Վտանգի տակ են ևս մեկ ուկրաինական օդանավակայան ու ռազմակայան, կալանվելու վտանգի առաջ՝ ռուսական ինքնաթիռները

ՌԴ պաշտպանության նախարարությունն այսօր առավոտյան իր ճեպազրույցի ժամանակ հայտարարել է ուկրաինական Սու-24-ի և երկու անօդաչու թռչող սարքի խոցման մասին։

Ռուսական ավիացիան և հակաօդային պաշտպանությունը Լյուբիմովկայի շրջանում խոցել են ուկրաինական ռազմաօդային ուժերի Սու-24 ինքնաթիռ և երկու անօդաչու թռչող սարք, հայտնել է ռազմական գերատեսչության պաշտոնական ներկայացուցիչ Իգոր Կոնաշենկովը։

Պաշտպանության նախարարությունը չի հայտնում Լվովի մերձակայքում գտնվող զորավարժարանին հարվածի մասին, ինչպես ավելի վաղ հաղորդվել էր:

Պաշտպանության նախարարությունը պնդում է, որ փետրվարի 24-ից մինչ օրս շարքից հանվել են 3687 ուկրաինական ռազմական օբյեկտներ։

Ռուս զինվորականները նաև պնդում են, որ արգելափակում են Ուկրաինայի Սեվերոդոնեցկ քաղաքի արևելյան և հարավային հատվածները։

Եվս մեկ օդանավակայան ու ռազմակայան՝ վտանգի տակ

Իվանո-Ֆրանկովսկի քաղաքապետ Ռուսլան Մարցինկովը հայտնել է քաղաքի օդանավակայանի վրա ենթադրյալ հրթիռային հարձակման մասին:

Նա հայտարարել է, որ երրորդ հարվածն է հասցվե օդանավակայանին։ Ուկրաինայի իշխանությունները փետրվարի 24-ին էին հայտնել Իվանո-Ֆանկիվսկի օդանավակայանի առաջին հարվածի մասին։

Ռուսաստանի պաշտպանության նախարարությունը դեռ չի մեկնաբանել այս պնդումը։ 

Ավելի վաղ Լվովի մարզի իշխանությունները հայտարարել էին Լվովից 30 կիլոմետր հեռավորության վրա գտնվող Յավորովի զորավարժարանին օդային հարված հասցնելու մասին։ Reuters-ը դա անվանել է «ամենաարևմտյան հարձակում»: Շատ ուկրաինացիներ տարհանվել են երկրի արևմուտք, այնտեղից տեղափոխվում են Լեհաստան՝ ապաստան գտնելու համար։

Լվովի շրջանային ռազմական վարչությունը հայտնում է, որ Խաղաղության և անվտանգության միջազգային կենտրոնը տեղակայված է Յավորովի ուսումնավարժարանում, որը, ըստ նրա, հրթիռակոծվել է։ Այն ստեղծվել է 2007 թվականին՝ Ուկրաինայի զինված ուժերի անձնակազմի պատրաստման համար, այդ թվում՝ խաղաղապահ առաքելությունների։ Կենտրոնը գտնվում է Լեհաստանի հետ սահմանից 25 կիլոմետր հեռավորության վրա։

Փոխզիջմա՞ն են հասնում

Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը «Կոմերսանտ»-ին տված հարցազրույցում ասել է, որ Ռուսաստանն ու Ուկրաինան, իր կարծիքով, բանակցային գործընթացում փոխզիջման են մոտենում։ Բացի այդ, նա կարծում է, որ Ռուսաստանի և Ուկրաինայի նախագահների հանդիպումը կարող է կայանալ, երբ բոլոր ընթացակարգային հարցերը կարգավորվեն, և պատվիրակությունները ավարտեն իրենց աշխատանքը։

«Եվս մեկ անգամ շեշտեք՝ ռուսական կողմն արդեն շատ ավելի ադեկվատ է նայում իրավիճակին, բայց դեռ որոշ ժամանակ պետք է անցնի, որպեսզի նրանք 100%-ով հասկանան այն իրավիճակը, որում հայտնվել է Ռուսաստանը, ոչ թե Ուկրաինան»,- ասել է Պոդոլյակը։

Ըստ նրա՝ պատվիրակությունները մշտական տեսահանդիպումներ են անցկացնում. նախօրեին այս ձևաչափը հաստատել է Կրեմլի խոսնակ Դմիտրի Պեսկովը, իսկ Պոդոլյակն ասել է, որ ստեղծվել են աշխատանքային ենթախմբեր։

Նրա խոսքով՝ կողմերը քննարկում են հրադադարի պայմանները, Ուկրաինայի ավերված ենթակառուցվածքին հասցված վնասի փոխհատուցման հարցը, երկրի տարածքից ռուսական զորքերի դուրսբերման գործընթացը և խաղաղ համաձայնագրի պայմանները, գրում է «Կոմերսանտը»։

Ռուսական ինքնաթիռները կալանվելու վտանգի առաջ են

Մարտի 13-ից ռուսական ավիաընկերությունների շատ ինքնաթիռներ կարող են ձերբակալվել արտասահմանում, զգուշացնում է Ռուսաստանի տուրօպերատորների ասոցիացիան (ATOR):

Բերմուդյան կղզիների ավիացիոն իշխանությունները մարտի 12-ի ժամը 23.59-ից կչեղարկեն ռուսական ավիաընկերությունների նավատորմի բոլոր ինքնաթիռների թռիչքի վկայականները, որոնք գրանցված են Բերմուդիայում: 

«Սա նշանակում է, որ նման ռուսական ինքնաթիռներին, որոնք այս ամսաթվից հետո գտնվում են օտարերկրյա օդանավակայաններում, կարող են թույլ չտալ թռիչքներ կատարել դեպի Ռուսաստան»,- մեկնաբանում է ATOR-ը։

Բերմուդյան կղզիներում գրանցված է ռուսական փոխադրողների 745 ինքնաթիռ, գրում է Интерфакс-ը։ Ռուսաստանի տրանսպորտի նախարարությունը հայտնել է, որ երկրում շահագործվել է 1367 ինքնաթիռ։

«Ավիացիոն ոլորտի դեմ միջազգային պատժամիջոցները զգալի ազդեցություն են ունեցել ռուսական ավիաընկերությունների ինքնաթիռների անվտանգությունը վերահսկելու ունակության վրա»,- բացատրել է Բերմուդյան Քաղաքացիական ավիացիայի վարչությունը՝ նշելով, որ վարչությունը «չի կարող վստահորեն պնդել, որ Բերմուդյան կղզիների գրանցում ունեցող ռուսական ավիաընկերությունների ինքնաթիռները թռիչքի պիտանի են» և հետևաբար ժամանակավորապես դադարեցնում է օդանավերի թռիչքային պիտանիության բոլոր վկայագրերը՝ դրանց գրանցմամբ ռուսական ավիաընկերությունների նավատորմում:

Թռիչքային պիտանիության վկայականի չեղարկումը ուժի մեջ է մտել օդում գտնվող ցանկացած ինքնաթիռի համար 2022 թվականի մարտի 12-ին՝ տեղական ժամանակով ժամը 23:59-ից սկսած՝ վայրէջքից անմիջապես հետո:

Հիշեցնենք՝ փետրվարի 26-ին ԵՄ-ն պատժամիջոցներ սահմանեց՝ արգելելով Ռուսաստանում ինքնաթիռների մատակարարումը, վաճառքը, լիզինգը, սպասարկումը և ապահովագրումը։