Լարսում 15 կմ երկարությամբ հերթեր են. հնարավոր է՝ վաղն անցակետը փակվի ՌԴ քաղաքացի տղամարդկանց համար

Վերին Լարսի անցակետում վերջին օրերին 2022 թվականի համար ռեկորդային հերթեր են:

Վրացական լրատվամիջոցները հայտնում են, որ  Ռուսաստանի Դաշնությունից եկող մեքենաների հերթերը հսկայական երկարության են հասնում, դրանք արդեն հատել են 15 կմ-ի սահմանը, բացի այդ, գերծանրաբեռնված է աշխատում անցակետը: Այս մասին են վկայում նաև Ռուսաստանի Դաշնային մաքսային ծառայության բաց տվյալները։

Ռուսաստանի Դաշնությունում սեպտեմբերի 21-ին հայտարարված մասնակի մոբիլիզացիայի ֆոնին սահմանի ռուսական կողմում մեքենաների հսկայական հերթի խցանման երկարությունը, ըստ Yandex.Traffic ծառայության տվյալների, գրեթե 15 կիլոմետր է։

Սեպտեմբերի 24-ին՝ ժամը 06:00-ի դրությամբ, մեկ օրում Ռուսաստանից Վրաստան է մեկնել 1943 մարդատար և 336 բեռնատար մեքենա։

Վերին Լարսում այժմ հերթում սպասում է 2200 մարդատար և 500 բեռնատար մեքենա։ Սա անցակետի առավելագույն ծանրաբեռնվածության տվյալներն են տարվա սկզբից ի վեր:

Լարսում սպասող քաղաքացիներն ու նրանց ընտանիքների անդամները համացանցային տարբեր խմբերում և էջերում հայտնում են, որ վերջին երկու օրերին մաքսակետերը ժամանակ առ ժամանակ փակվել են տեխնիկական պատճառներով, ինչով պայմանավորված՝ հերթերում սպասելու ժամանակն ավելացել է մի քանի ժամով ևս:

Հյուսիսային Օսիայի սահմանապահ ծառայության մամուլի ծառայությունից նախօրեին РБК-ին հայտնել էին, որ Վերին Լարսն աշխատում է բնականոն հունով, առանց սահմանափակումների, երթևեկության համար նախատեսված բոլոր գոտիները բաց են։ 

Նմանատիպ հայտարարություն է արել օրերս Վրաստանի ֆինանսների նախարարության եկամուտների ծառայությունը ևս։

Նշվել է, որ տրանսպորտային միջոցների տեղաշարժը և մաքսային ընթացակարգերի իրականացումը տեղի է ունենում «ամբողջությամբ, օրը 24 ժամ, առանց ընդհատումների»։

Միաժամանակ նշվել է, որ վերջին տասը օրվա ընթացքում «Վրաստանի պետական սահմանով մուտքի և ելքի թվի միջև կտրուկ աճ կա:

Սեպտեմբերի 25-ի՝ գիշերվա ժամը 03:00-ի տվյալներով, երկու ուղղությամբ էլ Լարսում երթևեկությունը կաթվածահար վիճակում է, հայտնում են լրատվամիջոցները: Նշվում է, որ ժամը 03:00-ից մինչ առավոտ հերթում եղած ավտոտրասնպորտային միջոցները ոչ մի քայլ առաջ չեն շարժվել:

Վրաստանի ընդդիմադիր խմբակցության անդամների ունեցած տվյալների համաձայն՝ վերջին օրերին միայն Վրաստան է մուտք գործել ՌԴ-ի մի քանի հարյուր հազար քաղաքացի:

Ի դեպ, համացանցում վրաց օգտատերերը ստորագրահավաք  են սկսել՝ պահանջելով սահմանափակումներ մտցնել «օկուպանտ երկիր Ռուսաստանի քաղաքացիների նկատմամբ»։

Ստորագրահավաքի մասնակիցները դիմել են Վրաստանի իշխանություններին՝ անհապաղ Ռուսաստանի հետ վիզային ռեժիմ մտցնելու պահանջով, իսկ երկիր թույլ տալ մուտք գործել միայն քաղաքական դրդապատճառներով հետապնդվող անձանց։

Վրացական խորհրդարանի պատգամավոր Նոնա Մամուլաշվիլին քիչ առաջ ուկրաինական լրատվամիջոցներից մեկի ուղիղ եթերի ժամանակ հայտնել է, որ վաղը՝ երկուշաբթի՝ սեպտեմբերի 26-ին, հնարավոր է՝ Վրաստանը փակի իր սահմանները 18-55 տարեկան ՌԴ քաղաքացի հանդիսացող տղամարդկանց համար: Պատգամավորի խոսքերով՝ խորհրդարանականներին այդ մասին այսօր ծանուցել են վրաց կառավարությունից:

Նշենք, որ ռուս-վրացական անցակետով, ինչպես նաև օդային ճանապարհով մեծաթիվ ՌԴ քաղաքացիներ են ժամանել նաև Հայաստան, խցանումներ են նաև Ղազախստանի ու Մոնղոլիայի հետ սահմանային անցակետերում:

Ռուսաստանի քաղաքացիների մի մասը սկսել է լքել երկիրը անմիջապես այն բանից հետո, երբ ՌԴ նախագահ Վլադիմիր Պուտինը սեպտեմբերի 21-ին երկրում զորահավաք հայտարարելու մասին հրամանագիր ստորագրեց:

Պաշտպանության նախարար Սերգեյ Շոյգուն ավելի ուշ հայտարարել էր, որ 300 հազար մարդ կզորակոչվի ՌԴ տարբեր շրջաններից: Կոչը չի վերաբերի ուսանողներին և ժամկետային զինծառայողներին, զորահավաքի ենթակա են միայն զինվորական ծառայությունն ավարտած և զինվորական մասնագիտություն ունեցող քաղաքացիները։