Ռուսաստանը նման է հարբեցող հոր, փոխանակ երեխայի կողքին լինի, մտածի նրա մասին, հարևանի հետ գզվռտվում է. Լևոն Շիրինյան

Քաղաքագետ Լևոն Շիրինյանը «Հայկական ժամանակ»-ի հետ զրույցում անդրադարձել է այսօր ռուս-հայկական ֆորումի ժամանակ ՌԴ ԱԳՆ պաշտոնական ներկայացուցիչ Մարիա Զախարովայի հնչեցրած հայտարարություններին, որով վերջինս իր զարմանքն է հայտնել ապօրինի զենք իրացնելու համար Միկա Բադալյանի և մյուսների ձերբակալության վերաբերյալ, խոսել ՀԱՊԿ-ի վրա, նրա խոսքով, «ցեխ շպրտելու» և հայ-ռուսական հարաբերությունները վատթարացնելու մասին:

Նրա հետ հարցազրույցը՝ ստորև.

- Պարոն Շիրինյան, այսօր լսեցինք Մարիա Զախարովայի հայտարարություններն այն մասին, որով նա ասում էր, թե անթույլատրելի է հայ ժողովրդի բոլոր դժբախտությունների համար մեղադրել ՌԴ-ին, տարածել ատելություն։ Ձեր կարծիքով՝ ի՞նչ նկատի ուներ նա սա ասելով, և հատկապես ո՞ւմ էին ուղղված նրա այս խոսքերը։

- Առաջին հերթին ուղղված է հայ ժողովրդին՝ որպես հոգեբանական ճնշում․ փորձում է Ռուսաստանին ներկայացնել իբրև թե բարեկամ պետություն՝ միաժամանակ խառնվելով ՀՀ-ի ներքին կյանքին։ Պարզ է դառնում, որ ցանկություն ունեն սրել մեր ներքաղաքական իրավիճակը, շեղել իրենց պատասխանատվությունը կարևոր հարցերից, այն դեպքում, երբ թղթով ՀՀ դաշնակիցն է։ Այսպես ասած՝ «կպել են ՀՀ-ի ջանից» և չեն ուզում բաց թողնել, մինչդեռ բոլորնն էլ գիտեն, որ իրենք Ադրբեջանի աջակիցն են, օգնում են անել ցանկացած բան, որը կվնասի Հայաստանին։ Պարզապես չեն ուզում, որ մեր պետականությունն անկախ մնա, վարի անկախ քաղաքականություն։ Իսկ անկախությունը մեր սուվերեն իրավունքն է, ու կոկորդիլոսի արցունքներով չես կարող դա վերցնել ու ոչնչացնել։ Մեր ժողովուրդը 44-օրյա պատերազմին ականատես եղավ, թե ում օգնեց ՌԴ-ն։ Այդ օրվանից պայքարում է իր անկախության համար ու ինքն է որոշում, թե ինչ ու ինչպես անի իր երկրում։

- Վերջինս իր խոսքում անդրադարձավ նաև այն հայերին, որոնք ՌԴ-ում են բնակվում, բայց ՀՀ նրանց մուտքն արգելված է։ Զախարովային անհանգստացրել է նաև «Sputnik Արմենիա» ռադիոյի մեկնաբան Աշոտ Գևորգյանի և բլոգեր Միկա Բադալյանի ձերբակալությունները: Նրա խոսքով՝ նման քայլերն էական վնաս են հասցնում հայ-ռուսական հարաբերություններին։ Սա, ըստ Ձեզ, և՞ս ՀՀ ներքին կյանքին միջամտելու փորձ է, և ինչո՞ւ է այդ անձանց այդքան կարևորում ՌԴ-ն:

 - Անհանգստացած են, քանի որ նշված բոլոր մարդիկ, ում անունը հայտարարել է, ՌԴ-ի գործակալներն են, աշխատում են այստեղից իրենց համար ու միասին կազմակերպված աշխատանքով տեղեկատվությունն փոխանցում կարևոր հարցերի ու գործողությունների մասին, որոնք վերաբերում են ՀՀ-ի շահերին ու անվտանգությանը։ Ընդհանրապես, մեր իշխանությունը պետք է Հայաստանի քաղաքացիություն չունեցող ու օտարամոլ անձանց չտա այստեղ այցելելու իրավունք։ Օրենսդրությունը պետք է խստացնել։ Գուցե այդ նշվածները էթնիկական ծագումով հայ են, ազգանունը հայերեն է հնչում, բայց ռուսաստանացված են, մտածում են՝ ինչպես կործանել Հայաստանը։ Ապօրինի զենք-զինամթերք են հայտնաբերել ՀՀ քաղաքացիություն չունեցողների մոտ, որոնց ոչ միայն պետք է կալանավորել, այլ նաև արտաքսել երկրից։ Պարզ է, որ հատուկ ծրագրով էին գնացել Սյունիք, որտեղից էլ իրենց բռնել են․ ՌԴ-ն միջանցք է ուզում, իսկ գործակալներին էլ ուղարկել էր Սյունիք, որ հեղաշրջում անեն, նպաստեն իր ծրագրին։ Այժմ շփոթված են, որ խափանվեց։

- Զախարովան խոսեց նաև ՀՀ-ում գործող արևմտյան ՀԿ-ների մասին, որոնք, նրա մեկնաբանմամբ, «ցեխ են շպրտում» ՀԱՊԿ-ի և ԵԱՏՄ-ի վրա։ Նկատենք, սակայն, որ առնվազն ՀԱՊԿ-ի մասով ամեն ինչ հստակ է․ ՀՀ իշխանությունները պաշտոնական մակարդակով ևս արձանագրում են, որ կառույցը չի գործում, ՀՀ ինքնիշխան տարածքի նկատմամբ Ադրբեջանի հարձակումների ժամանակ էլ պարզ դարձավ ՀԱՊԿ-ի անգործությունը։ Ինչ եք կարծում՝ Զախարովայի համար իսկապե՞ս անհասկանալի են ՀԱՊԿ-ին ուղղված այդ քննադատական գնահատականները, թե՞ նա պարզապես փորձում է փրկել կառույցի հեղինակությունը:

- Ամեն ինչ գալիս է հենց այնտեղից, որ իրենց դուր չի գալիս այն, երբ ՀՀ-ն է ամեն գնով պահում իր անկախությունը։ Հստակ հասկանում են՝ ՀԱՊԿ-ը շատ վաղուց լողում է ցեխում, ապացուցվել է, որ ՀՀ-ի դեմ է գործում։ Իրենք մեր պետականության թշնամիներն են, դրա համար նաև հայտարարությունների մեջ ասում են՝ «Армяне», ոչ թե «Армения»։ Փորձում են ժողովրդին պառակտել, վիճակը լարել:

- Պարոն Շիրինյան, նկատելի է, որ ՀՀ-ի և ՌԴ-ի հարաբերությունները վերջին շրջանում ավելի են սրվել, հատկապես դա տեսանելի եղավ, երբ սահմանին կուտակումների մասին տեղեկություններ ի հայտ եկան։ Ո՞ւր կարող է հասցնել այս վիճակը:

- Այո՛, ՌԴ-ն նման է հարբեցող հոր, փոխանակ երեխայի կողքին լինի, մտածի նրա մասին, հարևանի հետ գզվռտվում է։ ՌԴ-ն շատ վաղուցվանից է, որ մեր թշնամին է ու մեր թշնամու ընկերը։ Հիմա փորձում են քոծություն անել, սուտ խոստումներով, խոսքերով գերել հայ ժողովրդին, բայց չի ստացվում։ Ժողովուրդը տեսավ ու հասկացավ, որ Ռուսաստանը Ադրբեջանի հովանավորն է մեր դեմ իրականացված վայրագություններում։ Հայաստանի դանակն էլ, ինչպես ասում են, հասել է ոսկորին։ Այժմ ճիշտ ճանապարհին է ու ճիշտ քայլեր է անում։