Օդանավակայանը պետք է գործարկվի, անհրաժեշտ է օդային միջանցք՝ մարդասիրական բեռներով ինքնաթիռների համար. Վարդանյան

Լեռնային Ղարաբաղում ստեղծված հումանիտար ճգնաժամին շարունակում են անդրադառնալ բազմաթիվ արտասահմանյան լրատվամիջոցներ՝ վերլուծելով իրավիճակը կամ խոսելով կողմերի այս կամ այն ներկայացուցչի հետ:

Իրավիճակի մասին հոդված է հրապարակել նաև ռուսական «Կոմմերսանտ» պարբերականը: Նա ներկայացրել է, որ բնապահպանական ակցիաների հետևանքով Լեռնային Ղարաբաղը մնացել է ամբողջական շրջափակման մեջ, բացի այդ, դադարեցվել է Ղարաբաղի գազամատակարարումը:

Ադրբեջանական «Ազերիգազ» ընկերությունը հայտարարություն է տարածել այն մասին, որ հայկական կողմի մեղադրանքներն անհիմն են, քանի որ «Ազերիգազ»-ը չի սպասարկում Ղարաբաղի տարածքով անցնող գազատարը, այն սպասարկվում է Հայաստանի Հանրապետության կողմից, որին էլ հենց պետք է ուղղվեն մեղադրանքները:

Պաշտոնական Ստեփանակերտը, սակայն, պնդում է, որ գազի անջատման պատասխանատուն հենց Բաքուն է։

«Ինչ ուզում են, կարող են ասել։ Խողովակաշարն անցնում է նրանց վերահսկողության տակ գտնվող տարածքով։ Ես չեմ հավատում նման զուգադիպություններին, որ պատահական պատահար է տեղի ունեցել։ Այս տարի արդեն երկրորդ անգամն է (ավելի վաղ գազը անջատվել էր մարտին)»,- «Կոմմերսանտ»-ին ասել է ԼՂՀ կառավարության ղեկավար Ռուբեն Վարդանյանը, որը աշնանը Մոսկվայից Ստեփանակերտ է տեղափոխվել և վարչապետի պաշտոնը ստանձնել նոյեմբերի սկզբին։

Նա հանրապետությունում տիրող ընդհանուր իրավիճակը բնութագրել է այսպես.

«Ռուսաստանի ընթերցողներին հասկանալի դարձնելու համար. ներկայիս իրավիճակը նման է Լենինգրադի շրջափակմանը, երբ փակվեց «կյանքի ճանապարհը»։ Մեկ այլ օրինակ է Արևմտյան Բեռլինի տարբերակը, որտեղ ածուխը տեղափոխվում էր ինքնաթիռներով (խոսքը 1948-1949 թվականներին ԽՍՀՄ գործողությունների մասին է):

Վարդանյանը հույս է հայտնել, որ ԼՂՀ իշխանությունները «կկարողանան նաև օդային միջանցք կազմակերպել և բեռներ ընդունել Ստեփանակերտի օդանավակայանում»։

«Մենք դեռ ունենք էլեկտրաէներգիա և հեռախոսակապ, բայց այն պահը, երբ մենք կարող ենք կորցնել դա, մոտ է։ Հիմա 120 հազար մարդ, որից՝ 30 հազարը երեխա, բառացիորեն կտրված է ամեն ինչից։ Բայց միևնույն ժամանակ ամեն ինչ աշխատում է, գործում, մենք ունենք աննկուն կամք՝ հաղթահարելու ամեն ինչ»,- ասել է ԼՂՀ կառավարության ղեկավարը։

«Մենք կառուցում ենք մի համակարգ, որն անհրաժեշտ է բնակչությանը ամբողջական շրջափակման պայմաններում ապահովելու համար։ Օդանավակայանը պետք է գործարկվի. սրա համար անհրաժեշտ է միջազգային կառույցների և բոլոր երկրների ճնշումը, որպեսզի մարդասիրական միջանցք հայտնվի, և մարդասիրական բեռներով ինքնաթիռները կարողանան վայրէջք կատարել Ստեփանակերտի օդանավակայանում։ Սա Ադրբեջանից կախված չլինելու միակ միջոցն է։

Մեզ պետք է միջազգային պայմանագիր, որը թույլ կտա մարդասիրական ինքնաթիռներին ուղևորվել Արցախ: Սա մեզ՝ որպես համայնքի, այստեղ պահելու կարևոր պայման է, որպեսզի նման իրավիճակները չկրկնվեն: Օդանավակայանը այժմ լիովին գործում է»,- ասել է պաշտոնյան։

Արդեն երեք օր է՝ Ադրբեջանի իշխանությունները կեղծ բնապահպանական ցույցերի անվան տակ քաղաքացիական հագուստով մեծաթիվ մարդկանցով փակ են պահում Արցախն աշխարհին կապող միակ ավտոճանապարհը՝ Լաչինի միջանցքը: Բնապահպան ներկայացող անձինք նստացույց են հայտարարել, վրաններ տեղադրել՝ թույլ չտալով մարդկանց հասնել իրենց բնակավայրեր: Նրանց թիվը գնալով ավելանում է, քանի որ Բաքուն քաղաքացիներ է տեղափոխում ավտոբուսներով:

3 օր շարունակ փաստացի շրջափակման մեջ է 120 հազար մարդ, ընդ որում՝ 30 հազար երեխա: Մի քանի հազար մարդ չի կարողանում հասնել տուն, նրանք ժամանակավոր տեղավորվել են Գորիսի և մոտակա համայնքների կացարաններում:

Ադրբեջանցիները խափանել են նաև Արցախը սնուցող գազատարի աշխատանքը: Պատկան մարմինների փոխանցմամբ՝ դադարեցվել է դասապրոցեսը դպրոցներում, որոնք ջեռուցվում են գազով, երեկվանից Արցախի ամբողջ տարածքում անցել են խնայողական ռեժիմի:

Հնարավոր չէ կազմակերպել մի շարք ծանր և ծայրահեղ ծանր վիճակում գտնվող հիվանդների տեղափոխումը Երևանի բուժհաստատություններ, Ստեփանակերտ չեն տեղափոխվում դեղորայք, սնունդ: Ու թեև նշվածի պաշարներ դեռևս կան Արցախում, սակայն դրանք կարող են բավարարել կարճ ժամանակ միայն: