Հոխիկյանը, ԵՊՀ-ին մեղադրելով քաղաքական պատվեր կատարելու մեջ, ինքն է քաղաքականացման առերևույթ քայլ կատարում. Գրիգորյան

Այսօր լրագրող Նաիրի Հոխիկյանը «Ֆեյսբուք»-ում գրառում է կատարել և հայտնել, թե ԵՊՀ ղեկավարությունն աննպատակահարմար է համարել շարունակել դասախոսական համագործակցությունը նաև իր հետ։

Վերջինս ընդգծել է, թե ակնհայտ քաղաքական կամ ավելի շուտ իշխանության պատվեր այս նախաձեռնությունը ԵՊՀ ժուռնալիստիկայի ֆակուլտետի դեկանը փորձել է իրեն բացատրել իր դասավանդած առարկայի անօրինական լինելով։

Հարցի առնչությամբ «Հայկական ժամանակ»-ը պարզաբանում խնդրեց համալսարանից։

Մայր բուհի մամուլի խոսնակ Ազնիվ Գրիգորյանը մեզ հետ զրույցում ասաց, որ Հոխիկյանի հետ աշխատանքային պայմանագիրը կնքված է եղել որոշակի ժամկետով, վերջինս պատշաճ կարգով ծանուցվել է այն մասին, որ իր հետ կնքված աշխատանքային պայմանագրի ժամկետը լրանում է հունիսի 30-ին, ինչից հետո ինքն ազատվում է աշխատանքից։

Բացի դրանից՝ Նաիրի Հոխիկյանի դասավանդած «Հեռուստատեսային վավերագրական ֆիլմ» դասընթացը, համաձայն ԵՊՀ մեթոդական խորհրդի՝ 2,5 տարի առաջ ընդունած որոշման, հեռացվել է ուսումնական պլանից, և դրա փոխարեն ուսպլանում ներառվել է «Պատումի լրագրություն» դասընթացը։

«Նոր դասընթացի ներառումը եղել է ժամանակի հրամայական, և դեկանի ու Հոխիկյանի՝ դեռևս մեկամյա վաղեմությամբ զրույցի ժամանակ Նաիրին «Պատումի լրագրություն» դասընթացի ներառումն ուսումնական պլանում ողջամիտ է համարել։ Նաիրի Հոխիկյանը, ԵՊՀ ղեկավարությանը մեղադրելով քաղաքական պատվեր կատարելու մեջ, կարծես ինքն է կրթական կառույցը քաղաքականացնելու առերևույթ քայլ կատարում։

Ֆակուլտետի դեկանը տվյալ ֆակուլտետում կրթական գործընթացի իրականացման պատասխանատուն է, և եթե որևէ մեկի հետ կնքված աշխատանքային պայմանագիրը լուծարվում է, ապա ունենում է իրավական հիմք և հիմնավոր պատճառ․ ոչ մի դեպքում հնարավոր չէ աշխատանքային պայմանագրի լուծարում՝ պայմանավորված քաղաքական կամ այլ դրդապատճառներով և ուղղորդվածությամբ»,- վստահեցրեց Գրիգորյանը։

Նրա հավաստմամբ՝ ԵՊՀ կրթական ծրագրերը և ուսումնական պլանները պարբերաբար թարմացվում են՝ հօգուտ ուսանողի և կրթական ծրագրերի որակի բարձրացման, և այս գործընթացն անընդհատական է։ Կատարվող փոփոխություններն ինքնանպատակ չեն լինում․ դրանց հիմքում սոցիալական հետազոտություններ են, ինչպես նաև հաշվի են առնվում աշխատաշուկայի պահանջներին համապատասխանելը և մի շարք այլ դրույթներ։

«Աշխարհաքաղաքական գործընթացները և տարածաշրջանը» դասընթացը հեռացվել է ուսպլանից, սակայն դրա ռացիոնալ կոմպոնենտն ընդգրկվել է «Միջազգային ժուռնալիստիկա և միջազգային կազմակերպություններ» դասընթացում։ Նույն սկզբունքով ժուռնալիստիկայի ֆակուլտետում դասավանդվող մեկ այլ դասընթաց՝ «Տեղեկատվական անվտանգություն և կոնվերգենտ մեդիա»-ն, հեռացվել է ուսպլանից և դրա ռացիոնալ կոմպոնենտը ներառվել է «Համացանցային ԶԼՄ, տեսություն և պրակտիկա» դասընթացում։ Հիշյալ դասընթացը վարում էր մեկ այլ դասավանդող՝ հայաստանյան լրատվամիջոցներից մեկի գլխավոր խմբագիրը, ուստի որևէ դեպքում դասընթացի հեռացումը պայմանավորված է բացառապես կրթական ծրագրերի արդիականացման միտումով և երբեք չի կարող կախված լինել դասավանդողի անձնային և (կամ) մասնագիտական որակներից»,- պարզաբանեց նա:

Գրիգորյանի խոսքով՝ այս փոփոխությունները միայն ժուռնալիստիկայի ֆակուկլտետի ուսումնական պլաններում չեն կատարվում․ «ԵՊՀ որդեգրած ուսանողակենտրոն մոտեցման շնորհիվ կրթական ծրագրերը պարբերաբար փոփոխվում են՝ ի նպաստ կրթության որակի բարձրացման։ Դրանց առնչությամբ միանձնյա որոշումներ չեն կայացվում․ ցանկացած որոշում՝ կապված այս կամ այն դասընթացի փոփոխման, վերանայման կամ հեռացման հետ, լինում է մեթոդական խորհրդում անցկացված երկարատև և համապարփակ քննարկումների արդյունք»։