Գործարարը սպանվե՞լ է

Գործարարի մահվան հանգամանքների վերաբերյալ պաշտոնական վարկածը, սակայն, երեկ մայրաքաղաքում բուռն քննարկումների առիթ էր դարձել: Բանն այն է, որ դեպքի վայրի ու դիակի լուսանկարներն ուսումնասիրելիս կարելի է բազմաթիվ կասկածելի դրվագներ հայտնաբերել: Դրանց անդրադառնալուց առաջ, սակայն, նախ ներկայացնենք պաշտոնական տեղեկատվությանը: Ըստ այդմ, հոկտեմբերի 16-ին, ժամը 13.15-ին, ոստիկանության Կոտայքի բաժնում ահազանգ է ստացվել, որ Սեւան-Երեւան մայրուղուց դեպի Գետամեջ գյուղ տանող ճանապարհին կայանված «BMW X-5» մակնիշի ավտոմեքենայում դիակ կա: Դեպքի վայր մեկնած օպերատիվ խումբը նշված ավտոմեքենայում, վարորդի նստելատեղին, հայտնաբերել է Արմեն Պետրոսյանի դիակը` քունքի մասում հրազենային վնասվածքի հետքով, աջ ձեռքին` «TT» ատրճանակ` պահունակում 6 փամփուշտով: Ավտոմեքենայի աջ նստելատեղին դրված սեւ կաշվե պայուսակում հայտնաբերվել է «Բրաունինգ» ատրճանակ` 53 փամփուշտով, իսկ մեքենայի սրահում` «TT» ատրճանակի կրակված 1 պարկուճ: Փաստի առթիվ ոստիկանության Կոտայքի քննչական բաժանմունքում հարուցվել է քրեական գործ ՀՀ Քրեական օրենսգրքի 110 հոդվածի 1-ին մասի (սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը) եւ 235 1-ին մասի (ապօրինի կերպով հրազեն, բացի ողորկափող հրազենից եւ դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) հատկանիշներով: Ընթանում է նախաքննություն: Իսկ ահա դեպքի վայրում արված լուսանկարներում կասկածելի է թվում հետեւյալը. մահացածի աջ ձեռքը, որում նա պահում է «TT» տեսակի ատրճանակը, դրված է աջ ոտքին: Մինչդեռ եթե նա այդ նույն ձեռքով, այդ հրազենից կրակ է բացել իր վրա, ձեռքը դժվար թե այդքան հանգիստ դիրքում գտնվեր: Բացի այդ, համաձայն լուսանկարների, գլուխը նույնպես աջ կողմում է, մինչդեռ, եթե ատրճանակը դրվել է ու կրակ է արձակել աջ քունքի կողմից, ապա գլուխը պետք է հակառակ կողմ` ձախ կողմ շուռ եկած լիներ: Շատերը կասկածելի են համարում նաեւ այն, որ գործարարի մեքենայում, բացի «TT» ատրճանակից, այլ հրազեն ու բազմաթիվ փամփուշտներ են հայտնաբերվել: Դա ենթադրություն է առաջացնում, որ նա ինչ-որ «ռազբորկայի» գնալիս է եղել, կամ գոնե իր կյանքի համար վախեցել է եւ ինքնապաշտպանության նպատակով է այդ ամենը պահել մեքենայում: Նշենք, սակայն, որ եւ փորձագետները, եւ փորձառու քննիչները դեռեւս ձեռնապահ եմ մնում նշված հանգամանքների վերաբերյալ որեւէ եզրակացություն տալուց, քանի որ, նրանց խոսքով, ցանկացած վարկած պետք է հիմնավոր ու ապացուցելի լինի: Նշենք եւս մեկ կասկածելի հանգամանք: Իրավապահները պաշտոնական եւ ոչ պաշտոնական զրույցներում շտապում են բոլորին համոզել, որ տեղի ունեցածը ոչ այլ ինչ է, քան ինքնասպանություն, եւ սպանության վարկածն ուղղակի բացառվում է: Կոտայքի ոստիկանապետ Ա. Բադալյանին նույնիսկ ծիծաղելի թվաց ու զարմացրեց այն հնարավորությունը, որ սույն գործով կարող է ինչ-որ մեկը որպես կասկածյալ ներգրավվել: Մեզ հետ հեռախոսազրույցում նա նախ հրաժարվեց պատասխանել տեղի ունեցածի վերաբերյալ մեր հարցերին, ասաց միայն, որ նախաքննությունը շարունակվում է: Այնուհետեւ խիստ զարմացավ, լսելով հարցը, թե արդյոք գործում որեւէ կասկածյալ կա: «Ձերբակալվածներ չկան, կասկածյալներ չկան: Եթե ինքնասպանություն է եղել, ի՞նչ ձերբակալվածներ»,- բացականչեց նա: Ի պատասխան դիտարկմանը, որ ինչ էլ տեղի ունեցած լինի, քրեական գործն արդեն հարուցվել է, ինչը ինքնըստինքյան չի բացառում հնարավորությունը, որ տեղի ունեցածի հետ ինչ-որ անձ կարող է առնչություն ունենալ, ոստիկանապետն ասաց. «Զանգահարեք ոստիկանության լրատվական վարչություն»: «Արայ» ընկերության սեփականատիրոջ կասկածելի մահվան վերաբերյալ ընկերությունը դեռեւս ոչ մի տեղեկատվություն չի հաղորդել, հայտարարություն չի տարածել: Երեկ զանգահարեցինք «Արայ» ընկերության գլխավոր գրասենյակ: Աշխատակցուհիներից մեկը, որը չցանկացավ ներկայանալ, ասաց, որ ոչ գլխավոր գործադիր տնօրենը, ոչ փոխտնօրենները տեղում չեն եւ մեր հարցերին պատասխանել չեն կարող: Հարցրինք, թե այդ դեպքում ումից կարող ենք հետաքրքրվել ընկերության սեփականատեր Արմեն Պետրոսյանի մահվան հանգամանքների վերաբերյալ: Աշխատակցուհին ասաց, որ որեւէ մեկը դեռեւս չի կարող մեկնաբանություն տալ, իսկ ընկերության ղեկավար կազմը գրասենյակ կգան մի քանի օրից միայն: Նշենք, որ երեկ փակվել էին մայրաքաղաքում գործող «Արայ» ընկերության բոլոր խանութներն ու սպասարկման կենտրոնները: Թե երբ դրանք կվերաբացվեն, դեռեւս հայտնի չէ: