Որքան գումար է ծախսվել մայրաքաղաքում 2500 ծառ փոխարինելու համար, և ինչ են արվում կտրված ծառերը

Վերջին օրերին հասարակության շրջանում և առցանց տիրույթում ամենաքննարկվող հարցերից մեկը մայրաքաղաքում իրականացվող ծառահատումներն են, որոնց մի մասը փոխարինվելու են սակուրա տեսակի ծառերով:

Երևանի քաղաքապետարանի «Կանաչապատման և շրջակա միջավայրի պահպանության» ՀՈԱԿ-ի տնօրեն Արմեն Բեգոյանի խոսքով՝ պատճառներից մեկն այն է, որ լրատվամիջոցներով ուղղորդված խեղաթյուրում են իրականությունը. «Նշում են, որ հարյուր քանի միլիոն տվել, ձեռք են բերել 100 հատ սակուրա: Շատ կարևոր է, որ այդ հարյուր քանի միլիոնը տվել ենք 2500 ծառ ձեռք բերելու համար, որոնց մատակարարումները դեռ չեն ավարտվել: Դրանցից ընդամենը 150 են սակուրա՝ նախատեսված Մոսկովյան փողոցի, Օղակաձև այգու և տարբեր պուրակների համար:

«Կանաչապատման և շրջակա միջավայրի պահպանության» ՀՈԱԿ-ի տնօրենը նաև մանրամասնեց, թե ինչու սակուրա և հենց Մոսկովյան փողոցում:

«Ճարտարապետների և դիզայներների տեղադիտման և չափումների արդյունքում պարզվեց, որ փողոցի լայնությունը ծառի բնաբաժակից մինչև շենքի պատը կազմում է 1 մետրից 1,20 սանտիմետր, ուստի հանձնաժողովն անմիջապես որոշեց՝ այդտեղ կա՛մ պետք է տնկվի համեմատաբար փոքր սաղարթով ծառ, կա՛մ ընդհանրապես չտնկվի:
Այդ ծառերի երկու թեկնածություն առաջարկվեց, մեկը՝ սակուրաները, մյուսը՝ գնդաձև կատալպաները: Եվ քանի որ Մոսկովյան փողոցի մի մասը՝ Սարյան գնացող հատվածը, արդեն իսկ պատված է սակուրաներով, և քանի որ մենք ուզում ենք գրագետ կանաչապատում իրականացնել, ապա որոշումը դեպի սակուրան հանգեցրեց»,- նշեց նա:

Բեգոյանի խոսքով՝ ըստ դիզայներների և ճարտարապետների բերած երրորդ փաստարկի՝ սակուրան վարդագույն ծաղիկներ ունի, և տեղին կլինի վարդագույն քաղաքը նախագծող ճարտարապետի արձանի դիմացի փողոցը պատված լինի ծառերով, որոնք ծաղկման շրջանում գեղեցիկ վարդագույն տեսք կհաղորդեն այդ հատվածին:

Նա նաև շեշտեց, որ այդտեղ ավելի մեծ սաղարթով ծառեր տնկելն անգրագիտություն է, քանի որ մեծ սաղարթով ծառն ունի ավելի հզոր արմատային համակարգ, և շենքից մեկ մետր հեռավորության վրա տեղադրելու դեպքում այդ ճարտարապետական մեծ նշանակություն ունեցող շենքերի հիմքերը մի քանի տարուց կքանդվեն:

«Կանաչապատման և շրջակա միջավայրի պահպանության» ՀՈԱԿ-ի տնօրենի խոսքով՝ Մոսկովյան փողոցում ծառատնկման աշխատանքներին նախորդել են ոռոգման ջրի անցկացման աշխատանքները. «Այն այս պահին միացված չէ, սպասում ենք, որ «Երևան ջրի» կողմից սկսվի քաղաքի ջրամատակարարումը, որպեսզի կարողանանք միացում տալ և համոզվել, որ նորմալ է ամեն ինչ: Միացումը տալուց հետո այդ բոլոր ծառերի բնաբաժակներում կլինեն ջրող հատուկ ծորակներ»,- ասաց նա:

Խոսելով կտրված ծառերից և էտից առաջացած փայտանյութի մասին՝ Բեգոյանը նշեց, որ ինչպես միշտ, դրանք տրամադրում են սոցիալական ծառայություններին, որոնք այն բաժանում են անապահով ընտանիքներին:

«Յուրաքանչյուր վարչական շրջան ունի իր սոցիալական ծառայությունը, և այնտեղ ինչ-ինչ չափորոշիչներով ընտրվում են անապահով ընտանիքները: Այդ սոցիալական ծառայությունները ձմռան շեմին, աշնանը Երևանի քաղաքապետարանին ներկայացնում են ցուցակ, որպեսզի ստանան համապատասխան չափի փայտանյութ:
Այնուհետև այդ ցուցակները փոխանցվում են մեզ, և մենք, ըստ վարչական շրջանների ներկայացրած պահանջների, սոցիալական ծառայություններին տրամադրում ենք փայտանյութ: Պայմանական ասենք, օրինակ, գալիս է Արաբկիր վարչական շրջան՝ 80 ընտանիք, 160 խորանարդ մետր փայտ, մենք այդ փայտը ընդունման-հանձնման ակտով հանձնում ենք տվյալ վարչական շրջանի սոցիալական ծառայությանը, որը հետո բաժանվում է այդ ընտանիքներն»,- մանրամասնեց նա:

Հերմինե Կարապետյան