Շքեղ համերգ, լեփ-լեցուն դահլիճ, պայթող ծափեր, անվերջանալի «բրավոներ». աշխարհահռչակ դիրիժոր Վլադիմիր Սպիվակովը Գյումրիում

Գյումրիում այսօր օրը դասական էր, տոն երաժշտության. Աճեմյանի բեմում կայացած շքեղ համերգով Ռուսաստանի ազգային ֆիլհարմոնիկը՝ ղեկավարությամբ Վլադիմիր Սպիվակովի, ավարտեց հյուրախաղերը Հայաստանում։

Առաջին անգամ այս բեմում՝ 1989-ին, վերջին անգամ 2013-ին էր կանգնել մաեստրոն։

«Ինչ լավ է, որ կրկին այստեղ ենք. ձեր աչքերում լույս եմ տեսնում, և դա հրաշալի է։ Մենք միասին մեծ պատմության մի մասնիկն ենք, որը չի կարող անհետանալ, բայց մեզ անընդհատ մղում է առաջ. Գյումրին ավելի գեղեցիկ է դարձել»,- լեփ-լեցուն դահլիճին դիմեց աշխարհահռչակ դիրիժորը։

Գյումրեցիները հիշում էին, թե ինչպես 34 տարի առաջ՝ 88-ի երկրաշարժից ամիսներ անց, Սպիվակովը եկել էր Գյումրի և իր նվագախմբով ելույթ ունեցել կանգուն մնացած դրամատիկականի այս նույն բեմում։

«Դա ամենադժվար համերգներից մեկն էր, որին մասնակցել եմ, երկրաշարժից հետո՝ առաջին համերգը մեր քաղաքում: Ավելի շատ հարգանքի տուրք ու խնկարկում էր, որին ներկա սևազգեստ դահլիճը լուռ երկար ժամանակ հոտնկայս ծափահարում էր մեծ երաժիշտին ու արտասվում: Համերգի ավարտին երկու երեխաներ բեմ բարձրացան և Վլադիմիր Սպիվակովին նվիրեցին իրենց զոհված ընկերուհու գոբելեն աշխատանքը։ Երեխաներից մեկը բոլորիս համար անակնկալ մինչ նվիրելը համբուրեց իր ընկերուհու աշխատանքը և նոր այն նվիրեց Սպիվակովին։ Հուզված ու ցնցված էինք բոլորս»,- «Հայկական ժամանակ»-ի հետ զրույցում պատմում է Գեղագիտության ազգային կենտրոնի Գյումրու մասնաճյուղի տնօրեն Սուսաննա Մկրտչյանը:

Այս դրվագն ամուր է դաջվել Սպիվակովի հոգում ու սրտում և մեկ անգամ չէ, որ իր հարցազրույցներում Գյումրու մասին խոսելիս նա մեծ հուզմունքով պատմել է այս մասին։

Այսօր էլ Գյումրին Վլադիմիր Սպիվակովին ընդունեց կարոտած սրտով ու մեծ ոգևորությամբ։ Այն պահերին անգամ, երբ աշխարհահռչակ երաժիշտը հեռանում էր բեմից, ծափերը չէին դադարում և առավել էին ուժգնանում նրա վերադարձի ժամանակ։

Համերգի ավարտին պայթող ծափերն ու «բրավոները» Վլադիմիր Սպիվակովն ընդհատեց հայերեն մաղթանքով. «Ցանկանում եմ ձեզ երկար, երջանկությամբ ու սիրով լի կյանք»:

Սպիվակովի և նրա նվագախմբի շրջագայությունները մշտապես բարեգործական են եղել։ Այս անգամն էլ բացառություն չէր։ Գյումրիում լրագրողների հետ զրույցում մաեստրոն նշեց․ «Այս անգամ Հայաստան ենք եկել՝ «Զինվորի տանը» աջակցելու համար: «Զինվորի տունը» լույս է մթության մեջ։ Հրաշալի բան է, որ, կարծում եմ, ուրիշ ոչ մի տեղ չկա: Ասես աստղ լինի, որը չի թողնում ճանապարհը կորցնեն: Հիացած եմ «Զինվորի տան» մթնոլորտով, միմյանց ու զինվորների նկատմամբ ցուցաբերվող վերաբերմունքից։ Բոլորս հուսով ենք, որ կլինի խաղաղություն»։

Կուլիսներում և հետնաբեմում նրա հետ լուսանկարվելու և Սպիվակովին անձամբ տեսնելու, ձեռքը սեղմելու ցանկություն ունեին շատերը։ Գյումրու թիվ 5 երաժշտական դպրոցի սան, ջութակահար Ռուբեն Մատինյանը Սպիվակովին «Նարեկ» նվիրեց՝ հավատով, որ կրկին հանդիպելու են։

Գյումրիից Վլադիմիր Սպիվակովը հեռացավ հուզված ու տպավորված՝ կրկին վերադառնալու խոստումով։ Մեծ երաժիշտը մինչ համերգի մեկնարկն այցելել էր Գյումրու Սև բերդ-ամրոց, որտեղ գալիք տարում մեծ համերգ է ունենալու։

Հիշեցնենք՝ երեկ՝ նոյեմբերի 28-ին, Գյումրու ավագանին արտահերթ նիստում որոշում էր ընդունել և 2 մլն դրամի հատկացմամբ 200 տոմս ձեռք բերել, որպեսզի դրանք տրամադրվեին երաժշտական դպրոցների սաներին և դասավանդողներին, երաժշտական տարբեր փառատոների ու մրցույթների մրցանակակիրներին ու նրանց ուսուցիչներին։

Նշենք նաև, որ Երևանի Արամ Խաչատրյան համերգասրահում ևս Ռուսաստանի ազգային ֆիլհարմոնիկ նվագախումբը բարեգործական համերգ էր ունեցել, որը ղեկավարել էր աշխարհահռչակ դիրիժոր Վլադիմիր Սպիվակովը: Համերգին ներկա էին գտնվել վարչապետ Նիկոլ Փաշինյանը տիկնոջ՝ Աննա Հակոբյանի հետ, ՀՀ ԿԳՄՍ նախարար Վահրամ Դումանյանը տիկնոջ հետ, Երևանի քաղաքապետը, Մ. Հերացու անվան Երևանի պետական բժշկական համալսարանի ռեկտոր Արմեն Մուրադյանը և այլք: Համերգի տոմսերից ստացված ողջ հասույթը կփոխանցվի «Զինվորի տուն» վերականգնողական կենտրոնին:

Սամսոն Մատինյան