Ադրբեջանցի բնապահպաններ ներկայացող խումբը փակել է Շուշի-Ստեփանակերտ ճանապարհը՝ ներկայացնելով պահանջներ

Ադրբեջանի իշխանությունները շարունակում են կեղծ թեմաներով ուշադրության կենտրոնում հայտնվել՝ փորձելով վախի մթնոլորտ ստեղծել Լեռնային Ղարաբաղի տարածքում և իրենց ներկայացնել խիստ մտահոգ բնապահպանական խնդիրների նկատմամբ:

Այսօր կրկին մի շարք անձինք, որոնց ադրբեջանական լրատվամիջոցները ներկայացնում են որպես հասարակական կազմակերպությունների ներկայացուցիչների, բլոգերների և էկոակտիվիստների, փակել են Շուշի-Ստեփանակերտ ավտոճանապարհը։

Նրանք պահանջում են իրենց թույլ տալ վերահսկել ժամանակավոր տեղակայված ռուս խաղաղապահների պատասխանատվության գոտին, դրա համար պահանջում են, որ իրենց մոտ դուրս գա զորախմբի հրամանատար Անդրեյ Վոլկովը, որի հետ արդեն իսկ ունեցել են հանդիպում այս թեմայի օրակարգով, ընդ որում՝ ընդամենը մի քանի օր առաջ:

Ավելի վաղ հաղորդվել էր, որ, չնայած զորամիավորման ղեկավարության և ադրբեջանական կողմի պայմանավորվածությանը՝ մշտադիտարկում անցկացնել այն տարածքներում, որտեղ տեղակայված է զորախումբը, ադրբեջանցի մասնագետները չէին կարողացել մոնիթորինգ իրականացնել, քանի որ, ինչպես հայտնի է, հանքերի աշխատակիցները և տեղի բնակիչները ինքնաբուխ հավաք էին կազմակերպել և կանխել բնապահպան ներկայացող խմբի մուտքը իրենց աշխատանքային տարածքներ:

Ադրբեջանի պատվիրակությունն այս բողոքին հանդիպելուց հետո հրաժարվել էր կապ հաստատել ԼՂ պետական նախարար Ռուբեն Վարդանյանի հետ և վերադարձել էր Շուշի:

Մոնիթորինգ պետք է իրականացվեր Դրմբոնի և Կաշենի հանքավայրերի տարածքում։ 

Հիշեցնենք՝ դեկտեմբերի 10-ին հիմք ընդունելով Արցախի Հանրապետությունում տեղակայված՝ Ռուսաստանի Դաշնության խաղաղապահ զորակազմի հրամանատարությանը նախապես ուղղված՝ Մարտակերտի շրջանի հանքավայրերում դիտարկում անցկացնելու գրությունը՝ ադրբեջանական կողմը ծրագրել էր իրականացնել այցելություն Դրմբոնի և Կաշենի հանքավայրեր։

Խաղաղապահ զորակազմի հրամանատարությունը, համաձայն իրենց վերադաս մարմինների հրահանգի, թույլատրել էր մեկանգամյա տեսողական այց վերը նշված հանքավայրեր։

Հաշվի առնելով, որ առաջարկված ծրագիրը, սահմանված կարգով, համաձայնեցված չէր եղել Արցախի Հանրապետության իշխանությունների և հանքավայրերը շահագործող կազմակերպության հետ՝ տեղում հանքարդյունաբերական կազմակերպության աշխատակիցները և հարակից համայնքների բնակիչները ինքնաբուխ կերպով արգելափակել էին վերը նշված խմբի մուտքը հանքավայրերի տարածք։

Ստեղծված իրավիճակը հանգուցալուծելու նպատակով հավաքների վայրեր էին մեկնել Արցախի Հանրապետության իշխանությունների ներկայացուցիչներ, որոնց տարած բանակցությունների արդյունքում որոշում էր ընդունվել դադարեցնել հանքավայրերում նախատեսված շրջայցը և այդ հարցին անդրադառնալ լրացուցիչ քննարկումներից հետո։

Ավելի վաղ՝ դեկտեմբերի 7-ին, Արցախի տարածքում ընթացել էին բանակցություններ ռուսական խաղաղապահ զորակազմի հրամանատարության և Ադրբեջանի բնապահպանական կառույցների ներկայացուցիչների միջև: Խոջալուի խաղաղապահների շտաբում  բանակցությունները կայացել էին անձամբ ռուսական խաղաղապահ կոնտինգենտի հրամանատար, գեներալ-մայոր Անդրեյ Վոլկովի հետ։

Ադրբեջանցի մասնագետների խումբն ուղարկվել էր Արցախ՝ իբրև հետաքննելու և վերահսկելու «բնական ռեսուրսների ապօրինի շահագործման և դրա հետ կապված բնապահպանական հետևանքների հետ կապված իրավիճակը»: 

Նախորդ շաբաթ օրը Ադրբեջանի բնապահպանության և բնական պաշարների նախարարությունը հայտնել էր, որ ադրբեջանցի մասնագետների խումբ է ուղարկվել Ղարաբաղ, որտեղ ժամանակավորապես տեղակայված են ռուս խաղաղապահներ, բնական ռեսուրսների ապօրինի շահագործման և անօրինական շահագործման հետ կապված իրավիճակը և հարակից բնապահպանական հետևանքները հետաքննելու և վերահսկելու համար։

Հիշեցնենք՝ դեկտեմբերի 3-ին Արցախի տեղեկատվական շտաբից հայտնել էին, որ Շուշի-Քարին տակ խաչմերուկի հատվածում քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել էին Ստեփանակերտ-Գորիս մայրուղին:  

Ադրբեջանական կողմի հետ ավելի քան երեք ժամ տևած բանակցություններն ավելի ուշ տվել էին դրական արդյունք. Արցախը Հայաստանին կապող միակ մայրուղին երկկողմանի բացվել էր բոլոր տեսակի տրանսպորտային միջոցների երթևեկության համար: 

Արցախի Հանրապետության բնապահպանության կոմիտեն հայտարարություն էր տարածել՝ արձագանքելով ընդերքի և բնապահպանական հարցերի վերաբերյալ ադրբեջանական շահարկումներին և հայտնել, որ Արցախում պատշաճ կերպով վերահսկվում է ընդերքօգտագործողների գործունեությունը: