Դասական երաժշտության պատմության նոր էջ Գյումրիում․ առաջին անգամ քաղաքը կամերային երաժշտության դահլիճ ունեցավ

Մշակութային Գյումրին այսօրվանից ևս մեկ նոր և կարևոր ասելիք ունի. երկար սպասված վարագույր է բացվել. մշակութային մայրաքաղաքն ունեցավ Կամերային երաժշտության դահլիճ։

Գյումրու քաղաքապետարանի Մշակույթի և երիտասարդության հարցերի բաժնի պետ Լիլիթ Թովմասյանի առաջարկությամբ և նախկին համայնքապետ Սամվել Բալասանյանի համաձայնությամբ այն ստեղծվել ու կգործի Գյումրու թիվ 4 երաժշտական դպրոցի շենքում։

«Սա նշանակալի իրադարձություն է Գյումրիի համար, որովհետև եթե խոսում ենք մշակութային մայրաքաղաքի մասին, պետք է վստահաբար համոզված լինենք, որ համապատասխան միջավայրը ևս ունենք։ Վստահ եմ, որ Գյումրու կամերային դահլիճը դառնալու է սպասված հանդիպումների հանգրվան, այստեղ ելույթ են ունենալու հայ և միջազգային ճանաչում ունեցող հայտնի երաժիշտներ, որոնք մինչ այս պահը հրաժարվում էին ելույթ ունենալ՝ համապատասխան դահլիճի, գործիքի կամ միջավայրի բացակայության պատճառով։ Այսօրվանից հետո դասական երաժշտության պատմության նոր էջ ենք գրելու Գյումրիում»,- ասաց Թովմասյանը։

Ինչո՞ւ է հենց այս երաժշտական դպրոցն ընտրվել, «Հայկական ժամանակ»-ի հետ զրույցում Գյումրու քաղաքապետարանի Մշակույթի և երիտասարդության հարցերի բաժնի պետ Լիլիթ Թովմասյանն ասաց՝ հիմնովին նոր շենք կառուցելու համար վերապրոֆիլման վրա ծախսված գումարից տասնապատիկ ավելին կպահանջվեր, իսկ Գյումրու բյուջեն, հատկապես՝ մշակութային, սիմվոլիկ թվերով է սահմանափակվում։

Ընտրել են խորհրդային տարիներին կառուցված տիպային երաժշտական դպրոցի շենքը, քանի որ դահլիճը բոլոր չափորոշիչներով համապատասխանել է կամերայինի պահանջներին։

«Ե՛վ աթոռների քանակով, և՛ բեմի չափով, ակուստիկ հնարավորություններով, նախասրահի, միջանցքի, հետնաբեմի, կուլիսի առկայությամբ, նաև՝ քաղաքում զբաղեցրած տեղով ու դիրքով։ Սա է պատճառը, որ ընտրեցինք խորհրդային տարիներին ամբողջ ծավալով աշխատած այս դպրոցի դահլիճը»,- ասաց Թովմասյանը։

Դահլիճի վերապրոֆիլավորման, նորոգման և վերազինման համար համայնքային բյուջեից 3 փուլով հատկացվել է 33 միլիոն դրամ։ 2021 թվականի հունիսին դահլիճի նորոգման և արդիականացման համար հատկացվել է 20 մլն դրամ, նույն տարվա սեպտեմբերին ևս 5 մլն դրամ է տրվել դահլիճի ջեռուցման համակարգի անցկացման համար։

Դահլիճի նախասրահի վերանորոգման գումարը՝ 8 մլն դրամը, 2022 թվականի մայիսին է տրամադրվել։ Արդյունքում ստացվել է դասական երաժշտության համերգների կազմակերպման հարթակ, որն ունի ժամանակակից միջավայր, պրոֆեսիոնալ չափանիշներին համապատասխան լուծումներ, նվագախմբերի ու երգչախմբերի պահանջները բավարարող ընդարձակ բեմահարթակ:

Դահլիճում հանդիսականի աթոռների քանակը 200-250 է։

«Դասական երաժշտությունն ունեցավ իր տունը Գյումրիում, այստեղ ապրելու է այն։ Ինչպես Մերկուրովը կասեր՝ էս քաղաքում նույնիսկ կոշկակարն իր արհեստի մեջ խուդոժնիկի պես բան է։ Գյումրին այս հանգրվանը պետք է վաղուց ունենար»,- նշեց Կոմիտասի անվան պետական կոնսերվատորիայի Գյումրու մասնաճյուղի ղեկավար Հասմիկ Հարությունյանը։

Նա շնորհակալական խոսքից հետո դիմեց Գյումրու համայնքապետ Վարդգես Սամսոնյանին՝ տեղեկացնելով, որ երաժիշտներն այս դահլիճի բացումից հետո ակնկալում են ֆիլհարմոնիկի մեծ դահլիճի հիմնարկեքը։

Այս պահին Կամերային դահլիճը գործելու է հենց նույն երաժշտական դպրոցի կազմում, չունի առանձին տնօրեն։

Պատասխանատվությունն ու պարտավորությունները, ըստ պատասխանատուի, դրվել են թիվ 4 երաժշտական դպրոցի տնօրենի վրա։ Թովմասյանի խոսքով՝ ժամանակը ցույց կտա՝ պե՞տք է արդյոք այս հարցում նոր լուծում, թե՞ ոչ։ Եթե զգան անհրաժեշտություն կա, քայլեր կձեռնարկեն։

Գյումրու կամերային երաժշտության դահլիճը կսպասարկի քաղաքի բոլոր՝ դպրոցական, միջին մասնագիտական, բարձրագույն մասնագիտական կրթության օղակների կարևորագույն համերգները, կընդունի հայ և արտասահմանյան հայտնի երաժիշտների ու երաժշտական նվագախմբերի, պատշաճ միջավայրում կանցկացնի երաժշտական մասշտաբային փառատոներ, որակական նոր նշաձող կսահմանի քաղաքում դասական երաժշտության համերգների կազմակերպման ոլորտում։

Այն, ըստ Լիլիթ Թովմասյանի, կդառնա կարևոր համագործակցությունների ու փորձի փոխանակման փնտրված հարթակ՝ նոր շունչ բերելով քաղաքի երաժշտական-մշակութային կյանքին:

Իսկ այսօր բեմում էին Գյումրու պետական երաժշտական խմբերը, նորաստեղծ մանկապատանեկան համույթները, դպրոցական, միջին մասնագիտական և բարձրագույն երաժշտական հաստատությունների ներկայացուցիչները։

Կամերային դահլիճի բացման համերգային մեկնարկի կուլմինացիոն պահը թերևս եղավ 120 հոգանոց աշակերտական միասնական երգչախմբի համատեղ ելույթը։

«Սրանով ուզում ենք ցույց տալ, որ այն մշակութային ներուժը, որն ունի Գյումրին, և շատ հաճախ համապատասխան միջավայրի պատճառով ոչ ճիշտ տեղում, կամ ոչ պատշաճ է ներկայացվել, այսուհետև ունի նաև այդ հնարավորությունը, և հետագա բոլոր միջոցառումներն իրենց որակով տարբերվելու են»,- վստահեցրեց Թովմասյանը։

Սամսոն Մատինյան

Լուսանկարները՝ «Հայկական ժամանակ»-ի