ԱՄՆ-ն ամեն ինչ անում է հակամարտությունը երկարացնելու և այն ավելի կատաղի դարձնելու համար. Լավրով

Հավաքական Արևմուտքի երկրների և նրանց վերահսկողության տակ գտնվող Զելենսկու գործողությունները հաստատում են ուկրաինական ճգնաժամի գլոբալ բնույթը։ Այլևս ոչ մեկի համար գաղտնիք չէ, որ ԱՄՆ-ի և ՆԱՏՕ-ի նրա դաշնակիցների ռազմավարական նպատակը «ռազմի դաշտում Ռուսաստանի նկատմամբ հաղթանակն է»՝ որպես մեր երկիրը էականորեն թուլացնելու կամ նույնիսկ ոչնչացնելու մեխանիզմ։ Հանուն այս նպատակին հասնելու մեր մրցակիցները շատ բանի են պատրաստ։

Այս մասին ասել է ՌԴ ԱԳ նախարար Սերգեյ Լավրովը ՏԱՍՍ-ին տված հարցազրույցում՝ գնահատական տալով Ուկրաինայում տիրող իրավիճակին և իրադարձությունների զարգացմանը:

Ըստ Լավրովի՝ «թեժ հակամարտության» հիմնական շահառուն ԱՄՆ-ն է, որը ձգտում է դրանից առավելագույն օգուտ քաղել թե՛ տնտեսական, թե՛ ռազմա-ռազմավարական առումներով։ Միաժամանակ, Վաշինգտոնը լուծում է նաև աշխարհաքաղաքական կարևոր խնդիր՝ խզել Ռուսաստանի և Եվրոպայի ավանդական կապերը։

«ԱՄՆ-ն ամեն ինչ անում է հակամարտությունը երկարացնելու և այն ավելի կատաղի դարձնելու համար։ Պենտագոնը բացահայտորեն ծրագրում է պատվերներ ամերիկյան պաշտպանական արդյունաբերության համար գալիք տարիների համար՝ անընդհատ բարձրացնելով ռազմական ծախսերը Ուկրաինայի զինված ուժերի կարիքների համար և նույնը պահանջելով հակառուսական դաշինքի մյուս անդամներից: Կիևի ռեժիմը միտումնավոր համալրվու է ամենաժամանակակից զենքերով, ներառյալ՝ նմուշներ, որոնք դեռ չեն ընդունվել հենց արևմտյան բանակների կողմից, ըստ երևույթին, որպեսզի տեսնեն, թե ինչպես են նրանք աշխատում մարտական պայմաններում: Այս տարվա փետրվարից Ուկրաինային տրամադրվող ռազմական օգնության ծավալը գերազանցել է 40 միլիարդ դոլարը, ինչը համեմատելի է եվրոպական շատ երկրների ռազմական բյուջեների հետ։ Մենք նաև գիտենք, որ ամերիկյան քաղաքական շրջանակները գնալով ավելի շատ են մտածում Ուկրաինային ՆԱՏՕ-ի մեջ ներքաշելու մասին»,- ասել է Լավրովը:

Նա նշել է, որ շարունակում են Արևմուտքին կոչ անել առավելագույն զսպվածություն ցուցաբերել։ Ըստ Լավրովի՝ միջուկային ռիսկերը նվազագույնի հասցնելու համար գործնականում կարևոր է պահպանել հավատարմությունը միջուկային պատերազմի անթույլատրելիության պոստուլատին, որը հաստատվել է միջուկային «հնգյակի» երկրների կողմից 2022 թվականի հունվարի 3-ի համատեղ հայտարարության մեջ։ Փաստաթղթում ամրագրված տրամաբանության համաձայն՝ անհրաժեշտ է կանխել միջուկային տերությունների միջև ցանկացած ռազմական առճակատում, քանի որ այն հղի է աղետով։

«Անկասկած, Եվրամիության հետ մեր հարաբերություններն այժմ գտնվում են պատմական ամենացածր մակարդակի վրա։ Պատճառները հայտնի են. ԵՄ-ն Բրյուսելում հատուկ ռազմական գործողության մեկնարկից հետո ԱՄՆ-ին և ՆԱՏՕ-ին հետևելով, փաստորեն,  հիբրիդային պատերազմ հայտարարեցին մեր դեմ։ ԵՄ դիվանագիտության ղեկավար Ժոզեպ Բորելը առաջիններից մեկն էր, ով ասաց, որ Ռուսաստանին պետք է հաղթել մարտի դաշտում։

Մենք տեսնում ենք, թե ինչպես են ԵՄ երկրների իշխող շրջանակները գործում ի վնաս իրենց քաղաքացիների կենսական շահերի և բարեկեցության։ Իրականում նրանք անկասկած հետևում են արտերկրի հեգեմոնի հակառուսական կուրսին գրեթե բոլոր հարցերում և երբեմն նույնիսկ առաջ են դուրս գալիս: Այստեղ օրինակները շատ են: Բավական է նշել ԱՄՆ-ի արգելքը եվրոպական երկրներին էներգետիկ ոլորտում մեր երկրի հետ երկխոսություն պահպանելու համար, որը տասնամյակներ շարունակ եվրոպացիներին ապահովել է աննախադեպ բարգավաճում»,- ասել է ՌԴ ԱԳՆ ղեկավարը։