Շիրակի մարզպետը ակնկալում է եղբորը բերման ենթարկելու դեպքի մանրամասն ուսումնասիրություն, ընդհուպ՝ ծառայողական քննություն

Շիրակի մարզպետ Նազելի Բաղդասարյանը «Ֆեյսբուք»-ի իր էջում անդրադարձել է եղբոր՝ Արման Բաղդասարյանին, բերման ենթարկելուն և նշել, որ բացի այլ կարգավիճակներից, Արման Բաղդասարյանը նաև Գյումրու ավագանու անդամ է, ասել է թե քաղաքական պաշտոն զբաղեցնող անձ, որի նկատմամբ արարք է իրականցվել, վերջում արձանագրվել, որ կասկածները չեն հաստատվել։

Չմիջամտելով իրավապահ համակարգի գործունեությանը, աներկբա ընդգծելով օրենքի գերակայությունը, այնուամենայնիվ, որպես Շիրակի մարզպետ Բաղդասարյանը Շիրակի ոստիկանապետից ակնկալում է դեպքի հանգամանքների մանրամասն ուսումնասիրություն, ընդհուպ՝ ծառայողական քննության անցկացում։

Գրառումն ամբողջությամբ՝ ստորև․

«Գյումրիում սրընթաց դեպքերի զարգացումը «պատահականորեն» համընկավ իմ օրինական արձակուրդի եւ քաղաքից բացակայության հետ։ Նախօրեին արդեն մամուլը ողողված էր բարձրագոչ վերնագրերով՝ «Շիրակի մարզպետի եղբայրը բերման է ենթարկվել»։

Ըստ էության՝ այս մեգաիրադարձությունը իրականացվել է քաղաքացի Արման Բաղդասարյանի՝ ապօրինի զենք, զինամթերք պահելու կասկածով։ Հիմքը եղել է օպերլիազոր Ն. Սիմոնյանի զեկուցագիրը, անմիջականորեն ծագած կասկածը։

Սակայն անձնական խուզարկության, մեքենայի զննման արդյունքում ոչինչ չի հայտնաբերվել, եւ Ա. Բաղդասարյանը ազատ է արձակվել։

Թողնենք մի կողմ, որ իրադարձությունը տեղի է ունեցել քաղաքի բանուկ հատվածում՝ օրը ցերեկով, շոու էլեմենտներով։ Թողնենք այն հանգամանքը, որ Արման Բաղդասարյանը Գյումրիում կառավարող «Քաղաքացիական պայմանագիր» ֆրակցիայի անդամ է (քանզի օրենքի առաջ բոլորն են հավասար), թողնենք նաեւ այն, որ փաստացի հայաստանյան առաջին անկախ ԶԼՄ-ի՝ «Ցայգի» սեփականատերերից է, բացառենք նաեւ տխրահռչակ շահարկումը, որ մարզպետի հետ ազգակցական կապ կա։

Սակայն մի հանգամանք անտեսել որեւէ կերպ չենք կարող՝ Արման Բաղդասարյանը Գյումրու ավագանու անդամ է, ասել է թե ՔԱՂԱՔԱԿԱՆ ՊԱՇՏՈՆ զբաղեցնող (եթե ոմանց համար նորություն է «Հանրային ծառայության մասին» օրենք՝ 5-րդ հոդ.)։

Եվ ստացվում է քաղաքական պաշտոն զբաղեցնողի նկատմամբ արարք է իրականցվել, վերջում արձանագրվել, որ կասկածները չեն հաստատվել։

Չմիջամտելով իրավապահ համակարգի գործունեությանը, աներկբա ընդգծելով օրենքի գերակայությունը, այնուամենայնիվ, որպես Շիրակի մարզպետ՝ Շիրակի ոստիկանապետից ակնկալում եմ դեպքի հանգամանքների մանրամասն ուսումնասիրություն, ընդհուպ՝ ծառայողական քննության անցկացում։

Հանրությունն իրավունք ունի տեղեկանալու, թե օպերլիազոր Ն. Սիմոնյանի զեկուցագրի հիմքում ինչ փաստեր ու շարժառիթներ են եղել, նաեւ այն, թե որքան վտանգավոր է հասարակության համար Ա. Բաղդասարյանը։

Բարի ու խաղաղ օր եմ մաղթում բոլորին։

Արձակուրդս շարունակվում է»,- գրել է մարզպետը:

Ավելի վաղ գրել էինք, որ Գյումրու «Քաղաքացիական պայմանագիր» խմբակցության անդամ Արման Բաղդասարյանը, որը Շիրակի մարզպետ Նազելի Բաղդասարյանի հարազատ եղբայրն է, բերման էր ենթարկվել ոստիկանության «Կումայրու» բաժին։

«Հայկական ժամանակ»-ի հետ զրույցում ոստիկանությունից հայտնել էին, որ Բաղդասարյանը կասկածվել է ապօրինի զենք կրելու համար՝ հավելելով, որ կազմվել են համապատասխան փաստաթղթեր:

«Հայկական ժամանակ»-ի հետ զրույցում Բաղդասարյանն ասել էր՝ ցավոք, ոստիկանությունն իր նկատմամբ որդեգրած գործելաոճը չի փոխել և շարունակում է վարկաբեկել իր հեղինակությունը. «Ունենալով այլ գործիքակազմ, երեկ ոստիկանությունը որոշեց կիրառել բարի համբավին ու դիրքին ամենաշատ վնասող տարբերակը, ինչը շարունակում է նաև այսօր։ ԶԼՄ-ներին տրամադրված պարզաբանման մեջ կարող էր նշել, որ Արման Բաղդասարյանն ազատ է արձակվել ՀՀ քրեական օրենսգրքով նախատեսված արարք կատարելու վերաբերյալ կասկածը չհաստատվելու հիմքով։ Հենց այդ տողը մոռանում են նշել, այնինչ հենց այդ հիմքով են ինձ բաց թողել»: