Փարամազյանը «լուսանցքից դուրս» է, պայքարը իմ և ՔՊ-ի միջև է լինելու. Քաջարանում «Հանրապետություն» կուսակցության թեկնածու

Քաջարան խոշորացված համայնքում սեպտեմբերի 25-ին ևս սպասվում են ՏԻՄ ընտրություններ: Սույն համայնքում պայքարը երեք ուժերի միջև է ընթանալու՝ «Քաղաքացիական պայմանագիր» կուսակցության, որի թեկնածուն Արմեն Առաքելյանն է, «Դեպի միասնություն» դաշինքի, որի թեկնածուն գործող համայնքապետ Մանվել Փարամազյանն է, և «Հանրապետություն» կուսակցության, Վարդան Գևորգյանի թեկնածությամբ:

Վերջինս, «Հայկական ժամանակի» հետ զրույցում անդրադառնալով իր ծրագրային դրույթներին, ընդգծում է՝ մեծ տեղ է տվել անվտանգային հարցերին:

«2002-2012 թվականներին ես եղել եմ Քաջարանի քաղաքապետը և լավ ծանոթ եմ համայնքի խնդիրներին: Սակայն այս ժամանակահատվածում, կարծում եմ, ամենից կարևոր հարցերը վերաբերում են անվտանգությանը: Այդ առումով մեր նախընտրական ծրագրում կարևորում ենք սահմանամերձ բնակավայրերի բնակչության համար բեռնատար և հատուկ նշանակության մեքենա-տրանսպորտային միջոցներ վարելու՝ վարորդական վկայականի ձեռքբերման՝ անվճար դասընթացների կազմակերպումը, քաղաքացիական պաշտպանության, բնակչության ֆիզիկական և կենսական անվտանգության ապահովման անվճար խորհրդատվական դասընթացների կազմակերպումն ու հետազոտությունների իրականացումը, առաջին բժշկական օգնություն ցուցաբերելու անվճար դասընթացների կազմակերպումը»,- ասում է նա:

Ըստ Գևորգյանի՝ ջրագծերի փոխումը, ասֆալտապատումը նույնպես կարևոր հարցեր են համայնքի համար, սակայն մարդու անվտանգությունն ավելի առաջնային է. «Շատ ասֆալտապատ ճանապարհներ մնացին հակառակորդին: Չեմ ուզում մեր սակավաթիվ միջոցները ներդնենք մի բան մեջ, հետո փաստի առջև կանգնենք: Դրա համար էլ, կարծում եմ, պետք է ուշադրություն դարձնել անվտանգությանը, հետո նոր մնացած հարցերին»:

Հարցին, քանի որ Քաջարան խոշորացված համայնքի որոշ գյուղեր սահմանամերձ են, նկատե՞լ է տրամադրվածություն, որ մարդիկ չցանկանան ապրել այդ համայնքներում, փորձեն լքել իրենց տները, Գևորգյանն ասում է՝ հենց այդ պատճառով էլ ցանկանում են անվտանգությանը մեծ ուշադրություն դարձնել, որպեսզի քաղաքացին իրեն պաշտպանված զգա իր իսկ համայնքում:

«Դրա համար նաև համայնքում պետք է զարգանան այլ ոլորտներ նույնպես՝ գյուղատնտեսությունը, սպորտը, մշակույթը, առողջապահությունը, կրթությունը, զբոսաշրջությունը և այլն: Մեր համայնքը ռազմավարական մեծ նշանակություն ունի: Մարդը կցանկանա լքել իր տունը, եթե պաշտպանված չլինի: Իսկ իմ՝ արդեն վերը նշված դրույթների իրականացմամբ այդ պաշտպանվածությունը քաղաքացին կունենա»,- կարծում է նա:

«Հանրապետության» թեկնածուն նշում է՝ խրախուսելու են նաև ծնելության մակարդակի բարձրացմանը, ամեն բան անելու են, որ այդ երեխաները մեծանան արժանապատիվ ու լավ պայմաններում:

«Այդ նպատակով նախընտրական ծրագրում նախատեսում ենք ամսական սահմանված չափով գումարի տրամադրում երեք և ավելի անչափահաս երեխաներ ունեցող ընտանիքներին, յուրաքանչյուր նորածին երեխայի համար՝ ընտանիքին միանվագ գումարի տրամադրում, համայնքում հաշվառված և փաստացի բնակվող ընտանիքներին՝ հինգ միլիոն դրամ միանվագ պարգևատրում հինգերորդ երեխայի ծննդյան առթիվ, մանկապարտեզների կառուցում գյուղական համայնքներում և անվճար հաճախելիություն»,- ասում է զրուցակիցը:

Այլ որոտներին էլ անդրադառնալով՝ վերջինս հայտնում է՝ Քաջարանի և այլ համայնքների մեջ բացակայում է նորմալ տրանսպորտային կապը: Վարդան Գևորգյանը վստահեցնում է՝  նախատեսելու են մշտական տրանսպորտային կապի միջոցի ապահովում.

«Ունենք շրջակա միջավայրի հետ կապված ծրագրեր, քանի որ Քաջարանը լեռնհանքարդյունաբերության խոշոր կենտրոն է, և համայնքներ կան, որոնց էկոլոգիական ռիսկերը մեղմելու ուղղությամբ քայլեր պետք է իրականացվեն: Առողջապահության մասով անպայման բոլոր համայնքները պետք է ունենան բուժկետեր, որոնք համալրված կլինեն պրոֆեսիոնալ մասնագետներով: Կրթությունն ու մշակույթը նույնպես բոլորիս կյանքում շատ կարևոր դեր ունեն: Համայնքներում պետք է լավ մասնագետներ լինեն, որպեսզի կրթության որակն էլ բարձր լինի: Նախատեսում ենք պետական ծրագրերով անհատական բնակելի շենքերի կառուցում: Ես նաև ցանկանում եմ միջնորդ դառնալ պետության և մասնավոր ոլորտի միջև, որի միջոցով մեծ բարեփոխումներ կարելի է իրականացնել: Քաջարան համայնքի բյուջեն բավականին մեծ է, լավ ծրագրեր հնարավոր է ի կատար ածել»,- վստահ է նա:

Հարցադրմանը՝ քաղաքացիներն ի՞նչ տրամադրվածություն ունեն իր նկատմամբ, որքա՞ն է գնահատում ընտրվելու շանսերը, Գևորգյանն ասում՝ և՛ ուժի, և՛ անձամբ իր նկատմամբ քաղաքացիները շատ լավ են տրամադրված. «Կարծում եմ՝ հիմնական պայքարն ընթանալու է իմ և ՔՊ թեկնածուի միջև: Գործող քաղաքապետ Մանվել Փարամազյանը համարվում է «լուսանցքից դուրս»: Սա կարող է շատերի համար անակնկալ լինել, բայց ես նման տրամադրվածություն եմ նկատում, իմ ինտուիցիան բերում է դրան»: