Առաջիկայում որ համայնքներում են սպասվում ՏԻՄ ընտրություններ և որ քաղաքական ուժերն են թեկնածուներ առաջադրել

Սույն թվականի սեպտեմբերի 25-ին Հայաստանի Հանրապետության 17 համայնքներում անցկացվելու են տեղական ինքնակառավարման մարմինների համամասնական ընտրակարգով ընտրություններ:

Այսպիսով՝ Արագածոտնի մարզի 3 համայնքներում սպասվում է ընտրություններ Թալին, Ալագյազ և Ծաղկահովիտ համայնքներում:

Թալինի համայնքապետի ընտրություններին մասնակցելու է 5 քաղաքական ուժ՝ «Քաղաքացիական պայմանագիր» «Ապրելու երկիր», «Արդար Հայաստան», «Հայ յեղափոխական դաշնակցություն» և «Կայունություն» կուսակցությունները: ՔՊ համամասնական ցուցակը այստեղ գլխավորելու է Տավրոս Սափեյանը, «Ապրելու երկրինը»՝ Դավիթ Մանուկյանը, «Արդար Հայաստանինը»՝ Արմեն Գրիգորյանը, իսկ մյուս երկու կուսակցություններն պաշտոնական էջերում դեռևս չեն հրապարակել համայնքապետի թեկնածուների անունները:

Ծաղկահովիտ համայնքում նույնպես պայքարելու է 5 քաղաքական ուժ՝ «Քաղաքացիական պայմանագիր», «Լուսավոր Հայաստան», «Հանրապետություն», «Նժդեհյան ցեղակրոն» կուսակցությունները և «Հզոր համայնք» կուսակցությունների դաշինքը: ՔՊ թեկնածուն այստեղ Նորայր Հակոբյանն է, «Հանրապետության» թեկնածուն»՝ Համլետ Սահակյանը, «Լուսավոր Հայաստան» կուսակցությանը՝ Արթուր Կարապետյանը, մյուս երկու կուսակցությունների թեկնածուների մասին այս պահին տեղեկատվություն չկա:

Գեղարքունիքի ընդամենը մեկ համայնքում է կայանալու ՏԻՄ ընտրություն՝ Ճամբարակում: Այստեղ ընտրություններին մասնակցելու է ընդամենը մեկ քաղաքական ուժ՝ «Դեմոկրատական այլընտրանք» կուսակցությունը, սակայն թեկնածուի մասին տեղեկություններ չկարողացանք գտնել: Նշենք, որ Ճամբարակը միակ համայնքն է, որտեղ իշխանական «Քաղաքացիական պայմանագիր» կուսակցությունը թեկնածու չի առաջադրել:

Լոռիի 4՝ Գյուլագարակ, Ալավերդի, Լոռի Բերդ, Տաշիր համայնքներում նույնպես կանցկացվեն ՏԻՄ ընտրություններ:

Գյուլագարակում համայնքապետի պաշտոնի համար կպայքարի 3 ուժ՝ «Քաղաքացիական պայմանագիր», «Ապրելու երկրիր» կուսակցությունները և «Հանուն ժողովրդի» դաշինքը: ՔՊ թեկնածուն այստեղ Խաչիկ Վարդանյանը կլինի, «Ապրելու երկրինը»՝ Վրույր Այվազյանը, «Հանուն ժողովրդի» դաշինքի թեկնածուի մասին տեղեկություններ չկարողացանք գտնել:

Ալավերդիում ուժերը չորսը կլինեն՝ «Քաղաքացիական պայմանագիրը», որի թեկնածուն Արեն Մկրտչյանն է, «Ապրելու երկիր», որի թեկնածուն էլ Արկադի Թամազյանն է, իսկ «Հայ ազգային կոնգրեսը» և ՀՅԴ-ն դեռևս չեն հրապարակել թեկնածուների անունները:

Լոռի Բերդ համայնքում մասնակից կուսակցությունները երեքն լինելու՝ «Քաղաքացիական պայմանագիր», «Ապրելու երկիր» և «Հանրապետություն»: ՔՊ համայնքապետի թեկնածուն Արայիկ Ներսիսյանն է, «Ապրելու երկրինը»՝ Կարլեն Վերմիշյանը, «Հանրապետությանը»՝ Արթուր Չատինյանը:

Տաշիրում երկու ուժ կմրցի՝ «Քաղաքացիական պայմանագիր» կուսակցությունը և «Միասնական համայնք» դաշինքը: ՔՊ թեկնածուն Արման Վարդանյանն է, դաշինքը դեռ չի տեղեկացրել իր թեկնածուի մասին:

Կոտայքի մարզում համամասնական ՏԻՄ ընտրություններ կլինեն Չարենցավան, Ակունք, Բյուրեղավան, Ջրվեժ համայնքներում:

Չարենցավանում ՏԻՄ-ին կմասնակցեն «Քաղաքացիական պայմանագիր», «Ապրելու երկիր» կուսակցությունները և «Միասնական համայնք» դաշինքը: Իշխանական կուսակցության համայնքապետի թեկնածուն Արթուր Գալստյանն է, «Ապրելու երկիր» կուսակցությունն էլ առաջադրել է սեպտեմբերի 25-ին կայանալիք ընտրությունների միակ կին թեկնածուին՝ Անահիտ Խեչոյանին, դաշինքի թեկնածուի մասին այս պահին տեղեկություններ չկան:

Ակունք համայնքում ընտրություններին կմասնակցեն «Քաղաքացիական պայմանագիր» և «Համախումբ» կուսակցությունների դաշինքը: ՔՊ թեկնածուն Հունան Ռուբենյանն է: «Համախումբ» կուսակցությունների դաշինքի թեկնածուի մասին պաշտոնական տեղեկատվություն չկարողացանք գտնել:

Բյուրեղավան համայնքում 4 քաղաքական ուժ է պայքարելու՝ «Քաղաքացիական պայմանագիրը», որի թեկնածուն Վլադիմիր Վարդևանյանն է, «Արդար Հայաստան» կուսակցությունը, թեկնածուն Արմեն Սարգսյանն է, ՀՅԴ-ի և «Միասնություն» կուսակցությունների դաշինքի թեկնածուների մասին պաշտոնական տեղեկատվություն այս պահին չկա:

Իսկ ահա Ջրվեժ համայնքում առաջադրվել է միայն «Քաղաքացիական պայմանագիրը», և համայնքապետի թեկնածուն Ռոբերտ Պետրոսյանն է:

Շիրակի մարզում միայն Անի համայնքում են անցկացվելու ՏԻՄ ընտրություններ: Առաջադրվել է 3 ուժ՝ «Քաղաքացիական պայմանագիր», «Հայկական երազանք» կուսակցությունները և «Ազգ-հայրենիք» դաշինքը: «Քաղաքացիական պայմանագրի» թեկնածուն Արման Սարիբեկյանն է, «Հայկական երազանք» կուսակցությանը՝ Ագուն Սաղաթելյանը, դաշինքի թեկնածուի անունը ճշտել չհաջողվեց:

Ամենից թեժ պայքարն ընթանալու է Սյունիքի մարզի Սիսիան համայնքում: Այստեղ ՏԻՄ ընտրություններին մասնակցում է 7 քաղաքական ուժ՝ «Քաղաքացիական պայմանագիր» կուսակցությունը, որի թեկնածուն Արմեն Հակոբջանյանն է, «Ապրելու երկիր» կուսակցությունը, թեկնածուն Արա Զաքարյանն է, «Հանուն հանրապետության» կուսակցությունը՝ Սևակ Մուսաթյանի թեկնածությամբ, «Աշխատանք և արդարություն» կուսակցությունների դաշինքի ցուցակը գլխավորելու է Հայկ Առաքելյանը, ՀՅԴ-ինը՝ Աշոտ Ավագյանը, «Զարգացող համայնք» դաշինքինը՝ Մհեր Ազոյանը, «Մեկ Հայաստան» կուսակցության համայնքապետի թեկնածուն էլ Մարտին Հարությունյանն է:

Քաջարանում պայքարը երեք ուժերի միջև է ընթանալու՝ «Քաղաքացիական պայմանագիր» կուսակցության, որի թեկնածուն Արմեն Առաքելյանն է, «Հանրապետություն» կուսակցության՝ Վարդան Գևորգյանի թեկնածությամբ, և «Դեպի միասնություն» դաշինքը, որի թեկնածուն էլ Մանվել Փարամազյանն է:

Հաջորդ համայնքը Վայոց ձորի Արենին է, որտեղ ՏԻՄ-ին կմասնակցեն «Քաղաքացիական պայմանագիր» և «Հանրապետություն» կուսակցությունները: Այստեղ ՔՊ թեկնածուն Հուսիկ Սահակյանն է, «Հանրապետությանը»՝ Անուշավան Ավետիսյանը:

Եղեգիս համայնքում էլ պայքարի մեջ երեք ուժ կլինի՝ «Քաղաքացիական պայմանագիր», «Ազատական» և «Վերելք» կուսակցությունները: Վերջին երկու կուսակցությունների թեկնածուների մասին տեղեկություն չհաջողվեց իմանալ, իսկ ահա ՔՊ թեկնածուն Արթուր Ստեփանյանն է:

Տավուշի մարզում էլ միայն Բերդ համայնքում են անցկացվելու ընտրություններ: Այստեղ առաջադրվել է 2 դաշինք՝ «Արժանապատիվ սերունդ» և «Զորավար համայնք», սակայն նրանց թեկնածուների մասին տեղեկատվություն չհաջողվեց իմանալ, իսկ «Քաղաքացիական պայմանագիր» կուսակցության թեկնածուն կլինի Վահրամ Սուքիասյանը: