ՀՀ-ում դիվանագիտական կորպուսի ներկայացուցիչներն այցելել են Ադրբեջանի հրետակոծությունից տուժած Սոթք և Կութ (լուսանկար)

Հայաստանում դիվանագիտական կորպուսի ներկայացուցիչներին ուղեկցել եմ Վարդենիսի՝ հրետակոծությունից տուժած 12 բնակավայրերից 2-ը:

Այս մասին «Ֆեյսբուք»-ի իր էջում գրել է Գեղարքունիքի մարզպետ Կարեն Սարգսյանը՝ նշելով, որ սեպտեմբերի 29-ին Հայաստանում հավատարմագրված դիվանագիտական կորպուսի ներկայացուցիչներն այցելել են Գեղարքունիքի մարզ, որտեղ ծանոթացել են Ադրբեջանի սանձազերծած հարձակման հետևանքով Սոթք և Կութ բնակավայրերում քաղաքացիական ենթակառուցվածքներին հասցված վնասներին և տեղում տեղեկություններ ստացել օպերատիվ իրավիճակի վերաբերյալ։

«Վարդենիս այցելած դիվանագետների թվում էին Հայաստանում ԵՄ պատվիրակության ղեկավար, դեսպան Անդրեա Վիկտորինը, ՄԱԿ-ի մշտական համակարգողի պաշտոնակատարը, Ռուսաստանի, Հունաստանի, Նիդեռլանդների, Ճապոնիայի, Արգենտինայի, Իտալիայի, Ֆրանսիայի, Հնդկաստանի, Սերբիայի, Բրազիլիայի, Շվեյցարիայի, Լեհաստանի, Ղազախստանի, ԱՄՆ-ի, Վրաստանի, Գերմանիայի, Լիտվայի, Մալթայի, Չինաստանի, Մեծ Բրիտնիայի, Ռումինիայի, Իրաքի դեսպանությունների ներկայացուցիչները, Նիդերլանդների, Մեծ Բրիտանիայի, ԱՄՆ-ի, Ֆրանսիայի, ԵՄ-ի, Իտալիայի, Չինաստանի, Արգենտինայի դեսպանները, Վրաստանի գործերի ժամանակավոր հավատարմատարը, այլ երկրների դեսպանատների ներկայացուցիչներ, ռազմական կցորդներ, ինչպես նաև տարածքային կառավարման և ենթակառուցվածքների նախարարը, զինված ուժերի գլխավոր շտաբի պետի տեղակալը, արտաքին գործերի նախարարի տեղակալը»,- նշել է մարզպետը:

Նրա խոսքով՝ դիվանագետները շրջել են Սոթք և Կութ բնակավայրերում, դիտարկել ադրբեջանական հրետակոծությունից տուժած բնակարանների, դպրոցների, մանկապարտեզների, բնակավայերի վարչական շենքերի, բուժամբուլատորիաների, գազատարների և ճանապարհների վնասները։

Այնուհետ Վարդենիսի համայնքապետարանում դիվանագիտական կորպուսին և ԶԼՄ ներկայացուցիչներին առավել մանրամասն տեղեկություններ են ներկայացվել ադրբեջանական ագրեսիայի հետևանքով ստեղծված իրավիճակի մասին։

«Թշնամու հարձակման հետևանքով Սոթքում վնասվել է 148, Կութում՝ 12, Վերին Շորժայում՝ 2 շինություն։ Բոլոր բնակարանների մասով ունենք կազմված ակտեր։ Ընդ որում, Սոթքում ունենք 7 բնակարան, որոնք վերականգնման ենթակա չեն և պետք է կառուցվեն նորովի։ Առաջիկա օրերի ընթացքում կիրականացվեն սոցաջակցության դրամական փոխանցումները, որոնց միջոցով բնակիչները հնարավորություն կունենան վերանորոգման աշխատանքներ սկսել»,- հայտնել է մարզպետը:

Ըստ նրա՝ հակառակորդի հարձակման հետևանքով Վարդենիսի և Ճամբարակի տարածաշրջանների դպրոցները չեն գործել մեկ շաբաթ, ինչի արդյունքում կրթություն ստանալու իրավունքից զրկվել է 7072 աշակերտ, իսկ 897 երեխա՝ նախադպրոցական հաստատություն հաճախելու իրավունքից.

«Ելնելով անվտանգության խնդիրներից՝ սահմանամերձ 12 բնակավայերում դասապրոցեսը տարվում է հեռավար կարգով, որում ընդգրկված է 1245 աշակերտ։ Վարդենիսի համայնքապետարանի հետ միասին հրետակոծության հենց առաջին պահից կազմակերպել ենք բնակչության տարհանման աշխատանքներ, ինչի շնորհիվ քաղաքացիական բնակչության շրջանում զոհեր չենք ունեցել, սակայն ունեցել ենք 10-ից ավելի վիրավորներ, որոնցից մեկը՝ ծանր, երկուսը՝ միջին ծանրության, իսկ մնացածը առաջին բուժօգնություն ստանալուց հետո չեն դիմել բուժհաստատություններ»:

Ներկաների ուշադրությունը հրավիրվել է նաև այն ցանքատարածությունների վրա, որոնք այս պահին գտնվում են հակառակորդի վերահսկողության տակ, և բնակիչները չեն կարողանում իրականացնել բերքահավաքի աշխատանքներ. հակառակորդի նշանառության տակ գտնվող բնակավայրերի թիվը Վարդենիսում հասնում է 12-ի։

«Թշնամու հարձակման հետևանքով այրվել են խոտհարքեր, արոտավայրեր, հացահատիկի ցանքատարածություններ, վնասվել են գյուղատնտեսական տեխնիկաներ, գրանցվել է անասնագլխաքանակի անկում։ Իսկ այժմ, պայմանավորված հակառակորդի զինուժի ներկայությամբ, մոտ 3000 հա ցանքատարածության վրա վտանգված է բերքահավաքի և գյուղատնտեսական այլ աշխատանքների կազմակերպումը։ Փորձում ենք անել հնարավորը, որպեսզի բերքահավաքի աշխատանքները կազմակերպվեն առանց խոչընդոտների»,- գրել է Սարգսյանը:

Առկա իրավիճակի մասին պարզաբանումներ են ներկայացվել նաև ԶՈՒ ԳՇ պետի տեղակալ Առաքել Մարտիկյանին և ՀՀ արտաքին գործերի նախարարի տեղակալ Մնացական Սաֆարյանին։ ՀՀ բարձրաստիճան պաշտոնյաները պատասխանել են նաև դիվանագիտական կորպուսի և ԶԼՄ ներկայացուցիչների առաջադրրած հարցերին։

«Լիահույս եմ, որ այս այցի արդյունքում դիվանագիտական կորպուսի ներկայացուցիչները իրենց երկրների ղեկավարություններին կներկայացնեն տիրող իրավիճակն ու ագրեսորի վայրագությունները, ինչն էլ կնպաստի թշնամու սանձնմանն ու Հայաստանի Հանրապետության տարածքային ամբողջականության վերականգնմանը»,- հույս է հայտնել մարզպետը։