Փարիզի քաղաքապետն այցելել է ՀԲԸՄ Հայաստանի գրասենյակ՝ վերահաստատելու արդյունավետ համագործակցությունը

2022 թվականի մայիսի 28-ին պաշտոնական այցով Հայաստան ժամանած Փարիզի քաղաքապետ Անն Իդալգոյի գլխավորած պատվիրակությունը հյուրընկալվել է ՀԲԸՄ Հայաստանի կենտրոնատեղիում:

Գրասենյակից հայտնում են, որ պատվիրակության կազմում են եղել միջազգային հարաբերությունների և Ֆրանկոֆոնիայի գծով Փարիզի փոխքաղաքապետ Արնո Նգաչան, Փարիզի փոխքաղաքապետ և ՀԲԸՄ Ֆրանսիայի գործադիր տնօրեն Անուշ Թորանյանը, Ֆրանսիայում Հայաստանի դեսպան տիկին Հասմիկ Տոլմաջյանը, Ֆրանսիայում ԼՂՀ մշտական ներկայացուցիչ Հովհաննես Գևորգյանը, ՀԲԸՄ Եվրոպայի նախագահ և ՀԲԸՄ հոգաբարձուների խորհրդի անդամ Նադիա Գործունյանը, Ֆրանսիայի հայկական կազմակերպությունները համակարգող խորհրդի (CCAF) համանախագահ Արա Թորանյանը և Ֆրանսուա Դևեջյանը։ 

ՀԲԸՄ Հայաստանի նախագահ Վազգեն Յակուբյանը պատվիրակությանը ներկայացրել է ՀԲԸՄ-ի պատմությունը՝ ընդգծելով, որ իր ճկունության շնորհիվ կազմակերպությունը տասնամյակներ շարունակ կարողացել է արժանվույնս գնահատել տվյալ ժամանակաշրջանում հայ ազգի համար կարևոր առաջնահերթություններն ու ծրագրեր մշակել դրանց ուղղությամբ, հատկապես՝ ճգնաժամային ժամանակներում: Այնուհետև անդրադառնալով ՀԲԸՄ Հայաստանի ընթացիկ ռազմավարությանը, պրն Յակուբյանը ներկայացրել է սոցիալ-տնտեսական զարգացման, մարդասիրական օգնության, մշակույթի և կրթության ոլորտներում իրականացվող՝ կազմակերպության բազմաթիվ նախաձեռնությունները։ 

Միության հայաստանյան գրասենյակի նախագահը նաև իր երախտագիտությունն է հայտնել  վերջին տարիներին Ֆրանսիայի կառավարությունից ՀԲԸՄ Հայաստանին տրամադրված ֆինանսական աջակցության համար՝ ընդգծելով դրա կարևորությունը հայության կյանքը բարելավելու գործում։ Առանձնակի անդրադարձ է կատարվել ՀԲԸՄ Հայաստանին 50.000 եվրո ֆինանսական օգնություն տրամադրելուն, որն օգնել է դիմակայել Հայաստանում առողջապահական ճգնաժամին։ Նա նաև ընդգծել է Փարիզի Խորհրդի՝ Արցախի Հանրապետության անկախության ճանաչման բանաձևի օգտին քվեարկելու կարևորությունը, որը նպատակ ուներ Ֆրանսիայի կառավարությունից պահանջել ճանաչել Արցախի անկախությունը։ 

Հաջորդիվ պատվիրակության անդամները հնարավորություն են ունեցել հանդիպելու Արցախից տարհանված, Արցախում ՀԲԸՄ «Սովորի՛ր և վաստակի՛ր» և «Կին ձեռներեցներ» ծրագրերի մի քանի շահառուներին, որոնք աջակցություն են ստացել Ֆրանսիայի կառավարությունից։ 

Ֆրանսիայի կառավարության հետ սերտ համագործակցության արդյունքում ՀԲԸՄ Ֆրանսիան բարերարներից հայրենիք օգնություն հասցնելու գործընթացում կարևորագույն օղակ է։ Ֆրանսիայի արտաքին գործերի նախարարությունից վերջին տարիներին ստացված ավելի քան 100.000 եվրոյի ֆինանսական աջակցությունը Հայաստանում ծառայել է մի շարք նպատակների՝ սկսած COVID-19 համավարակի ընթացքում կենսապահովման սարքավորումներ և պարագաներ ձեռք բերելուց, ՀԲԸՄ «Կին ձեռներեցներ» ծրագրի շահառուներին օժանդակելուց, որպեսզի սկսեն կամ ընդլայնեն իրենց փոքր բիզնեսները մինչև Արցախյան 44-օրյա պատերազմի ընթացքում և դրանից հետո տարհանված խաղաղ բնակիչներին մարդասիրական օգնություն ցուցաբերելը։ 

«Ֆրանսիայի կառավարության հետ մեր համագործակցության և Փարիզի քաղաքապետարանի հետ սերտ կապերի շնորհիվ ՀԲԸՄ Ֆրանսիան կազմակերպության ծրագրերի միջոցով կարողացել է մոբիլիզացնել հարյուրավոր կամավորներ Ֆրանսիայից և համակարգել ավելի քան 250.000 եվրո ֆինանսական օգնություն, որպեսզի աջակցենք 44-օրյա սարսափելի պատերազմի հետևանքով տարհանված ընտանիքներին։ Համոզված ենք, որ ամրապնդելով այդ կապերը՝ ՀԲԸՄ-ն իր ներդրումը կունենա հայ-ֆրանսիական հարաբերություններն ամրապնդելու գործում։ Միությունը Ֆրանսիայի և մասնավորապես Փարիզ քաղաքի անմնացորդ աջակցությունը կօգնի վերածել կոնկրետ գործողությունների՝ սատարելու Հայաստանի և Արցախի ժողովրդին»,- ասել է Նադիա Գործունյանը։

Ֆրանսիան և Հայաստանը պատմական դաշնակիցներ են և կիսում են ընդհանուր գաղափարախոսություն և արժեքներ։ Քաղաքապետ Իդալգոն, 2001 թ-ից նախ պաշտոնավարելով որպես Փարիզի փոխքաղաքապետ, և այնուհետև՝ 2014 թ-ից, որպես Փարիզի քաղաքապետ, շարունակաբար սատարել է արցախահայությանը և ճանաչել նրանց ազգային ինքնորոշման իրավունքը: Նրա ամուսինը՝ Փարիզի շրջանի տարածաշրջանային խորհրդական և խորհրդարանի նախկին անդամ Ժան-Մարկ Ժերմենը, նույնպես երկար տարիներ աջակցել է Արցախի ժողովրդին։ 2020 թ-ի դեկտեմբերին՝ հրադադարից հետո, Արցախ այցելած խորհրդարանականների առաջին պատվիրակության հետ միասին նա մասնակցել է ՀԲԸՄ Եվրոպայի YERIA նախաձեռնությանը։ 

Քաղաքապետ Իդալգոն իր եզրափակիչ խոսքում ևս վստահեցրել է ներկաներին, որ Փարիզ քաղաքը կանգնած է արցախահայության կողքին։ «Չնայած Արցախի Հանրապետությանն իմ աջակցության արդյունքում ես բախվում եմ բազմաթիվ հակագրոհների, ես երբեք այդ գաղափարից ետ չեմ կանգի։ Ես միշտ պայքարելու եմ Արցախի ինքնորոշման իրավունքի, անկախության և ճանաչման համար։ Մենք պարտավոր ենք արցախահայությանն օգնել խաղաղ կյանք ունենալ իրենց հողում և պաշտպանել նրանց վտանգված մշակութային ժառանգությունը։ Սա այն է, ինչ ես պարտավորվել եմ անել, քանի որ գիտենք, որ Արցախի ժողովուրդը նույնպես պայքարում է մեր արժեքների պաշտպանության համար։ Այսպիսով՝ ձեր պայքարը մեր պայքարն է, և մենք ձեր կողքին ենք լինելու»,- ասել է նա: