Հարյուր տոկոսով կարող եմ երաշխավորել. Գրիգոր Մինասյանը հավաստիացրել է, որ Կառավարությունից չեն զանգում դատավորներին

«Բացարձակ ճնշման նպատակ չկա, կա նպատակ օրենքին համապատասխանելը, և երբ ստանում ենք քաղաքացիների կողմից դիմումներ, այդ դիմումներին ընթացք տալը և ոտնահարված իրավունքների վերականգնման հասնելը»:

Այս մասին Հանրային Հեռուստաընկերության եթերում երեկ ասել է արդարադատության նախարար Գրիգոր Մինասյանը՝ պատասխանելով հարցին, թե դատավոր Դավիթ Հարությունյանը հայտարարել է, որ Գրիգոր Մինասյանն ու Կարեն Անդրեասյանը դատավորներին ճնշելու հստակ նպատակ ունեն, ինչո՞ւ են ճնշում:

Գրիգոր Մինասյանը նկատել է՝ Բարձրագույն դատական խորհրդում քննվող մի քանի գործ ունեն. «Մեկը պարոն Հարությունյանի հետ կապված գործն է, որով ինքը կասկածի տակ է դրել Բարձրագույն դատական խորհրդի միաձայն կայացրած որոշումները, և նաև ունենք Մարդու իրավուքների Եվորպական դատարանի վճռի հիման վրա հարուցված կարգապահական վարույթ, որով հենց ՄԻԵԴ-ը իր որոշմամբ արձանագրել է խախտում, և դրա հետքերով վարույթ ենք հարուցել և գնացել Բարձրագույն դատական խորհուրդ»:

Չկա՞ տպավորություն, որ այն դատավորներն են պատժում, որոնց որոշումները իշխանահաճո չեն, հարցին Գրիգոր Մինասյանը հակադարձել է՝ ամենևին:

«Նույնիսկ այդ դատավորները ո՛չ քննարկվել են մամուլում, ո՛չ իրենց հետ կապված հրապարակումներ են եղել: Նաև պետք է հաշվի առնել, որ առնվազն Մարդու իրավունքների Եվրոպական դատարանը, երբ որ խախտում է արձանագրում, հաստատ չգիտի՝ մեր մամուլում ինչ է շրջանառվում, կամ որ դատավորն է համարվում ոչ հաճելի իշխանության համար»,- ասել է նա:

Դիտարկմանը՝ նախկին դատավոր Զարուհի Նախշքարյանն ասում է՝ դատավորների որս է իրականացվում, Մինասյանն արձագանքել է. «Կա օրենքով սահմանված լիազորությունների շրջանակ, կան դժգոհ քաղաքացիներ, որոնք մեզ դիմում են, և կա ՄԻԵԴ-ի հրապարակած վճիռներ»:

Գրիգոր Մինասյանի խոսքով՝ եթե քաղաքացին դիմում է արդարադատության նախարարին, ասում՝ պարոն նախարար, իմ այս կամ այն իրավունքն է ոտնահարվել, դատավորը վերցրել է օրենքը և լրիվ սևին սպիտակ է ասել, ինքը պետք է մամուլի՞ն հետևի, թե այդ դատավորը ինչ գործունեությամբ է զբաղվում, թե՞ այդ քաղաքացու շահը պաշտպանի Բարձրագույն դատական խորհուրդում:

«Ես ընտրում եմ վերջինը: Եթե կա դժգոհ քաղաքացի, կա դիմում, վերցնում եմ այդ դիմումը, ուսումնասիրում, հասկանում եմ՝ կա՞ վարույթ հարուցելու հիմք, թե՞ ոչ, վարույթը հարուցում եմ, ժամանակ է տրվում, որ դատավորը ինքը ներկայացնի, պատճառաբանի, պատմի, թե ինչո՞ւ է, օրինակ, սևին սպիտակ ասել կամ ինչո՞ւ է խախտել օրենքը: Եթե հասկանալի է դառնում, որ իսկապես կա օրենքի խախտում, ես չեմ որոշումը կայացնում, տանում եմ դատարան, որը տաս դատավորից է բաղկացած: Այնտեղ՝ դատավարության շրջանակում, արդարադատության նախարարությունը հանդես է գալիս որպես մեղադրող, իսկ դատավորը՝ պաշտպանվող կողմ, և դատավարությունը հասանելի է լինում նաև հանրությանը»,- նշել է նա:

Հարցին՝ կարո՞ղ է երաշխավորել, որ այսօր գործադիրը չի զանգում դատավորին, արդարադատության նախարարը պատասխանել է՝ հարյուր տոկոսով կարող եմ երաշխավորել. «Նույնիսկ դատավորները դրա մասին չեն բարձրաձայնում: Եթե հետևեք լրահոսին, ասում են ամեն ինչ, բացի զանգերից: Իրավական վեհ գաղափարների մասին ենք խոսում, այլ ոչ թե զանգեց այս դատավորին կամ այն դատավորին, նույնիսկ պաշտպանվող կողմը այդ արգումենտը այլևս չունի»:

Հարցին, թե ՄԻԵԴ-ի որոշումներին պարտված բոլո՞ր դատավորներն են պատժելու, արդարադատության նախարարը մանրամասնել է՝ այն դեպքերում, երբ ՄԻԵԴ-ը արձանագրել է, որ կոնկրետ դատավորի գործողությունների պատճառով է խախտում արձանագրվել:

«Մենք՝ որպես վարույթ իրականացնող մարմին, տեսնում ենք, որ խախտում կա, բնականաբար, այո, պատժվելու են: Պատասխանատվությունը ենթադրում է դադարեցումից մինչև նկատողություն, խիստ նկատողություն, նայած՝ ինչ աստիճանի է մեղավորությունը, և նայած, թե այդ դատական վճռի հետևանքով ինչ մակարդակի խախտում է իրականացրել դատավորը»,- ասել է Մինասյանը: