Խոշտանգում են, որ լռի՞

Կարապետյանն այն աստիճան վատ վիճակում էր, որ երբ ցանկանում էր դատը նախագահող Արշակ Խաչատրյանին դիմել` նիստը հետաձգելու նպատակով, վերջինս գործարարին թույլ չտվեց ոտքի կանգնել դատարանին դիմելու համար, այլ հորդորեց նստած խոսել: Կարապետյանը մեղադրվում է ՀՀ մաքսային կոմիտեի նախկին նախագահ Արմեն Ավետիսյանի տան վրա ավազակային հարձակում կազմակերպելու մեջ: Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանը նրան դատապարտել է 15 տարվա ազատազրկման: Գործարարը հերքում է իրեն ներկայացված մեղադրանքները, պնդում, որ ինքը կապ չունի ավազակային հարձակման հետ եւ վերաքննիչ քրեական դատարանից պահանջում է իրեն արդարացնել կամ գործն ուղարկել լրացուցիչ քննության: Այս գործով ամբաստանյալի աթոռին նստած են եւս 9 հոգի, որոնց առաջին ատյանի դատարանը դատապարտել է ութուկեսից մինչեւ տասնհինգ տարվա ազատազրկման: Վերջին դատական նիստը տեղի էր ունեցել մեկ ամիս առաջ: Այս ընթացքում Արա Կարապետյանի առողջական վիճակը կտրուկ վատացել է: Գործարարը դատարանում հայտարարեց, որ օգոստոսի 19-ին վիրահատության է ենթարկվել: Վիրահատության ընթացքում բարդացումներ են եղել` Կարապետյանը ստամոքսի ուռուցքներ (խոցեր) է ունեցել, որոնք բորբոքվել են (պայթել են): Նա շարունակում է արյունահոսել: Այժմ նա պահվում է «Դատապարտյալների հիվանդանոց» քրեակատարողական հիմնարկում: Չնայած վիրահատությունից երկու շաբաթ է անցել, բայց գործարարը դեռ չի ապաքինվել: Իսկ երեկվա դատական նիստին նա բերվել էր արյան բարձր ճնշումով (190-110): Կարապետյանի վիճակն այնքան ծանր էր, որ անգամ մեղադրող Հովսեփ Սարգսյանը դա ակնհայտ համարեց եւ դեմ չեղավ, որ դատական նիստը հետաձգվի: Գործարարի փաստաբան Արա Զաքարյանը օրվա վերջում Կարապետյանի հետ հանդիպումից հետո ասաց, որ գործարարի առողջական վիճակը մնում է շատ վատ: Ըստ փաստաբանի, Կարապետյանը նախկինում ինսուլտ է տարել, եւ մտավախություն կա, որ այն կարող է կրկնվել: Փաստաբանին եւ գործարարի հարազատներին լուրջ մտահոգել է նաեւ այն փաստը, որ «Դատապարտյալների հիվանդանոց» ՔԿՀ-ի բժիշկները որոշել էին, որ ծանր առողջական պայմաններում գտնվող եւ տեղաշարժվելու հնարավորություն չունեցող Կարապետյանը կարող է մասնակցել դատական նիստին: «Տեղեկություններ կան, որ «Դատապարտյալների հիվանդանոց» ՔԿՀ-ի բժիշկները գտնում են, որ Կարապետյանին կարելի է դուրս գրել եւ տեղափոխել «Նուբարաշեն» ՔԿՀ»,- ասաց Արա Զաքարյանը: Փաստաբանը ձեռնպահ մնաց «Դատապարտյալների հիվանդանոց» ՔԿՀ բժիշկների որոշմանը գնահատականներ տալ` խոստանալով դա անել այն բանից հետո, երբ այսօր վերջնականապես կպարզվի, Կարապետյանի բուժումը շարունակվելո՞ւ է, թե՞ նրան վատառողջ վիճակում կտեղափոխեն «Նուբարաշեն» ՔԿՀ: Գործարարի հարազատները կասկածներ ունեն, որ ինչ-որ մարդիկ փորձում են այդպիսով Կարապետյանին ճնշել եւ նրան խոշտանգելով ստիպել, որ չհամարձակվի այս գործով եւ 2008 թվականի մարտի 1-ի իրադարձությունների հետ կապված բացահայտումներ անել: Գործարարը դեռեւս առաջին ատյանի դատարանում` իրեն 15 տարվա ազատազրկման դատապարտելու դատավճռից հետո, հայտարարել էր, որ ինքը կբացահայտի որոշ օլիգարխների իրական կերպարը, ինչպես նաեւ մարտի 1-ի իրադարձությունների հետ կապված որոշ փաստեր կհրապարակի: Արա Կարապետյանին ծանր առողջական վիճակում «Դատապարտյալների հիվանդանոց» ՔԿՀ-ից հնարավոր տեղափոխման վերաբերյալ մեր հարցին, եւ հարցին` արդյոք այդպիսով փորձ չի՞ արվում նրա վրա ճնշումներ գործադրել, ՀՀ Քրեակատարողական վարչության մամուլի քարտուղար Գոռ Ղալեչյանը պատասխանեց. «Դատապարտյալների հիվանդանոց» ՔԿՀ-ն գործարարի հիվանդության պատմությունը վաղը (այսօր.- Վ.Հ.) կներկայացնի ՀՀ քրեակատարողական վարչության բժշկական աշխատանքային հանձնաժողովին: Այս հանձնաժողովը կորոշի, նա պետք է շարունակի մնալ հիվանդանոցում, թե կարող է տեղափոխվել «Նուբարաշեն» քրեակատարողական հիմնարկ: Եթե որոշի, որ պետք է տեղափոխվի, ապա կտեղափոխեն»: Ճնշումների վերաբերյալ հարցին Ղալեչյանը չարձագանքեց: Հ.Գ. Հաջորդ դատական նիստը նշանակվեց սեպտեմբերի 16-ին: