Մոտոցիկլիստները և դրիֆտի սիրահարները՝ անդորրը խաթարողներ. բնակիչները ահազանգում են, ոստիկանությունը պնդում՝ տուգանում են

Երևանի փողոցներում, մանավանդ երեկոյան կամ գիշերային ուշ ժամերի հաճախ կարելի է հանդիպել մոտոցիկլետ վարողների և մեքենաների խլացուցիչների վրա հատուկ սարքեր տեղադրած վարորդների, որոնք մայրաքաղաքի փողոցներում վերուվար են անում՝ անտեսելով այն հանգամանքը, որ իրենց տրանսպորտային միջոցների շարժիչից արձակվող ձայնը խանգարում է քաղաքացիների անդորրը:

Հարցի մասին հաճախ բարձրաձայնում են նաև քաղաքացիները, սակայն սահմանված տուգանքներն անգամ դրան լուծում չեն տալիս:

Քաղաքացի Վլադիմիր Հովհաննիսյանը «Հայկական ժամանակի» հետ զրույցում ասում է՝ չկա մայրաքաղաքում ապրող գեթ մեկ քաղաքացի, որն այս խնդրին բախված չլինի: Վերջինս կարծում է, որ ոստիկանությունը համապատասխան քայլեր չի ձեռնարկում: Քաղաքացի Աննա Նալբանդյանն էլ վրդովված նշում է՝ մեծ դժվարությամբ է երեխային քնեցնում, սակայն մոտոցիկլետները և խլացուցիչները վերասարքավորված մեքենաների պատճառով երեխան պարբերաբար արթնանում է: Վահե Մաթևոսյանն էլ, որը նույնպես Երևանի բնակիչ է, առաջարկում է 23:00-ից հետո Երևանում դեցիբելի աստիճան սահմանել, որպեսզի մարդկանց հանգիստը չխանգարվի: Իսկ քաղաքացի Էմիլ Սահակյանն ընդգծում է՝ այնքան մոտոցիկլետների ձայնը չի խանգարում, որքան այն փաստը, որ դրանք վարում են մեքենաների արանքներով՝ հաճախ ստեղծելով վթարային իրավիճակ:

Մոտոցիկլետ վարողներն ու դրիֆտի սիրահարներն էլ ասում են՝ պետք չէ հարցին միակողմանի մոտենալ: Վովա Պողոսյանը, որը մոտոցիկլետ է վարում, «Հայկական ժամանակի» հետ զրույցում ասում է՝ միգուցե կան կարգազանց մոտոցիկլետավարներ, բայց մեծ մասը հիմնականում վարում է՝ կանոններին համապատասխան: Ըստ նրա՝ քաղաքացիների նշած «գոնկա» անողները քիչ են:

«Առաջին անգամ, երբ փաբերից մեկից դուրս էի գալիս, դիմացը բայքերներ կային կանգնած, ինձ ասացին, որ շենքից հեռու գնամ, նոր մոտոցիկլետս գործի գցեմ, քանի որ մեծ շարժիչով բայքերը հանգիստ վարելուց էլ է բարձր ձայն հանում: Ուզում եմ ասել, որ բայքերների մեծ մասը մտածում է քաղաքացիների հանգստության մասին»,- նշում է նա՝ հավելելով, որ ավտոմրցույթներ (գոնկաներ) Երևանում կազմակերպվում են հատուկ վայրերում և օրերի, իսկ ովքեր դա անում են քաղաքում, պարզապես ցուցամոլ մարդիկ են:

«Պետք է հայելու մյուս կողմն էլ նայել: Մի շարք մեքենաների վարորդներ էլ առանց թարթիչը միացնելու և հայելու մեջ նայելու են վարում դեպի մոտոցիկլետը: Այսպիսի դեպքերում մեքենայի մետաղը կարող է վնասվել, իսկ մոտոցիկլետի վարորդը՝ շուռ գալ, և անդառնալի դեպքեր լինեն: Կամ բեռնատարների վարորդները, որոնք ավազ են տեղափոխում, չեն փակում այն հատուկ հարմարանքով, քամու ժամանակ ավազը լցվում է մեր աչքերի մեջ, եթե սաղավարտով չենք լինում: Երկու կողմում էլ խնդիրներ լինում են, ուղղակի պետք է հարգել միմյանց»,- շեշտում է զրուցակիցը:

Ստյոպա Մուրադյանն էլ, որը դրիֆտի սիրահար է, նկատում է՝ Հայաստանում չկան հատուկ տարածքներ՝ դրիֆտ անելու համար, այդ պատճառով էլ որոշ վարորդներ իրենց «ծարավը հագեցնելու համար» ընտրում են ոչ այդքան բանուկ փողոցներ և գիշերները դրիֆտ անում:

«Օրինակ՝ Վրաստանում «Rustavii International Motorpark» կա, դա վազքուղի է, որտեղ դրիֆտի սիրահարները գնում են, ես էլ եմ մի քանի անգամ գնացել: Բայց Հայաստանում չկան այդպիսի տեղեր, որ սիրահարները գնան, իրենց «հավեսը հանեն»: Եթե նման վազքուղիներ Հայաստանում էլ լինեն, վստահեցնում եմ, փողոցներում մարդկանց անհանգստացնողները կկրճատվեն»,- ընդգծում է նա:

«Վարորդի ընկեր» ՀԿ-ի ղեկավար Տիգրան Քեյանն էլ, «Հայկական ժամանակի» հետ զրույցում անդրադառնալով հարցին, նկատում է՝ եթե մեքենան կահավորված է ոչ գործարանային սարքավորումներով, դրանք ենթակա են առգրավման և համապատասխան պատժամիջոցների:

«Այս դեպքում, եթե խլացուցիչների վրա սարքեր են փակցված, դրանք ոստիկանությունը կարող է առգրավել և տուգանել: Իսկ եթե խոսքը մոտոցիկլետների մասին է, ոչինչ չեն կարող անել, քանի որ տվյալ փոխադրամիջոցի շարժիչը գործարանային արտադրությամբ այդպիսինն է. բարձր ձայն է հանում: Չես կարող մոտոցիկլետ վարողին ասել՝ գիշերները չվարես: Կարող է տվյալ անձը գիշերային աշխատանք է կատարում ու գնում է տուն, ի՛նչ, չգնա՞»,- ասում է Քեյանը և հավելում՝ «գոնկաների» մասով պետք է ոստիկանությունը զբաղվի:

Անդրադառնալով հատուկ վազքուղիներ ստեղծելու առաջարկներին՝ նա ասում է՝ հատուկ օրեր հատուկ վայրերում միջոցառումներ լինում են դրիֆտի սիրահարների համար, բայց Հայաստանում ընդունված է՝ ընկերներով որոշում են, գիշերով դուրս գալիս Երևանի փողոցներում «գոնկաների». «Սրանք հիմնականում ցուցամոլ մարդիկ են, որոնք ցանկանում են իրենց նկարել, տեղադրել սոցցանցերում: Հատուկ վազքուղի էլ լինի, միևնույն է, նման մարդիկ շարունակելու են նույն կերպ գործել»:

«Վարորդի ընկեր» ՀԿ-ի ղեկավարի խոսքով՝ օրինախախտ վարորդը օրինախախտ է մնալու. ոստիկանությունը պետք է գործի նման դեպքերում՝ տուգանելով տվյալ անձանց: «Եվ դա պետք է անեն հրապարակայնորեն, որպեսզի բոլորը տեղեկացված լինեն, չփորձեն նույնը կրկնել՝ վախենալով, որ իրենք էլ կտուգանվեն»,- շեշտում է Քեյանը:

ՀՀ ոստիկանության հասարակայնության հետ կապի և լրատվության վարչությունից էլ «Հայկական ժամանակին» փոխանցեցին, որ ոստիկանությունը պարբերաբար ծառայություն է իրականացնում Երևանում և մարզերում: Ամենօրյա ծառայության ընթացքում, ի թիվս այլ իրավախախտումների, հայտնաբերվում են մեքենաներ, որոնց խլացուցիչը վերասարքավորված է լինում բարձր ձայնով երթևեկելու համար: Իրավախախտում կատարած անձանց նկատմամբ կազմվում են համապատասխան վարչական արձանագրություններ:

Անյուտա Աթանեսյան