«Սեւազգեստ կանայք». ցավալի իրողություն ենթադրող խորագրով հումորային ժանրի նոր ֆիլմ (լուսանկարներ, տեսանյութ)

Սեպտեմբերի 16-ին մեծ էկրան կբարձրանա ռեժիսոր Գոռ Կիրակոսյանի «Սեւազգեստ կանայք» ֆիլմը: Ցավալի իրողություն ենթադրող խորագրով ֆիլմն իրականում հումորային ժանրի է:

Կատակերգական ու զավեշտալի իրադարձությունները ֆիլմում տեղի են ունենում մեծահարուստ մի մարդու հոգեհանգստի ժամանակ: Խառնաշփոթային իրավիճակ է սկսվում, երբ վերջինիս հոգեհանգստին անսպասելիորեն հայտնվում են բոլոր այն կանայք, որոնց հետ տղամարդը սիրային հարաբերությունների մեջ է եղել:

«Ընտանիքի անդամները, բնականաբար, չիմանալով այդ կանանց գոյության մասին, նրանց տեսնելով՝ անակնկալի են գալիս՝ փորձելով հասկանալ, թե ովքեր են ու ինչ գործ ունեն այդտեղ»,- «Հայկական ժամանակի» հետ զրույցում ֆիլից կարճ դրվագ է պատմում ռեժիսոր Գոռ Կիրակոսյանը՝ հավելելով, որ սցենարի հեղինակները ինքը եւ Աշոտ Աբրահամյանն են, իսկ կատակերգության պատմության հեղինակը՝ Դավիթ Բաբախանյանը։

Խոսելով ֆիլմի ստեղծման պատմության մասին՝ Գոռ Կիրակոսյանն ասում է՝ 2018 թվականին, երբ նկարահանում էր «Ազնիվ գողեր» ֆիլմը, Դավիթն իրեն պատմել է իր հեղինակած պատմությունը, եւ այդպես առաջացել է գաղափարը. «Դավիթը կեսկատակ-կեսլուրջ ինձ ասաց՝ քանի որ ես արդեն ունեմ հոգեհանգստի թեմայով ֆիլմ, այս պատմությունն ավելի շատ ինձ հարմար կլինի, քան իրեն, ապա պատմության իրավունքները փոխանցեց ինձ։ Այնպես չէ, որ մտադրված էի կրկին մահվան եւ հոգեհանգստի թեմայով ֆիլմ նկարահանել, պարզապես այս պատմությունն ինձ շատ դուր եկավ, որոշեցի, որ նմանատիպ երկրորդ ֆիլմ ունենամ: Իհարկե, այս ֆիլմը եւ «Մեծ պատմություն փոքր քաղաքումը» շատ տարբեր են»:

Ֆիլմում հանգուցյալի դերում հանդես է եկել դերասան Արտյոմ Մարկոսյանը, որը սկզբից դժկամությամբ, սակայն հետո ստիպված է եղել համաձայնել պառկել դագաղում։ «Արտյոմը սցենարը շատ էր հավանել, ցանկություն ուներ նկարահանվելու, սակայն դժվարությամբ պառկեց դագաղի մեջ։ Հիշում եմ՝ նկարահանման առաջին օրը հենց ուժ գտավ ու պառկեց դագաղում, բոլորս նրան երկար ծափահարում էինք»,- նկատում է ռեժիսորը:

Ֆիլմում նկարահանվել է նաեւ դերասանուհի Լուիզա Ներսիսյանը։ «Հայկական ժամանակի» հետ զրույցում Ներսիսյանն ասում է՝ «Սեւազգեստ կանայք» ֆիլմի հիմքում այն գաղափարն է, որ ցանկացած իրավիճակում պատմությանը նաեւ մեկ այլ տեսանկյունից պետք է մոտենալ։

«Հանգուցյալի իրականությունը լրիվ այլ պատկեր ունի, սակայն նա լրիվ այլ իրականության մեջ է ապրել։ Երկրորդ իրականության մեջ եղել է նաեւ իմ հերոսուհին։ Կարծում եմ՝ համամարդկային պատմություն է: Այնպես չէ, որ ֆիլմում կտեսնենք տիպիկ հայկական բաներ, որոնք հատուկ են հենց միայն մեզ՝ հայերիս։ Կնոջ եւ տղամարդու հավերժական թեման է, որն ազգություն չի ճանաչում»,- նշում է դերասանուհին: Ըստ Լուիզա Ներսիսյանի՝ ֆիլմը դիտելուց հետո եւս մեկ անգամ կմտածենք այն մասին, որ այս կյանքում ամեն ինչ միանշանակ չէ, եւ կարեւոր է, թե ո՛ր դիտակետից ես նայում իրավիճակին։

«Ֆիլմը եթե մեկ նախադասությամբ ամփոփ ներկայացնեմ, ապա այսպես կասեմ՝ գոյություն ունեին մի տղամարդ եւ նրա սիրելի կանայք, որոնցից ամենը մեկն ուներ իր իրականությունը։ Հենց այդ իրականություններն էլ բախվում են հոգեհանգստի ժամանակ»,- նկատում է դերասանուհին:

Հավելենք, որ Լուիզա Ներսիսյանի համար այս ֆիլմը կարեւոր է նաեւ այն տեսանկյունից, որ սա իր դստեր՝ Լիլիթ Թոխատյանի առաջին աշխատանքն է. «Շատ ուրախ եմ, որ Գոռ Կիրակոսյանը վստահեց նրան, Լիլիթն էլ՝ որպես օգնական, շատ լավ փորձ ձեռք բերեց։ Առհասարակ, ցանկանում եմ ընդգծել, որ Հայաստանում դժվար է ունենալ թիմ, որի յուրաքանչյուր անդամը ռեժիսորի ուղղությամբ է նայում, սակայն Գոռը մեզ բոլորիս կարողանում է վարակել այդ ոգեւորությամբ: Ավելին՝ երբ ֆիլմի նկարահանումներն ավարտվում էին, միայն դատարկություն էիր զգում։ Բոլորս ծառայում էինք նույն գաղափարին, դա միայն Գոռի շնորհիվ էր»:

«Սեւազգեստ կանայք» ֆիլմում գլխավոր դերերում նկարահանվել են նաեւ Իվետա Մուկուչյանը, Լուիզա Ներսիսյանը, Դիանա Մալենկոն, Գրիգոր Դանիելյանը, Ռաֆայել Երանոսյանը, Ռոզի Ավետիսովան, Արտյոմ Մարկոսյանը, Ելենա Վարդանյանը, Ռոմելա Սարգսյանը, Արմեն Դարբինյանը, Աշոտ Տեր-Մաթեւոսյանը եւ այլք։ Գլխավոր պրոդյուսերը Կարո Կիրակոսյանն է։

«Յութուբ»-ում արդեն հասանելի է ֆիլմի թրեյլերը:

Ռեժիսոր Գոռ Կիրակոսյանը հեռուստադիտողին հայտնի է իր «Մեծ պատմություն փոքր քաղաքում», «Կորած մոլորվածը Հայաստանում», «Ազնիվ գողերը» աշխատանքներով:

Լուսանկարները՝ Դամիան Հովհաննիսյանի