Ինչ հնարավոր էր անել մեր ունեցած բյուջեով, արվել է. Փելեշյանը՝ պաշտոնավարման 6 ամսվա ընթացքում արված աշխատանքի մասին

Օրերս լրացավ Վանաձոր համայնքի ղեկավարի պաշտոնակատար Արկադի Փելեշյանի պաշտոնավարման 6 ամիսը: Պաշտոնավարման ընթացքում եղած խնդիրների, դրանց լուծման ուղիների ու հետագա անելիքների շուրջ նրա հետ «Հայկական ժամանակ»-ի զրույցը՝ ստորեւ.

- Պարոն Փելեշյան, լրացավ Ձեր՝ որպես Վանաձոր խոշորացված համայնքի ղեկավարի պաշտոնակատարի պաշտոնավարման 6 ամիսը: Ինչպե՞ս կգնահատեք այս ընթացքը:

- Նախ ասեմ, որ երբ նշանակվեցի, համայնքի ավագանու նիստեր չէին գումարվում, համայնքապետարանն ստիպված էր աշխատել նախորդ տարվա բյուջեի համամասնությամբ: Բայց սա մեզ չխանգարեց, որ լուծումներ տանք այնպիսի խնդիրների, որոնց լուծմանը իսկապես ոչ ոք չէր հավատում: Դրանց ամենակարեւորը թերեւս Վանաձորի Աղայան փողոցի հիմնանորոգման դադարեցված ծրագիրն էր: Սուբվենցիոն ծրագրով իրականացվող հիմնանորոգման աշխատանքները կանգ էին առել, քանի որ համայնքապետարանը չէր կարողանում վճարել իր մասնաբաժինը: Իմ նշանակումից 10 օր հետո աշխատանքները մեկնարկեցին: Անձնական կապերի, բանակցությունների ու քննարկումների արդյունքում մենք հասանք նրան, որ այսօր քաղաքի ամենաբանուկ փողոցների ասֆալտապատումն ամբողջությամբ ավարտված է:

- Վանաձորը դարձավ խոշորացված համայնք, համայնքին միացավ 3 գյուղական բնակավայր: Ի՞նչ խնդիրների հասցրիք ծանոթանալ, եւ որո՞նք լուծվեցին Ձեր պաշտոնավարման 6 ամիսների ընթացքում:

- Ամիսներ շարունակ գյուղական համայնքներում փաստացի աղբահանություն չէր իրականացվում, խնդիրն ամբողջությամբ կարգավորված է: Շուրջ 15 հազար քմ  ասֆալտապատման եւ փոսային նորոգման աշխատանքներ ենք իրականացրել համայնքի բյուջեով: Ուշադրության կենտրոնում են եղել նաեւ փոսային նորոգման, լուսավորության, կանաչապատման խնդիրները, որոնք հնարավորության սահմաններում փորձել եմ լուծում տալ: Բազմաթիվ ընթացիկ աշխատանքներ են կատարվել, մեծամասշտաբ սպորտային ու մշակութային միջոցառումներ են իրականացվել: Համայնքապետարանը աջակցել է բազմաթիվ մարզիկների՝ եվրոպական երկրներում տարբեր մարզաձեւերում ներկայանալու եւ հաջողություններով վերադառնալուն:

Այն, ինչ հնարավոր էր անել մեր ունեցած բյուջեով ու հնարավորություններով, վստահաբար, կարող եմ ասել, որ արվել է: Բայց դա չի նշանակում, որ Վանաձոր խոշորացված համայնքի խնդիրներն ամբողջությամբ լուծվել են, անելիքներ դեռ շատ կան, որոնց լուծումը միանշանակ ազգաբնակչությունը զգալու է մոտ ժամանակներում:

- Օրեր առաջ երկար դադարից հետո վերջապես գումարվեց ավագանու նիստը, հաստատվեց համայնքի բյուջեն: Ինչպե՞ս եք գնահատում սա:

- Ես իսկապես, առիթն օգտագործելով, ցանկանում եմ մեկ անգամ եւս շնորհակալություն հայտնել ավագանու այն երկու անդամներին, ովքեր քաղաքի շահը վեր դասեցին անձնական ու քաղաքական հարցերից ու եկան նիստին: Եթե դա արվեր ավելի վաղ, համայնքում այսօր շատ ավելի շատ խնդիրներ լուծված կլինեին:

- Հաջորդ տարի սուբվենցիոն ծրագրերով նախատեսվում է ավելի քան 2.5 մլրդ դրամի աշխատանքներ կատարել համայնքում: Արդյոք բավարա՞ր եք գնահատում մարզային ու պետական իշխանությունների ուշադրությունը Վանաձոր խոշորացված համայնքին:

- Վստահաբար կարող եմ ասել, որ թե՛ Լոռու մարզպետը, թե՛ տարածքային կառավարման եւ ենթակառուցվածքների զարգացման նախարարն ու թե՛ վարչապետ Նիկոլ Փաշինյանը ջանք ու եռանդ չեն խնայում համայնքի խնդիրներին հնարավորինս շուտ լուծումներ տալու հարցում: Մենք բազմիցս քննարկումներ ենք ունենում թե՛ մարզպետի, թե՛ Կառավարության հետ, ինչի համար մեկ անգամ եւս շնորհակալություն եմ հայտնում թե՛ իմ եւ թե՛ ազգաբնակչության անունից: Ես առավել քան վստահ եմ, որ կարճ ժամանակ անց մենք ունենալու ենք ավելի բարեկարգ համայնք: