Համերգների և միջոցառումների չեղարկումներ. մշակութային գործիչների քայլերը՝ ընդդեմ ռազմական գործողությունների

ՌԴ-ի եւ Ուկրաինայի միջեւ տեղի ունեցող ռազմական գործողություններին ու դեռեւս չհանգուցալուծվող հակամարտությանն են անդրադառնում աշխարհի տարբեր երկրների ներկայացուցիչներ: Պատերազմական գործողությունները դադարեցնելու կոչ- հայտարարություններ են հնչեցվում ինչպես պետական մակարդակով, այնպես էլ համաշխարհային ճանաչում ունեցող աստղերն ու մշակութային գործիչներն են նման հորդորներով հանդես գալիս:

Հատկանշական է, որ Ուկրաինայում ռազմական գործողությունների պատճառով նաեւ Ռուսաստանի Դաշնությունում գործող շոու բիզնեսի աստղերից ու մշակութային գործիչներ ոմանք են այս օրերին չեղարկել իրենց հումորային եւ համերգային ելույթները, տարբեր մշակութային միջոցառումները:

Մասնավորապես՝ հայտնի Green Day ռոք խումբը չեղարկել է համերգը Մոսկվայում, այն նախատեսված էր մայիսի 29-ին։ Ամերիկյան թիմը պետք է ելույթ ունենար մայրաքաղաքի «Սպարտակ» մարզադաշտում, որտեղ մինչեւ 45 հազար հանդիսատես կարող է տեղավորվել: Սակայն կատարվող իրադարձությունների պատճառով խումբը Ռուսաստանին դուրս է թողել համաշխարհային իր շրջագայությունից։

Երգչուհի Աննա Սեդոկովան էլ չեղարկել է նոր երգի ու տեսահոլովակի պրեմիերան: «Տեսահոլովակի պրեմիերան վաղը չի լինի: Ներեցեք»,- «Ինստագրամի» իր էջում գրել է երգչուհին:

Ելույթը հետաձգել է նաեւ ռուսական ստենդափի աստղ Ռուսլան Բելին: Այն պետք է տեղի ունենար Կիեւում փետրվարի 27-ին, սակայն կայքում տեղեկություն է հայտնվել, որ համերգը չեղարկվել է ընթացիկ իրադարձությունների պատճառով:

Հայտնի երգչուհի Զեմֆիրան չի չեղարկել վերջին հինգ տարվա ընթացքում իր առաջին մենահամերգը Մոսկվայում։ Սակայն նա համերգի ժամանակ կատարել է «Մի կրակիր» երգը։

Հայազգի հումորիստ, պրոդյուսեր Գարիկ Մարտիրոսյանն էլ օրեր առաջ հայտարարել էր, որ չեղարկել է ՌԴ-ի Սանկտ Պետերբուրգ քաղաքում սպասվելիք իր ելույթը: Այն ծրագրված էր անցկացնել փետրվարի 25-ին։ Մարտիրոսյանն ինստագրամյան էջում երկրպագուներին պարզաբանել է, որ ստեղծված իրադրությունում ճիշտ չի համարում կատակելը՝ նկատի ունենալով Ուկրաինայում տեղի ունեցող իրադարձությունները: «Ցավոք սրտի, իմ ելույթը, որը ծրագրված էր փետրվարի 26-ին Պետերբուրգում, մեր որոշմամբ կհետաձգվի։ Մեծ ելույթ էի պատրաստել, դեռ երեկ էի Պետերբուրգ մեկնել, սակայն մենք տեղի ունեցող իրադարձությունների պատճառով որոշել ենք հետաձգել այն։ Հումորի ժամանակը չէ։ Ելույթս հետաձգվել է մինչեւ ապրիլի 21-ը»,- պարզաբանել է Մարտիրոսյանը:

Երգչուհի Լյուբով Ուսպենսկայան, որը ծնվել է Կիեւում, ինստագրամյան իր էջում շուտափույթ խաղաղության հույս է հայտնել՝ չեղարկելով իր ծննդյան տոնը Մոսկվայում։ Հայտնի է, որ տոնակատարությանը հրավիրված են եղել շոու բիզնեսի բազմաթիվ աստղեր, Ուսպենսկայան ներողություն է հայցել եւ խնդրել ըմբռնումով մոտենալ:

Աշխարհահռչակ խորեոգրաֆ Ալեքսեյ Ռոտմանսկին հրաժարվել է բեմադրել «Искусство фуги» բալետը՝ ըստ Բախի համանուն երաժշտության: Պրեմիերան պետք է կայանար մարտի 30-ին Մոսկվայի Մեծ թատրոնում: Բալետային ներկայացումը համարվում էր Մեծ թատրոնի նոր թատերաշրջանի կարեւոր ձեռքբերումներից մեկը։ Ռոտմանսկին, ի նշան անհամաձայնության Ուկրաինայում տեղի ունեցող իրադարձությունների, նաեւ լքել է Մոսկվան:

Համաշխարհային միջոցառումներ ու ցուցադրություններ.

Միլանում «Giorgio Armani»-ի «Միլանի նորաձեւության շաբաթ 2022-2023 թթ.» աշուն-ձմեռ հավաքածուի ցուցադրման ժամանակ էլ երաժշտություն չի հնչել. ցուցադրությունը ուղեկցվել է միայն ծափահարություններով:

Միջազգային միջոցառումներից Ռուսաստանին արգելել են մասնակցել «Եվրատեսիլ»-ին: Այս մասին հայտարարել են մրցույթի կազմակերպիչները: Եվրոպական հեռարձակողների միությունը (EBU) հայտարարել է, որ այս տարի ոչ մի ռուս արտիստ չի մասնակցի «Եվրատեսիլ» երգի մրցույթին։ EBU-ի գործադիր խորհուրդը որոշում է ընդունել՝ համաձայն «Եվրատեսիլ» երգի մրցույթի ղեկավար մարմնի՝ միջոցառման կանոնների եւ EBU-ի արժեքների հիման վրա գործող տեղեկատու խմբի: Ավելի վաղ մի քանի երկրներ, այդ թվում՝ Ուկրաինան, դիմել էին Եվրոպական հեռարձակողների միությանը Ռուսաստանին հեռացնելու խնդրանքով։ Ֆինլանդիան վերջնագիր էր ներկայացրել, որ իրենք չեն մասնակցի մրցույթի, եթե այնտեղ ելույթ ունենա ռուս արտիստը:

Ռուսաստանը «Եվրատեսիլ 2022»-ում պետք է ներկայացներ կույր երգչուհի Յարոսլավ Սիմոնովան:

Ամերիկյան «Մետրոպոլիտեն» օպերային թատրոնի ռեժիսոր Փիթեր Գելբն էլ The New York Times-ին տված հարցազրույցում ասել է, որ «Մետրոպոլիտեն»-ը կդադարեցնի համագործակցությունը Վլադիմիր Պուտինին սատարող ռուս արտիստների հետ։