Վրաստանը մեր քաղաքականությունների համար առաջնահերթություն է, նրա և ԱՄՆ-ի հետ պետք է մշակել ռեգիոնալ խաղաղության նախագծեր

Քաղաքական գործիչ, «Հանուն հանրապետության» կուսակցության առաջնորդ Արման Բաբաջանյանի կարծիքով՝ Վրաստանը Հայաստանի բոլոր քաղաքականությունների համար բացարձակ առաջնահերթություն է։ Ըստ նրա՝ տարածաշրջանում բոլորովին նոր խաղացողներ են ի հայտ գալու, եւ կարեւոր է, որ ՀՀ-ն եւ Վրաստանը, որպես զարգացող ժողովրդավարություններ, լինեն ռազմավարական դաշնակիցներ։ 

Բաբաջանյանը վերջերս քաղաքական նպատակներով իր կուսակցության անդամների հետ այց էր ունեցել Վրաստան։ Այս համատեքստում նրա հետ «Հայկական ժամանակ»-ի զրույցը՝ ստորեւ․ 

- Պարոն Բաբաջանյան, վերջերս Ձեր գլխավորած կուսակցության պատվիրակությունը այցելել էր Վրաստանի մայրաքաղաք։ Ի՞նչ նպատակով էիք այնտեղ, ո՞րն էր այցի օրակարգը։

- Դեռ 2021-ի ընտրություններին նախապատրաստվելիս մեր կուսակցությունը, առաջնահերթություն համարելով Հայաստանի բոլոր քաղաքականությունների՝ օր առաջ դիվերսիֆիկացման անհրաժեշտությունը, Վրաստանի հետ երկկողմ հարաբերությունները գնահատեց որպես կենսական կարեւորության հարաբերություններ։ Միեւնույն ժամանակ, այն հարաբերությունները, որոնք ներկայումս կան Հայաստանի եւ Վրաստանի միջեւ, որքան էլ որ դրանք աննախադեպ զարգացում են ապրում, այնուամենայնիվ, այլեւս չեն համապատասխանում տարածաշրջանում տեղի ունեցած եւ անխուսափելիորեն տեղի ունենալիք փոփոխություններին՝ ո՛չ իրենց բովանդակությամբ, ո՛չ մակարդակով։ Ուստի, դեռ մինչեւ մեր այցը հրապարակայնորեն մենք բազմիցս շեշտել էինք այդ մասին։

- Ի՞նչպես եք գնահատում Հայաստանի իշխանությունների որդեգրած քաղաքականությունը Վրաստանի ուղղությամբ։ Տպավորություն կա, որ հայ-վրացական հարաբերությունները շատ դինամիկ եւ արդյունավետ զարգացում են ապրում։

- Իհարկե, դեկտեմբերին կատարվեց պատմական նշանակության քայլ․ մեր քաղաքացիներն օրեր անց կարող են փոխադարձ այցելություններ կատարել միայն նույնականացման քարտերով, ինչը չափազանց կարեւոր է հայկական եւ վրացական հասարակությունների միջեւ հորիզոնական կապերի, բիզնեսի, առեւտրատնտեսական համագործակցության զարգացման տեսակետից։ Սա վկայում է մեր երկրների միջեւ փոխադարձ վստահության առանձնահատուկ մակարդակի մասին, որը հուսալի հիմք է՝ հարաբերություններին ռազմավարական բովանդակություն եւ մակարդակ հաղորդելու համար։ Ահա այս տեսլականն է, որ հետպատերազմական շրջանում ներկայացրել ենք հրապարակայնորեն՝ թե՛ մեր նախընտրական ելույթներում, թե՛ վրացական դիվանագիտական եւ փորձագիտական շրջանակների հետ իմ եւ մեր Քաղխորհրդի այլ անդամների շփումներում։ Ուստի, անհրաժեշտություն առաջացավ հարցերի այս շրջանակը քննարկել նաեւ Թբիլիսիում մեր վրացի գործընկերների հետ՝ թե՛ պաշտոնական, թե՛ փորձագիտական մակարդակում։

- Ըստ Ձեզ՝ որքա՞ն հաջողված էր այցը Թբիլիսի։ Ինչպե՞ս կգնահատեք այն։ 

- Այցն ավելի քան հաջողված կարելի է համարել, քանի որ քննարկումներն ընթանում էին համախոհության, մտահոգությունների, մարտահրավերների փոխադարձ ըմբռնման մթնոլորտում։ Վրաստանում հասցրինք մի քանի կարեւոր գաղափարներ շրջանառել եւ հասկանալ պաշտոնական Թբիլիսիի ընկալումները ոչ միայն Հայաստանի եւ Վրաստանի միջեւ երկկողմ, այլեւ Հայաստան-Վրաստան-ԱՄՆ եռակողմ հնարավոր համագործակցության հեռանկարները շատ որոշակի, տարածաշրջանի խաղաղությանն ու կայունությանը միտված ստրատեգիական նախագծերի շուրջ, այդ թվում՝ Հայաստանի եւ Վրաստանի ռեգիոնների միջեւ համագործակցության հեռանկարը նկատի առնելով։

Մեր նախաձեռնությամբ պայմանավորվածություն ձեռք բերեցինք ս․թ․ մարտ ամսին Երեւանում՝ «Ժողովրդավարության եւ անվտանգության հայկական կենտրոն»-ում, կազմակերպել «Չաթեմ հաուս» սկզբունքով քննարկում հայ-վրացական հարաբերությունների ողջ համալիրի վերաբերյալ։ Բացի դրանից, նախանշել ենք մայիս-հունիս ամիսներին Հայաստանում կազմակերպել հայ-վրացական հարաբերությունների թեմայով կոնֆերանս՝ մասնակցությամբ երկու երկրների պաշտոնական ներկայացուցիչների, փորձագետների, հասարակական գործիչների։

- Հաշվի առնելով տարածաշրջանային բարդագույն իրողությունները, լոկալ և գլոբալ մակարդակի մարտահրավերները՝ ինչպիսի՞ն եք տեսնում Հայաստանի և Վրաստանի միջև հարաբերությունների հեռանկարն ու ապագան։

- Վաղվա աշխարհակարգում, որտեղ Ռուսաստանի դերը շեշտակիորեն նվազելու է, և մեր տարածաշրջանում բոլորովին նոր խաղացողներ են ի հայտ գալու, բացարձակապես ակնհայտ է, որ այդ նոր ձևավորվող ու կազմավորվող տարածաշրջանում Հայաստանը եւ Վրաստանը, որպես զարգացող ժողովրդավարություններ, լինեն ռազմավարական դաշնակիցներ, որոնց միավորում է ոչ միայն բարիդրացիության բազմադարյա անցյալի փորձը՝ պատմության դասագրքի առաջին իսկ էջից, եղբայրական դրացիությունը, այլև ստրատեգիական համատեղ ծրագրերը և ընդհանուր ապագային միտված նախագծերը։

 - Դուք խոսեցիք Հայաստանի համար Վրաստանի կարևորության մասին։ Իսկ Վրաստանում կա՞ Հայաստանի կարևորության վերաբերյալ նույնական ընկալում։

- Անխոս, Հայաստանը չափազանց կարևոր, ստրատեգիական ուղղություն է Վրաստանի և իշխանությունների և ընդդիմության համար։ Հայաստանը մի շարք ժողովրդավարական ցուցիչներով շարունակում է առաջ անցնել Վրաստանից։ Արժեքային ընդհանրությունը մեզ ավելի շատ ոչ թե մրցակից է դարձնում, այլ դաշնակից՝ հիմնված ընդհանուր նպատակների վրա։ Թբիլիսիում հասկանում են, որ Հայաստանի անկումը կործանարար կարող է լինել Վրաստանի համար։ Վրացական ուղղությունը մեր բոլոր քաղաքականությունների համար բացարձակ առաջնահերթություն է՝ հաշվի առնելով այն փոփոխությունները, որոնք աշխարհում եւ մեր տարածաշրջանում դեռ պետք է տեղի ունենան անխուսափելիորեն, հաշվի առնելով ռուս-ուկրաինական պատերազմի այն դինամիկան, որը նախանշվել է ս․թ․ հունվարին ԱՄՆ-ի եւ նրա դաշնակիցների ընդունած պատմական որոշումներով՝ տրամադրել Ուկրաինային տանկեր, մարտական ինքնաթիռներ, հեռահար հրետանի եւ հրթիռներ, ահռելի քանակի ռազմամթերք այդ սպառազինության համար եւ այլն։

Մենք եւ Վրաստանը մեծածավալ համատեղ աշխատանք ունենք անելու բոլոր մակարդակներում՝ կառավարական, ոչ կառավարական, կուսակցությունների, հասարակությունների, մասնագիտական խմբերի, քաղաքացիների։ Եվ մեր կուսակցությունն այդ՝ սերունդների բարեկեցությանն ուղղված աշխատանքի իր մասը պատվով կատարելու հանձնառությանը վերաբերվում է մեծագույն պատասխանատվությամբ։