասյան» դաշինքից ավագանու ամենատարեց անդամը՝ արձանագրելով, որ ներկա է ավագանու 11 անդամ, ինչը նշանակում է՝ քվորում կա, և նիստը պաշտոնապես բացված է համարվում։ Սակայն քիչ անց դահլիճ մտած «Ապրելու երկիր» կուսակցության ներկայացուցիչը հայտարարեց, որ դուռը փակված է եղել և իրենց թույլ չեն տվել մտնել նիստերի դահլիճ։ Թեժ բանավեճ սկսվեց երկու ուժերի միջև։ «Ապրելու երկիր» կուսակցության ներկայացուցիչները մեղադրում էին «Դավիթ Մինասյան» դաշինքի անդամ Գոռ Սարիբեկյանին ավագանու նիստերի դահլիճի դուռը փակելու և իրենց մուտքը խոչընդոտելու համար, ինչը Սարիբեկյանը հերքում էր։

Նիստն անորոշ ժամանակով հետաձգվեց։ Այդ ընթացքում ինչ-որ մեկն ահազանգել էր, թե, իբր, շենքում ռումբ կա տեղադրված։ Ժամանեցին արտակարգ իրավիճակների նախարարության աշխատակիցները, որոնք շան օգնությամբ որոնողական աշխատանքներ իրականացրին, սակայն պայթուցիկ չհայտնաբերվեց։

Դեպքից հետո փորձ արվեց նիստը կրկին վերսկսելու, սակայն ապարդյուն։

«Ապրելու երկիր» կուսակցության ավագանու անդամները կրկին նշում էին, որ իրենց ներկայացուցիչը չի կարողացել նիստերի դահլիճ մտնել ոստիկանների և քաղաքացիների միջև բախման հետևանքով։ Նրանք պնդում էին, որ «Ապրելու երկրի» տարեց անդամը պետք է շարունակի վարել նիստը, ինչին չհամաձայնեցին «Դավիթ Մինասյան» դաշինքի անդամները՝ նշելով, որ նրանք ուշացել են, նիստը սկսել է, իրավազոր է, և այն արդեն այլ մարդ է վարում: Նրանք հորդորեցին կուսակցությանը դիմել դատարան, եթե համաձայն չեն այն բանի հետ, որ նիստը մեկնարկել է և այդ պահին ներկա ամենատարիքով անդամն է այն բացել:

Կողմերն այդպես էլ չեկան համաձայնության, և նիստը կրկին ընդմիջվեց։

Հիշեցնենք, որ անցած տարվա դեկտեմբերի 20-ին Փարաքարում ավագանու առաջին նիստ արդեն տեղի էր ունեցել, սակայն ավագանու անդամներն այդպես էլ չէին կարողացել համայնքապետ ընտրել։

Բանն այն է, որ «Ապրելու երկիր» կուսակցությունը Փարաքարում 21 հոգանոց ավագանիում ստացել է 10 մանդատ։ Կուսակցությունն իր 10 ներկայացուցիչներով, առանց մյուս քաղաքական ուժերի, նիստ էր արել և ընտրել համայնքապետ։ «Դավիթ Մինասյան» դաշինքն էլ ՔՊ-ի հետ առանձին այլ նիստ էր արել և ավագանու 11 ձայնով համայնքապետ ընտրել Դավիթ Մինասյանին։

Կողմերն այդպես էլ համաձայնության չէին եկել։ Հաջորդ օրը Վալոդյա Գրիգորյանը գնացել էր համայնքապետարան՝ որպես «ընտրված» համայնքապետ, սակայն ոստիկանությունը նրան թույլ չէր տվել մտնել շենք։ Բանն այն էր, որ գործը հասել էր դատարան. «Դավիթ Մինասյան» դաշինքը և «Քաղաքացիական պայմանագիր»-ը հայցադիմում էին ներկայացրել՝ Փարաքար համայնքի ղեկավարի ընտրության արդյունքներն անվավեր ճանաչելու պահանջով։ Դատարանը դեկտեմբերի 30-ին նրանց հայցը բավարարել էր։