List.am-ում SMM մասնագետի հայտարարության տակ փորձում են ներգրավել գումարի դիմաց գովազդ նայողների. մեկնարկը 12 դոլարն է

Հայաստանում գործող List.am առցանց առեւտրի կայքում տեղադրվել է հայտարարություն, որով մարքեթինգի եւ SMM մասնագետի անվան տակ ֆինանսական բուրգ է թաքնված:

Աշխատանքի հայտարարության մեջ նշված էլեկտրոնային փոստի հասցեին ինքնակենսագրական ուղարկելուց հետո կապ են հաստատում ուղարկող անձի հետ եւ առանց որեւիցե անհարմարություն զգալու՝ անմիջապես «խաղաքարտերը» բացում, սկսում մանրամասն ներկայացնել, թե ինչ է թաքնված SMM մասնագետի հայտարարության անվան տակ:

Նախ ասում են, որ գովազդային հարթակ են, որի միջոցով մարդիկ կարող են միջնորդավճար վաստակել՝ պարզապես բջջային հեռախոսով դիտելով իրենց հարթակում վիդեո գովազդներ, ու դրանք կիսվելով ընկերների հետ։ Տեսանյութերը դիտող որքան շատ ընկերների ներգրավում, այնքան ավելի շատ գումարի վաստակում: Սակայն գումարը կանխիկացնել հնարավոր է նվազագույնը 12 դոլարի դեպքում: Երկու օրում այդքան գումար վաստակելու համար անհրաժեշտ է 6 հոգու ներգրավել, որոնք եւս պետք է գովազդներ դիտեն: Իսկ եթե չի ներգրավվում տվյալ քանակությամբ մարդ, ուրեմն 12 դոլարը հնարավոր է վաստակել ոչ թե երկու, այլ 6 օրում:

Աշխատանքի համար տվյալ հայտարարությամբ ինքնակենսագրական ուղարկած Կարինեին (-հեղ. անունը փոխված է) «Հայկական ժամանակ»-ին պատմեց, որ List.am-ում հայտարարությունը ներկայացված էր մարքեթինգի ու SMM մասնագետ: Իրեն է զանգահարել մի տղամարդ՝ ներկայանալով որպես ծրագրի համակարգող, մանրամասնել աշխատանքի բնույթը: Վերջինս նախ առաջարկել է միանալ տելեգրամյան «Ռեալ կայքերի քննարկում» անունով խմբին՝ շահագրգռելով, որ այն կարճ ժամանակում արդեն 700-ից ավելի անդամ ունի:

Այնուհետև տվյալ անձը Կարինեին բացատրել է գումար աշխատելու հետագա «նրբությունները»: Այն է՝ սկզբում անհրաժեշտ է տրամադրված հղման միջոցով գրանցվել եւ ունենալ սեփական գովազդային հարթակը:

«Դուք կարող եք ամեն օր մասնակցել այս աշխատանքին եւ օրական վաստակել առնվազն 1-6 դոլար։ Եթե աշխատեք 120 օր, կդառնաք հարթակի սովորական աշխատակից եւ կստանաք միանվագ բոնուս՝ 3600 դոլար: Մենք ձեզ համար ավելի շատ աշխատանքային հնարավորություններ կբացենք»,- ասել է աշխատանքի պայմանները ներկայացնող անձը:

Վերջինս նաեւ ուղարկել է տելեգրամյան խմբի հղումն ու սքրինշոթեր, որոնք վկայել են խմբում ներգրավված անձանց գումար աշխատելու մասին:

Ըստ պայմանի՝ գրանցման հղումը ուղարկելուց հետո անհրաժեշտ է ներբեռնել հատուկ կոդ, իսկ գրանցումն ավարտելուց հետո ուղարկել սքրինշոթ, որպեսզի ծրագիրը ղեկավարողները վստահ լինեն, որ եւս մեկ անձ հաջողությամբ գրանցվել է:

Վերջինս չի զլացել նաեւ տեղեկատվություն տրամադրել իրենց կազմակերպության մասին: Ուղարկված գրության մեջ ասվում է, որ այն հիմնադրվել է 1991 թվականին: «RSCG Europe»-ը հայտնի ֆրանսիական մեդիա ընկերություն է: Այն աշխարհի ամենալայն ընդգրկում ունեցող շուկայավարման հաղորդակցման գործակալություններից մեկն է: Ունի խմբային մասնաճյուղեր աշխարհի 75 երկրում եւ ավելի քան 80 հազար լրիվ դրույքով աշխատակից: Ավելի քան 300 հազար կես դրույքով աշխատող գովազդային հաղորդակցման ծառայություններ է մատուցում աշխարհի տարբեր երկրների հաճախորդների համար, ինչպիսիք են Air France-ը, IBM-ը, Unilever-ը եւ այլն»:

Կարինեի խոսքով՝ աչքի առաջ ունենալով ամիսներ առաջ հարեւան Վրաստանում տեղի ունեցածը, երբ բազմաթիվ անձինք հազարավոր դոլարների կորուստ էին կրել՝ մի քանի ամիս շարունակ խոշոր գումարներ ներդնելով Teslavideomedia.com կայքում, որոշել է չվստահել:

Նկատենք՝ «List.am» առցանց առեւտրի կայքում մարքեթինգի եւ SMM մասնագետի անվան տակ այլ նպատակ հետապնդող հայտարարությանն անդրադարձել է նաեւ մեդիափորձագետ Սամվել Մարտիրոսյանը: Վերջինս, զգուշացնելով հնարավոր վտանգի մասին, գրառում է կատարել:

«Վերջին օրերին տարածվում է մի հավելված, որը թույլ է տալիս մտնել ծրագրի մեջ, որտեղ տեսանյութեր նայելու դիմաց գումար են վճարում։ Ընդ որում՝ կրիպտոյով։ Մտնելու համար պետք է նախնական 18 դոլար փոխանցել համակարգ։ Բազմաթիվ մարդիկ են հարցնում՝ սա վստահելի՞ է, թե՞ վտանգավոր: Հավելվածը ինքնին այնպիսին է, որ ստեղծողները չեն կարողացել տեղադրել մարքետները, քանի որ բուն ծրագիրը իր բնույթով Տրոյան է։ Այսինքն՝ լրտեսական վիրուսի նման մի բան։ Ընկնելով հեռախոսի մեջ՝ ստանում է այլանդակ քանակի թույլտվություններ։ Ու մի օր կարող է չար խաղեր խաղալ ձեր հետ»,- գրել է նա:

Մեկնաբանություններում օգտատերերից մեկը հարցադրում է արել՝ եթե ծրագիրը ջնջվում է հեռախոսից, այն կրկին կարող է վտանգավոր լինել: Մեկ ուրիշ օգտատեր, արձագանքելով հարցադրմանը, նշել է՝ տեսականորեն հնարավոր է վտանգավոր լինել՝ մանավանդ հաշվի առնելով, թե ինչ ջանասիրությամբ են ծրագրի վկաները հուշում՝ ինչպես կարելի է այն հեռացնել: