Գյումրիում շատ ավելի պատասխանատու ես զգում քո խոսքի, քո գործի համար. ՀՀ նախագահն այցելել է ՀՊՏՀ Գյումրու մասնաճյուղ

#արի ժող. այս հեշթեգը Հայաստանի պետական տնտեսագիտական համալսարանի (ՀՊՏՀ) Գյումրու մասնաճյուղի շենքի ճակատային հատվածում հայտնվեց նոր տնօրեն Կարեն Պետրոսյանի հետ միաժամանակ: Համալսարանն այժմ այլ կերպ է անվանվում, սակայն գյումրեցու համար այն դեռ հայտնի ժողն է՝ ժողինստիտուտը:

Այսօր այն հանրապետությունում խիստ մրցունակ է դարձել. գնահատականը Գյումրի այցելած և համալսարանում հյուրընկալված ՀՀ նախագահ Վահագն Խաչատուրյանինն է:

Նախագահը տեսածից հաճելիորեն զարմացած է, չի թաքցնում, խոստովանում է, որ Կարեն Պետրոսյանը գերազանցել է իր սպասելիքները:

«Ես չէի կասկածում, որ բոլորիս մի մեծ անակնկալ է սպասվում։ Ստեղծվել է մի միջավայր, որտեղ և՛ դասախոսները, և՛ ուսանողները իսկապես լիարժեք հնարավորություն ունեն կրթություն ստանալու։ Կարելի է ասել, որ այսօր Գյումրու և Երևանի համանուն մասնաճյուղերի միջև մրցակցություն է ձևավորվում։ Բոլորս շատ ենք խոսում կրթության կարևորության մասին, սակայն ամենակարևորն է, որ այն լինի նորարար, և այն, ինչ մենք այսօր տեսնում ենք այստեղ, նորարարական սկզբունքներով է ստեղծված»,- համալսարանում շրջելուց և երեք շատ կարևոր լսարանների կարմիր ժապավենները կտրելուց հետո ասում է նախագահը:

Նորաբաց ստեղծարարության և նորարարության, դասախոսների համաշխատանքի և հեռավար կրթության լսարանները ձևավորվել են տեխնոլոգիական նոր լուծումներով: Նպատակը մեկն է՝ անել ամեն ինչ, որ կրթություն ստանալն առավել հաճելի դառնա, գեներացվեն ուսանողների ստեղծարար գաղափարները, ստարտափ թիմեր ձևավորվեն համատեղ աշխատանքի և դրանք կյանքի կոչելու միջոցով:

«Այս մասնաճյուղը, որ ստեղծվել է, առաջնային նպատակը միայն եղել է կրթություն տալը: Եվ երբ ես տարիներ առաջ դասախոսում էի համալսարանում, միշտ ինձ մոտ հարց էր առաջանում, թե ինչո՞ւ են գյումրեցի ուսանողներն առանձնանում, ի՞նչ տարբերություն կա Երևանում կամ այլ բնակավայրերում դասավանդելու և Գյումրիում դասավանդելու մեջ: Ասեմ, որ Գյումրիում շատ ավելի պատասխանատու ես զգում քո խոսքի համար, այստեղ ուսանողները միայն չեն նստում ու լսում ասածդ, Գյումրիում ընկալում են, հասկանում: Այժմյան տնօրենի հետ հենց ուսանողների հետ հանդիպումներում էլ ծանոթացել եմ, գյումրեցի ուսանողներն ուրիշ են, և ես միշտ գնահատում եմ դիմացինի ազատությունը»,- անկեղծանում է Վահագն Խաչատուրյանը:

«120 կմ-ը այսքան մոտ և այսքան հեռու՝ 25 տարվա դիտակետից» խորագրով համաժողովին ողջույնի խոսքով հանդես գալիս նախագահն ասում է՝ որպես Հայաստանի պետական տնտեսագիտական համալսարանի խորհրդի նախագահ՝ իր համար շատ կարևոր էր ներկա գտնվել համալսարանի համար նշանակալի այս միջոցառմանը։ Վերջինս նաև ընդգծում է, որ Հայաստանի Հանրապետության զարգացման համար այլ ճանապարհ չկա, քան կրթություն ստանալն ու գիտություն զարգացնելն է։

«Մենք նավթ, գազ չենք ունենալու և պետք է կարողանանք Աստծու տված շնորհքը, որը կրթվելն ու գիտության մեջ մեր ներդրումն ունենալն է, մեր նախաձեռնությամբ հանդես գալն է, լիարժեք օգտագործենք։ Այս առումով խնդրում եմ բոլոր այն մարդկանց, ովքեր պատասխանատու են կրթության ապահովման համար, իրենց ուժն ու եռանդը չխնայեն՝ երիտասարդ սերնդին բարձրորակ կրթություն տալու համար։ Այն, ինչ կախված է պետությունից, Կառավարությունից, հավատացե՛ք, ամեն ինչ արվել է և արվելու է։ Շատ բաներ կախված են նաև ձեր նախաձեռնություններից։ Մեր երկրում ցանկացած ծրագիր, ցանկացած նախաձեռնություն հնարավորություն ունի իրականություն դառնալ գիտության, արտադրության, յուրաքանչյուր բնագավառում»,- վստահեցնում է Վահագն Խաչատուրյանը:

Գյումրի կատարած այցից նախագահը տպավորված էր, «Հայկական ժամանակ»-ի հետ զրույցում նշում է՝ բարձր տրամադրությամբ է այստեղ գտնվում:

Որո՞նք են այն առաջնահերթ ծրագրերը, որոնք կյանքի են կոչվելու առաջիկայում: Վահագն Խաչատուրյանն ասում է՝ հարցին դեռևս չի կարող պատասխանել, քանի որ համալսարանի այցից հետո Շիրակի մարզպետարանում են դրանք քննարկելու:

«Համենայն դեպս Գյումրին իր պրոբլեմներով ու լավ կողմերով մեր առաջնահերթություններից է, բոլոր տեղերում կա»,- շեշտում է նա:

Սամսոն Մատինյան