Ընդդիմությանը առաջարկվել է 6 ամսով երկարաձգել հանձնաժողովի աշխատանքը, առաջարկը ընդունել են, սակայն ԱԺ չեն գալիս. Պապոյան

ՀՀ Ազգային ժողովի իշխող «Քաղաքացիական պայմանագիր» խմբակցության պատգամավոր, Ֆինանսավարկային եւ բյուջետային հարցերի մշտական հանձնաժողովի նախագահ Գևորգ Պապոյանի խոսքով՝ ընդդիմության ներկայացուցիչների պատկերացմամբ՝ «Հայաստան» համահայկական հիմնադրամի գումարները հնարավոր չէ առանց թալանելու ծախսել:

Վերջինս «Հայկական ժամանակ»-ի հետ զրույցում նման տեսակետ հայտնեց՝ անդրադառնալով ԱԺ ընդդիմադիր «Հայաստան» խմբակցության պատգամավոր Արթուր Ղազինյանի «Ֆեյսբուք» սոցիալական ցանցում արած գրառմանը, որտեղ ընդդիմադիր պատգամավորը պնդում է, թե 44-օրյա պատերազմի ժամանակ հիմնադրամից թալանվել է 100 միլիոն դրամ գումար: Ղազինյանի դիտարկմամբ՝ սա Հայաստանի «ամենամեծ ու ապացուցված թալանն է եղել»:

Պապոյանը հիշեցնում է, որ այս հարցը ընդդիմությունը նաև 44-օրյա պատերազմից հետո էր բարձրացրել, և իշխանության ներկայացուցիչներն առաջարկել են ստեղծել «Հայաստան» համահայկական հիմնադրամի հավաքած եւ Հայաստանի Հանրապետության պետական բյուջե փոխանցված միջոցների օգտագործումը ուսումնասիրող քննիչ հանձնաժողով, որում նաև ինքն է ընդգրկված: Հանձնաժողովի ստեղծվելուց 8 ամիս անց, սակայն, որևէ հիմնական փաստարկ չի գտնվել, որը կապացուցի՝ տեղի է ունեցել թալան:

«Հանձնաժողովն իր աշխատանքի ընթացքում «թալանի» ոչ մի փաստ չի արձանագրել, ընդ որում՝ հանձնաժողովի նախագահը Արծվիկ Մինասյանն է: Ընդհակառակը, ապացուցվել է, որ այդ գումարներով սոցիալական աջակցություն են ստացել հազարավոր մարդիկ, ովքեր պատերազմի հետևանքով տուժել են: Այդ գումարներով շտապ օգնության մեքենաներ են գնվել, առողջապահական տեխնիկաներ, դեղեր, ճանապարհներ են կառուցվել, ենթակառուցվածքներ են ստեղծվել: Այսինքն՝ հիմնադրամի գումարները ծախսվել են օրինական»,- մանրամասնում է Պապոյանը:

Ըստ նրա՝ այսօրվա ընդդիմությունը, որ ժամանակին իշխանության է եղել, չի պատկերացնում, որ հիմնադրամի գումարները հնարավոր է առանց թալանելու ծախսել. «Իրենց թվում է, որ բոլորը այդպես են, բայց մոռացել են, որ 2018 թվականին հայ ժողովուրդը թալանչի իշխանություններին քշել է, ու եկել է իշխանություն, որը այդ գումարները չի գողանում և թալանում»:

Վերջինիս համոզմամբ՝ այս ամիսների աշխատանքից հետո ընդդիմության ներկայացուցիչներին առաջարկ է եղել 6 ամսով երկարաձգել հանձնաժողովի գործունեությունը, նրանք առաջարկը ընդունել են, սակայն այդպես էլ խորհրդարան չեն գալիս, որպեսզի քվեարկության միջոցով որոշումը հաստատվի:

«Արդեն երկու ամիս է անցել, իրենք չեն գալիս խորհրդարանի նիստերին, որպեսզի երկարաձգենք գործունեությունը: Սա աբսուրդ է: Նշանակում է՝ իրենք վստահ են, որ թալան չի եղել, ու անիմաստ հարց է, այսինքն՝ պոպուլիստական հայտարարություն են արել և որի տակից հիմա չեն կարողանում դուրս գալ ու փորձելու են ինչ-որ եղանակով ժամանակ գտնել՝ հարցը իրենց տրամաբանությամբ փակելու համար»,- կարծում է Գևորգ Պապոյանը:

Պատգամավորի խոսքով՝ եթե ընդդիմության ներկայացուցիչները վստահ են, որ հիմնադրամից 100 միլիոն դրամ է թալանվել, ապա պետք է նրանք հստակ փաստարկներ բերեն, որը այդ հայտարարությունները կարդարացնի: Հակառակ դեպքում ընդդիմադիր պատգամավորներին պետք է հիշեցնել. «Դուք ԱԺ պատգամավորներ եք, պատգամավորները վրաններում չեն լինում՝ այնտեղ կատարվող հայտնի գործընթացներին մասնակից լինելու համար»:

Պապոյանը նաև պարզաբանում է, որ հանձնաժողովի աշխատանքները երկարաձգելու համար տրամադրված 6 ամսվա ընթացքում, եթե ընդդիմությունը այդպես էլ չներկայանա Ազգային ժողով և չմասնակցի երկարաձգելու քվեարկությանը, ապա ժամկետը լրանալուն պես կարձանագրվի, որ հիմնադրամից պետական բյուջե փոխարինված գումարները ծախսվել են Արցախի և Հայաստանի օրինականության սահմաններում:

«Հիմնականում նման հայտարարություններից հետո ընդդիմության ներկայացուցիչները զղջում են, որ այդպիսի հայտարարություններ են արել: Դա իրենց գործն է: Մենք մեր աշխատանքները կատարում ենք: Օրինակ՝ այսօր Ֆինանսավարկային ու բյուջետային հանձնաժողովում Կենտրոնական բանկի զեկույցներն էի լսում: Տարբեր հարցեր ենք բարձրացրել: Լավ կլիներ, որ իրենք էլ գային, մի առաջարկ, մի հարց ներկայացնեին: Ի վերջո, աշխատավարձ են ստանում»,- ընդգծում է նա:

Նման հայտարարություններով, ըստ Պապոյանի, ընդդիմադիրները նպատակ ունեն անվանարկել իշխանությանը: Վերջինս, սակայն, շեշտում է՝ դրանք անարդյունք են, իսկ պետությունը և հանրությունը շարունակում են ապրել բնականոն հունով:

«Ընդդիմության անունը հոմանիշ է թալանի հետ: Մեր ժողովուրդը և՛ 2018-ին, և՛ 2021-ին իր գնահատականը տվել է այս ընդդիմությանը: Այս օրերին էլ նրանք ստացել են իրենց համապատասխան հարվածը, երբ որ հուժկու հանրահավաքի մասին են հայտարարում, սակայն 3000 հոգի է հավաքվում, որոնց առջև նման որակի ու մակարդակի ելույթներ են տեղի ունենում: Հայտարարում են, թե՝ սա «Ղարաբաղյան 2-րդ շարժումն է», ինչը վիրավորանք է հայ ժողովրդի նկատմամբ: Այն ժամանակ հարյուր հազարավոր մարդիկ են դուրս եկել պայքարի, հիմա 2000-3000 հոգանոց հավաքը համեմատում են այդ շարժման հետ»,- նկատում է զրուցակիցը:

Մերի Խաչատրյան