Չպիտի մոռանանք՝ ընդդիմության որոշ անդամներ հեղաշրջման մեկ փորձի մասնակցել են, ուժայինները պետք է զգոն լինեն. պատգամավոր

Հաշվի առնելով ընդդիմադիր ցուցարարների բազմաթիվ սադրանքները՝ մաղձի ու ատելության մթնոլորտի ստեղծումը, որը տիրում է նրանց շարքերում, ապա միանշանակ կարող ենք ասել, որ ոստիկանությունն իր աշխատանքը այս օրերին շատ բարձր է կատարում:

«Հայկական ժամանակ»-ի հետ զրույցում անդրադառնալով ՀՀ ոստիկանության համակարգի գործելաոճին՝ այսպիսի գնահատական է տալիս ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանը:

Վերջինիս խոսքով՝ ոստիկանությունը ջանք է գործադրում, որ իրավիճակը անհարկի չլարվի, ինչպես նաև՝ ընդդիմությունը չդիմի սանձարձակությունների:

Նկատառմանը, որ ինքը գրառում էր արել, որտեղ նշել էր՝ «սա քաղաքական շարժում չէ, այլ բանդա է, և այդ բանդայի՝ Գյումրիում պապիկներին ծեծած բանդիտ-անդամները պիտի վայրկյան առաջ պառկեցվեն ասֆալտին»։ Հարցադրմանը՝ ոստիկանությունից է՞լ ավելի բիրտ գործողություններ է ակնկալում, Ալեքսանյանը պարզաբանում է՝ ասֆալտին պառկեցնելը որպես թևավոր խոսք է գործածել. «Նկատի ունեմ, որ ոստիկանությունը պետք է գործի օրենքի և իրավունքի դաշտում: Եթե մեկը որևէ անօրինական արարք է կատարել, պետք է պատասխանատվության ենթարկվի»:

Անդրադառնալով ընդդիմադիրների պնդումներին, թե Գյումրիում տեղի ունեցած միջադեպը իշխանության հրահրած սադրանքն է՝ պատգամավորն աբսուրդ է համարում դա:

«Պապիկներից մեկը իր շենքի առաջ է կանգնած եղել: Մյուս պապիկներն էլ հեռու տեղերից չեն եղել, բնակվել են այդ հատվածին մոտ: Իշխանությունը բերել էր այդ պապիկներին այդտեղ կանգնեցրե՞լ էր, որ սադրանք անեի՞ն: Դա աբսուրդ է: Նրանք գնացել, շենքի դիմաց կանգնած պապիկին ծեծել են, հետո էլ ասում են՝ սադրիչներ էին: Դե, կներեք, էլի»,- ասում է նա:

Դիտարկմանը, որ հեղափոխությունից հետո բազմաթիվ անձանց նկատմամբ քրեական գործեր են հարուցվել, վերջիններս կալանավորվել են, սակայն որոշ ժամանակ հետո՝ ազատ արձակվել, հարցադրմանը՝ հնարավո՞ր է՝ այս անձանց դեպքում էլ այդպես լինի, պատգամավորն ընդգծում է՝ ընդամենը փոխվել են այդ անձանց խափանման միջոցները:

««Ազատ են արձակվել» արտահայտությունից գալիս է ամենամեծ սխալը: Ընդդիմությունն էլ է այդպես հայտարարում, թե ազատ են արձակվել, ինչի միջոցով փորձում են ցույց տալ, թե երկրում անպատժելիության մթնոլորտ է: Սակայն այդ անձինք ազատության մեջ են որոշակի սահմանափակումներով՝ մինչև դատարանի վճիռը: Իսկ ազատ արձակել նշանակում է դատարանի վճիռը, որտեղ իրենք անմեղ են ճանաչվել»,- ընդգծում է բանախոսը:

Վահագն Ալեքսանյանի խոսքով՝ ընդդիմադիրներն իրենց ուժը գերագնահատում են, քանի որ ԱԺ ընդդիմադիր փոխխոսնակ Իշխան Սաղաթելյանը նախօրեին հայտարարել էր, թե երեկ մայրաքաղաքը պետք է կանգներ, սակայն, ինչպես տեսանք, դա տեղի չունեցավ:

«Ինչ-որ մեկը երեկ մտածե՞լ է, որ մայրաքաղաքը կանգնած է: Կարծում եմ՝ նման մարդ չի եղել: «Հայաստան» խմբակցության պատգամավոր Վահե Հակոբյանը փողոցի բանուկ հատվածում երեկ կանգնել ու ասում էր, թե Երևանի երթևեկությունը կաթվածահար է եղել, այն դեպքում, երբ իր թիկունքում մեքենաները հանգիստ երթևեկում էին: Իշխան Սաղաթելյանը բազմիցս հայտարարել է, թե երկիրը պարալիզացվել է, պետական կառույցների աշխատանքներն են պարալիզացնելու, սակայն դրանցից ոչ մեկի ականատեսը դեռ չենք եղել: 2500 հոգով այդ ամենը իրականացնել անհնար է»,- ասում է պատգամավորը:

Հարցադրմանը՝ հեղաշրջման փորձ կամ դրա իրագործման հնարավորություն տեսնո՞ւմ է, վերջինս ասում է՝ փորձ մինչև այս պահը չի եղել, սակայն չպետք է մոռանանք, որ այս ընդդիմության որոշ ներկայացուցիչներ առնվազն մեկ հեղաշրջման փորձի մասնակցել են. «2008 թվականի մարտի 1-ին էլ գնացել են խաղաղ ցուցարարների գնդակահարման: Եվ, այո՛, ուժային կառույցները պետք է զգոն լինեն»:

Դիտարկմանը, որ ընդդիմությունը նախորդ տարվա դեկտեմբերին էլ փողոցային գործողություններ ձեռնարկեց, սակայն դրանք ավելի կարճ տևեցին, քան այս անգամ: Կարո՞ղ ենք եզրակացնել, որ այս անգամ ավելի վճռական են տրամադրված, Ալեքսանյանը հակադարձում է՝ ընդամենը մի քանի շաբաթ է, ինչ ընդդիմադիրները դրսում են:

«Անցած տարի, երբ Բաղրամյան պողոտայում էին վրաններ տեղադրել, ակցիաները վերջացան, երբ ընդդիմությունը որոշեց գնալ արտահերթ խորհրդարանական ընտրությունների: Դա էր նրանց կուլմինացիան, և փողոցում իրեն սպառած շարժումը այդպիսով երես ունեցավ ասելու, թե գնում են ընտրությունների, դրա համար էլ դադարեցնում են ակցիաները: Այս անգամ արտահերթ ընտրությունների մասին էլ չեն խոսում, որովհետև հասկացել են՝ արդար ընտրություններով իրենք երբեք իշխանության չեն գա»,- ասում է նա:

Պատգամավորը ուշադրություն է հրավիրում այն հանգամանքին, որ «Հայաստան» և «Պատիվ ունեմ» խմբակցությունները միասին մոտ 300 հազար ձայն են հավաքել այս ընտրություններում, սակայն հատկանշական է, որ ակցիաներին մասնակցում է 2000-3000 մարդ:

«Սա պետք է ցուցիչ լինի, հասկանան, թե ինչ վարկանիշ ունեն իրենց ընտրած քաղաքացիների շրջանում»,- շեշտում է նա:

Անյուտա Աթանեսյան