Իսկապե՞ս մտահոգություն կենդանիների համար, թե՞ նպաստավոր հանգամանք՝ կոնկրետ անձանց թիրախավորելու

Այն, որ թափառող կենդանիների խնդիրը Հայաստանում, մասնավորապես՝ մարզերում օր առաջ ողջամիտ լուծման կարիք ունի, իսկապես այդպես է: Սակայն այն, որ կարող է անգամ այս հարցը քաղաքական երանգ ստանալ, ուրեմն «կենդանիներն իրոք մտահոգվելու պատճառ ունեն»:

Վերջին շրջանում թափառող շների հետ կապված խնդիրն ավելի ակտուալ է դարձել, քանի որ մամուլում և սոցիալական ցանցերում պարբերաբար լուրեր են տարածվում թափառող կենդանիների՝ մարդկանց նկատմամբ դրսևորած ագրեսիվ վարքագծի, խմբովին հարձակումների և նմանօրինակ այլ դեպքերի մասին: Ոչ երևանաբնակները կփաստեն, որ վերջին ամիսներին մարզերում թափառող կենդանիների զգալի աճ է նկատվել, որոնք շրջում են խմբերով:

Թեմայի վերաբերյալ խոսակցություններն է՛լ ավելի սկսվեցին սրվել, երբ շաբաթներ առաջ Շիրակի մարզպետարանում՝ մարզպետի և համայնքապետերի հանդիպման ժամանակ ևս անդրադարձ էր եղել թափառող կենդանիների խնդրին: Խորհրդակցության ժամանակ Նազելի Բաղդասարյանը, շեշտելով, որ բոլոր համայնքներում կա խնդիրը, և հարցն իսկապես շուտափույթ լուծման կարիք ունի, նշել էր, որ որպես այլընտրանքային տարբերակ էլ խորհուրդ է տվել՝ եթե քաղաքացիները կողմ են, ստորագրահավաք կազմակերպեն և դիմեն օրենքի չեղարկման մեխանիզմին:

Ըստ էության՝ Բաղդասարյանը նկատի էր ունեցել այն, որ եթե խոսքը քաղաքացիների կյանքին և անվտանգությանն է վերաբերում, ապա պետք է հնարավոր բոլոր միջոցները գործադրել՝ մարդկանց անվտանգ տեղաշարժն ապահովելու համար, ինչը փաստել էր նաև ինքը մարզպետը դրանից հետո տված հարցազրույցներում: Նկատենք, որ խորհրդակցությունից օրեր հետո էլ Գյումրիում հերթական դեպքն էր արձանագրվել, երբ շների ոհմակը հարձակվել էր երիտասարդ աղջկա վրա, և տեղի բնակիչները դժվարությամբ փրկել էին նրան կատաղած ոհմակի ճիրաններից:

Այս ամենին հաջորդեց է՛լ ավելի զարհուրելի մի դեպք, երբ համացանցում հայտնվեցին շների կրակված, մասնատված սատկած և կիսասատկած մարմինների լուսանկարներ: Ավելի ուշ պարզ դարձավ, որ դեպքը տեղի էր ունեցել Գյումրիում: Անմիջապես տարբեր լրատվամիջոցներ և օգտատերեր կատարվածում սկսեցին մեղադրել Շիրակի մարզպետին՝ շեշտելով օրեր առաջ նրա արած հայտարարությունները թափառող շների վերաբերյալ: Բանն անգամ հասավ նրան, որ շատերը վստահորեն պնդում էին, թե անձամբ մարզպետի հրահանգն է:

Եվ եթե սկզբում թվում էր, թե տեղին էին զայրույթն ու պոռթկումը, որովհետև յուրաքանչյուր առողջ դատողություն ունեցող անձի համար դատապարտելի է կենդանիների հանդեպ նման վերաբերմունքը, ապա հետզհետե պարզ էր դառնում, որ որոշ «կենդանասերների» պահանջն ամենևին էլ կենդանիների հանդեպ դաժան վերաբերմունք ցույց տված անձին բացահայտելը չէր, այլ մտացածին կոնկրետ անձանց թիրախ դարձնելը: Եվ այս ամենը չնայած նրան, որ դեռ ոստիկանությունը պաշտոնապես չի հայտնել, թե ինչի՞ հետևանքով են շների մարմինները մասնատվել: Արդյոք դրանք մարդկայի՞ն գործոնով են պայմանավորված, թե՞ հենց կենդանիներն են հոշոտել միմյանց:

«Կենդանասերների» աղմուկ-աղաղակի վերջին արարն էլ երեկ էր Գյումրու կենտրոնում, երբ հատուկ վարժեցված շների պարանոցներից կապել էին գրություններ՝ այդպիսով բողոքի ակցիա իրականացնելով «ի պաշտպանություն կենդանիների»: Ուշագրավ է այն, որ շների պարանոցներից կախված գրությունները ոչ թե հայատառ էին, այլ ռուսերեն. “Гюмри не убивайте нас’’.

Ի՞նչ էին ուզում սրանով ասել ակցիայի կազմակերպիչները: Եթե պահանջն ուղղված էր Շիրակի մարզի իշխանության ներկայացուցիչներին, այդ դեպքում ինչո՞ւ էին նրանց ռուսերեն կոչերով դիմում: Որքանով հայտնի է, մարզի իշխանության ներկայացուցիչներից ոչ մեկն այլազգի չէ: Իսկ եթե նրանց չէր ուղղված պահանջը, ապա ի՞նչ է նշանակում, որ «կենդանասերները» աշխարհի ուշադրությո՞ւնն են հրավիրում Գյումրու կողմը, թե իբր «Գյումրին կենդանասպան համայնք է»: Եթե սա է եղել նպատակը, ապա այստեղ «էլ ավելի է բարդանում իրավիճակը»: Ստացվում է, որ ակցիայի կազմակերպիչները գիտակցված կամ ոչ վարկաբեկում են մի ամբողջ համայնք և նրա բնակչությանը: Ի դեպ, երեկվանից Շիրակի մարզում բնակվող օգտատերերից շատերը նույնպես սոցիալական ցանցերում իրենց զայրույթն են արտահայտում տեղի ունեցած ակցիայի համար:

Այսպիսով՝ թե ինչո՞ւ և ինչպե՞ս են Գյումրու կենտրոնում դաժանաբար սպանվել շները, այս պահին դեռ պարզ չէ: Սակայն կարծես մի բան ակնհայտ է՝ որոշ շրջանակների համար «նպաստավոր հանգամանք է ստեղծվել»՝ թիրախավորելու և վարկաբեկելու կոնկրետ անձանց: