Բյուրեղավանում ավագանու նիստին ընդառաջ «Արդար Հայաստան»-ի ցուցակը գլխավորող թեկնածուն հանդիպել է Գագիկ Ծառուկյանի հե՞տ

Նոյեմբերի 10-ի Կոտայքի մարզի Բյուրեղավան համայնքի նորընտիր ավագանու առաջին նիստին ընդառաջ ուշագրավ իրադարձություններ են տեղի ունեցել:

«Հայկական ժամանակ»-ին տեղեկություններ են հասել, որ ավագանու ընտրություններին մասնակցած «Արդար Հայաստան» կուսակցության նախընտրական ցուցակը գլխավորած Արմեն Սարգսյանը հանդիպել է «Բարգավաճ Հայաստան» կուսակցության ղեկավար Գագիկ Ծառուկյանի եւ Բյուրեղավան համայնքի ղեկավար Հակոբ Բալասանյանի հետ:

Ըստ նույն տեղեկությունների՝ ԲՀԿ առաջնորդը Բալասանյանին առաջարկել է միանալ «Արդար Հայաստան»-ին եւ համայնքապետի միասնական թեկնածու առաջադրել Արմեն Սարգսյանին: 14 տարի համայնքը ղեկավարած քաղաքապետը, սակայն, հրաժարվել է:

Մեր տեղեկություններով՝ «Քաղաքացիական պայմանագիր» եւ «Արդար Հայաստան» կուսակցությունների ավագանու ցուցակը գլխավորող անձինք՝ Վլադիմիր Վարդեւանյանն ու Արմեն Սարգսյանն էլ նախնական բանավոր պայմանավորվածություն են ունեցել 50+ ձայն չհավաքելու դեպքում կոալիցիա կազմել, սակայն ներքին այլ հարցերի շուրջ վերջնական համաձայնության այդպես էլ չեն եկել: «Արդար Հայաստան»-ի եւ ՔՊ-ի ներքին պայմանավորվածության համաձայն՝ ով թեկուզ մեկ ձայն ավելին հավաքեր, մյուսը միանալու էր այդ ուժին: ՔՊ-ն 100 ձայն ավելի է ստացել, սակայն «Արդար Հայաստան»-ից պատճառաբանել են, թե երկուսի մանդատներն էլ 4 են, եւ այդպես էլ ընդհանուր հայտարարի չեն եկել:

«Հայկական ժամանակ»-ը ստացած տեղեկությունները հստակեցնելու նպատակով մեկնաբանություն է խնդրել կուսակցություններից:

ՔՊ թեկնածու Վլադիմիր Վարդևանյանը մեզ հետ զրույցում չհերքեց իր եւ «Արդար Հայաստան» կուսակցության թեկնածու Արմեն Սարգսյանի միջեւ ընտրություններից առաջ հետընտրական կոալիցիա կազմելու վերաբերյալ պայմանավորվածության մասին լուրը, սակայն նշեց, որ հարցին առավել մանրամասն կանդրադառնա առաջիկա ծավալուն հարցազրույցում։

«Արդար Հայաստան» կուսակցության ղեկավար Նորայր Նորիկյանն էլ հայտնեց, որ երբեւէ նման պաշտոնական քննարկում չի ունեցել՝ ասելով՝ գուցե երկու կուսակցություններից առաջադրված թեկնածուները խոսակցական մակարդակում նմանատիպ քննարկում ունեցել են, բայց ինքը երբեք չի ծրագրել ու չի ցանկացել միավորվել որեւէ կուսակցության, քաղաքական ուժի հետ: «Այս ընտրություններին մասնակցել եմ մեկ պայմանով, որ կա՛մ մեր թիմի անդամը դառնում է համայնքի ղեկավար, կա՛մ գնում ենք նոր ընտրությունների: Որեւէ մեկին միավորվելու նպատակ կամ պայմանավորվածություն երբեք չեմ ունեցել»,- ասաց նա:

Ինչ վերաբերում է Գագիկ Ծառուկյանի հետ հանդիպմանը, Նորիկյանն ասաց. «Ամենայն պատասխանատվությամբ ասում եմ՝ նման տեղեկատվության չեմ տիրապետում: Բայց ով որ ունի նման տեղեկություններ, շատ լավ առիթ է՝ դիմելու իրավապահ մարմիններին ու պարզելու՝ իսկապես նման բան եղե՞լ է, թե՞ ոչ»:

Հիշեցնենք՝ նոյեմբերի 10-ին տեղի էր ունեցել Կոտայքի մարզի Բյուրեղավան համայնքի նորընտիր ավագանու առաջին նիստը, որի ընթացքում արտառոց դեպք էր գրանցվել: Համայնքապետի ընտրություններին մասնակցող «Արդար Հայաստան» կուսակցության անդամ եւ ավագանու մանդատ ստացած անձանցից մեկը, շեղվելով կուսակցական գծից ու նախապես կայացված համընդհանուր որոշումից, գործել էր թիմին հակառակ՝ քվեարկելով գործող համայնքապետի՝ Հակոբ Բալասանյանի օգտին, որը շուրջ 14 տարի ղեկավարում է համայնքը:

Ըստ Նորայր Նորիկյանի՝ նիստի նախորդող գիշերը «Արդար Հայաստան»-ը քննարկում էր ունեցել եւ որոշել չմասնակցել ավագանու անդրանիկ նիստին, որն էլ հետապնդում էր քվորումը տապալելու նպատակ:

Նշենք, որ Բյուրեղավանի գործող համայնքապետը ներկայացնում է «Միասնություն» դաշինքը («Բարգավաճ Հայաստան» եւ Սուրեն Սուրենյանցի «Դեմոկրատական այլընտրանք» կուսակցություններն է ներառում):

Հիշեցնենք՝ ընտրություններում «Միասնություն» դաշինքը ստացել էր ավագանու 7 մանդատ, «Արդար Հայաստան» եւ «Քաղաքացիական պայմանագիր» կուսակցությունները՝ հավասարապես՝ 4, իսկ «Հայ հեղափոխական դաշնակցություն» կուսակցությունն անցողիկ շեմը չէր հաղթահարել:

«Արդար Հայաստան» կուսակցության առաջնորդ Նորայր Նորիկյանը հայտարարել է, որ պատրաստվում են դիմել Կենտրոնական ընտրական հանձնաժողով եւ հրաժարվել ավագանու մանդատներից: ՔՊ-ն այս մասով դեռ դիրքորոշում չի հայտնել: