«Երեք երնեկ մի տեղում». այսօր Մարզահամերգային համալիրում «Լավ էլի» եւ «Բամբիռ» խմբերը հանդես կգան բարեգործական համերգով

«Երեք երնեկ մի տեղում». Հայաստանի պատմության մեջ առաջին անգամ «Լավ էլի» եւ «Բամբիռ» տեղական երկու ռոք-բենդերը ելույթ կունենան Կարեն Դեմիրճյանի անվան մարզահամերգային համալիրում, իսկ ստացված հասույթը կտրամադրվի Հայաստանի երեխաների առողջության հիմնադրամին:

Սիրված խմբերն առաջին անգամ չէ, որ միասին են հանդես գալու. նման փորձառություն ունեցել են արդեն 2019 թվականին: «Լավ էլի» խմբի մենակատար Մհեր Մանուկյանը, «Հայկական ժամանակի» հետ խոսելով «Բամբիռի» հետ համագործակցության եւ 3 տարի անց կրկին համատեղ համերգով հանդես գալու մտահղացման մասին, ասում է՝ մենք իրար վաղուց գիտենք, երեւի մի 20 տարի, եթե ոչ ավելի, իսկ համագործակցությունը սպասելի էր:

Նրա խոսքով՝ չնայած 2019 թվականից իրենց համատեղ համերգի անունը մնացել էր «Երկու երնեկ մի տեղում», սակայն այժմ ստացվում է «Երեք երնեկ մի տեղում», քանի որ հանդիսատեսը կարողանալու է վայելել եւ նույն բեմի վրա միաժամանակ տեսնել երկու սիրելի խմբի ներկայացուցիչներին, դրա հետ մեկտեղ իր ներդրումն ունենալ քաղցկեղի դեմ բուժվող երեխաներին աջակցելու գործում: Խմբի մենակատարը նաև նշում է՝ համերգի հիմնական սկզբունքն այն է, որ «մեր ու ձեր» չեն անելու. երկու խումբն էլ բեմում է լինելու բոլոր երգերի ժամանակ, եւ միասին նվագելու են թե՛ «Բամբիռի», թե՛ «Լավ էլի»-ի երգերը:

Անդրադառնալով Հայաստանի երեխաների առողջության հիմնադրամին օգնելու գաղափարին՝ Մանուկյանն ասում է՝ քանի որ անընդհատ կապի մեջ են եղել հիմնադրամի ղեկավար Արմեն Արմոս Մարտիրոսյանի հետ, երկար տարիներ հետեւել ու հիացել նրա գործունեությամբ, որոշել են իրենց ներդրումն ունենալ՝ մասնակիցը դառնալով բարեգործական աշխատանքներին, մասնավորապես՝ քաղցկեղ եւ արյան ծանր հիվանդություններ ունեցող երեխաների բուժմանը. «Մտածեցինք, որ այդ երեքը կարելի է համատեղել. ե՛ւ բարի գործ անել, ե՛ւ համատեղ երգել, լավ համերգով հանդիսատեսին էլ հաճույք պատճառել»:

«Բամբիռ» խմբի անդամ Նարեկ Բարսեղյանն էլ մեր զրույցում նշում է՝ նման համերգ ունենալու հիմնական մոտիվացիան թերեւս 3 տարի առաջ համատեղ համերգային ծրագիրն էր, այն տաք հիշողությունները, որոնք ինչպես երկրպագուների մոտ են մնացել, այնպես էլ՝ իրենց՝ երկու խմբերի անդամների: «Որոշեցինք կրկնել, բայց այս անգամ համերգի կոնկրետ մեսիջ ունենալ, իսկ երկու երնեկն էլ՝ երեք սարքել»,- նկատում է Նարեկը:

Համերգը բաղկացած է լինելու երկու մասից, բեմում կկատարեն 30-ից ավելի երգ: Կհնչեն ինչպես հին, այնպես էլ՝ նոր երգեր:

Խոսելով համերգի հասույթի ու բարեգործության մասին՝ երաժիշտն ասում է՝ Հայաստանում, ցավոք սրտի, շատ բարդ է համերգներ իրականացնելը. բավականին մեծ գումարներ է ծախսվում հենց տեխնիկական մասի վրա, տարածքի եւ այլնի:

«Հայաստանում դանդաղ քայլերով է ինչ-որ բան փոփոխվում ու առաջ գնում: Բայց վերջին շրջանում առաջընթաց կա, ինչը շատ լավ է: Պարզապես տեխնիկայի խնդիր կա, որովհետեւ մինչեւ պատվիրում ենք, մինչեւ հասնում է, մի բան փչանում է, ամեն ինչ թանկ է նստում»,-նկատում է նա:

Նարեկը նաեւ նշում է՝ շատ կցանկանար, որ մեր երկրում համերգների ժամանակ առաջնային տեղը տային արտիստին. «Մեզ մոտ մի մշակույթ կա տարածված, որ համերգին կամ միջոցառմանը բոլորը վճարվում են, իսկ վերջում արտիստը կա՛մ վճարվում է, կա՛մ՝ չէ: Գուցե սովետի ժամանակներից է եկել, որ արվեստագետը պիտի սոված լինի, իսկ լավ արվեստագետը՝ առավել եւս: Շատ կուզենայի՝ մեր ազգային գիտակցության մեջ մտներ, որ համերգ գնալիս, երաժշտություն լսելիս մենք պետք է վճարենք, որպեսզի դա հասնի արտիստին, վերջինս էլ կարողանա դրանով նոր գործ անել, ալբոմ թողարկել, երգ ստեղծել....»:

Խոսելով սպասվող նորություններից՝ խմբի անդամը փոխանցում է՝ առաջիկայում նոր ալբոմ կթողարկեն, այժմ աշխատում են նաեւ այդ ուղղությամբ: «Հուլիսին ունենք համերգայի ծրագիր, նվագելու ենք «Բամբիռի» այլ ծրագիր, լրիվ էթնիկ մոտեցման մեջ»,- եզրափակում է նա ու շտապում պատրաստվել ժամեր հետո սպասվող 2,5-3 ժամ տեւողությամբ համերգին: