«Արայը» դեռ չի մեկնաբանում

Տեղի ունեցածը պարզելու նպատակով հարուցված քրեական գործի քննությունը դեռեւս ընթանում է ինքնասպանության հասցնելու հոդվածով, եւ մինչ օրս պարզ չէ, թե ինչ է տեղի ունեցել իրականում:

Գործարարի մահվան փաստի առթիվ քրեական գործի նախաքննության ընթացքի վերաբերյալ երեկ որոշ հարցեր ուղղեցինք Կոտայքի ոստիկանության քննչական բաժնի ղեկավար Եղիշ Պետրոսյանին: Նա նախ հրաժարվեց խոսել, ելնելով նախաքննության գաղտնիությունից, ավելի ուշ, սակայն, պատասխանեց որոշ հարցրեի:

- Պարոն Պետրոսյան, ի՞նչ փուլում է գտնվում նախաքննությունը:
- Այն շարունակվում է:

- Նույն հոդվածներո՞վ է քննությունն իրականացվում:
- Այո, նույն հոդվածներով է:

- Այն, որ դեպքի վերաբերյալ քրեական գործը հարուցվել է ինքնասպանության հասցնելու հոդվածով, այսինքն, առավել հավանական է համարվում հենց ինքնասպանությունը, դա ձեզ` նախաքննական մարմնին, չի՞ կաշկանդում, չի՞ սահմանափակում քննության ընթացքը:
- Իհարկե ոչ: Ի՞նչ կապ ունի դա: Այնպես չէ, որ կոնկրետ քրեական գործը կարող է ինչ-որ կաշկանդվածություն առաջացնել: ՀՀ Քրեական դատավարության 17-րդ հոդվածով պարտադիր է լրիվ օբյեկտիվ քննություն կատարել, ուզում է ինքնասպանությունով, ուզում է ապօրինի շինարարությունով, ուզում է թեթեւ մարմնական վնասվածքներով կամ ամենածանր հանցագործության հոդվածով: Բացարձակ ոչ մի կապ չունի այդ ամենը գործի քննության հետ: Կաշկանդվածություն չկա, եւ մենք պետք է պարզենք իրականությունը:

- Կարելի՞ է ասել, որ գործի քննությունը առաջ է շարժվում, թե՞ տեղում դոփում եք:
- Առաջ ենք գնում, միանշանակ շարժվում է առաջ, միանշանակ:

- Կարո՞ղ եք ասել, թե այս ընթացքում ովքեր են հարցաքննվել:
- Չէ, չէ, չէ, չեմ կարող նման բան ասել` նախաքննության գաղտնիությունից ելնելով:

- Դեպքից հետո ասել էիք, որ տեղի ունեցածի վերաբերյալ բազմաթիվ վարկածներ կան, եւ բոլորն էլ ուսումնասիրվում են: Այսօր արդեն վարկածների շրջանակը ինչ-որ չափով հստակեցվել կամ պակասե՞լ է:
- Հակառակը, ոչ... Չէ, վարկածները չեն պակասել, գործը առաջ է գնում, ֆիլտրվում է, այ, երբ որ պարզ կլինի, թե կոնկրետ ինչ է եղել, մյուս վարկածները ինքնըստինքյան հետ կընկնեն: Այսօր մենք բոլոր վարկածներով էլ աշխատում ենք:

- Ո՞վ է ճանաչվել մահացածի իրավահաջորդ:
- Այ, միայն դա կարող եմ ասել: Մահացածի մայրն է ճանաչվել իրավահաջորդ: Ուրիշ ոչինչ չեմ կարող ասել:

Արմեն Պետրոսյանի մահվան օրից` հոկտեմբերի 16-ից հետո փակ էին «Արայ» ընկերության` հանրապետության տարբեր քաղաքներում գործող 7  խանութներն ու սպասարկման կենտրոնները: Օրերս դրանք վերաբացվել են եւ շարունակում են իրենց բնականոն աշխատանքը, իսկ ընկերությունից դեռեւս ձեռնպահ են մնում տեղի ունեցածի մասին մեկնաբանություններ տալուց:

Երեկ զանգահարեցինք «Արայ» ընկերության գլխավոր գործադիր տնօրենի գրասենյակ: Աշխատակցուհին, չցանկանալով ներկայանալ, ասաց, որ ընկերության սեփականատիրոջ մահվան վերաբերյալ ոչ մի մեկնաբանություն չի լինելու: «Քննություն է գնում, մենք չպետք է խանգարենք քննությանը»,- ասաց նա: Հիշեցնենք, որ առայժմ հայտնի չէ` արդյոք գործարարը կտակ թողե՞լ է, թե՞ ոչ, եւ ո՞վ է ժառանգելու «Արայ» ընկերության բաժնետոմսերը: Արմեն Պետրոսյանի միակ ժառանգը 4-ամյա դուստրն է:

Ինչպես հայտնել էինք ավելի վաղ, Արմեն Պետրոսյանը դիակը հայտնաբերվել էր իր մեքենայի մեջ` քունքի մասում հրազենային վնասվածքի հետքով, աջ ձեռքին` «TT» ատրճանակ: Փաստի առթիվ ոստիկանության Կոտայքի քննչական բաժանմունքում հարուցվել է քրեական գործ ՀՀ Քրեական օրենսգրքի 110 հոդվածի 1-ին մասի (սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը) եւ 235 1-ին մասի (ապօրինի կերպով հրազեն, բացի ողորկափող հրազեն պահելը, փոխադրելը կամ կրելը) հատկանիշներով:

Սակայն մի շարք հանգամանքներ շատերին ստիպում են ենթադրել, որ տեղի ունեցածը ինքնասպանություն չէ: Նախ, կասկածելի է համարվում այն, որ Պետրոսյանի աջ ձեռքը` ցուցամատը զենքի ձգանին դրված, հանգիստ դիրքով գտնվում էր նրա ոտքի վրա, տպավորություն ստեղծելով, թե ինչ-որ մեկը այն խնամքով դրել է այդտեղ: Բացի այդ, մեքենայի մեջ մեկ այլ զենքի առկայությունը հիմք էր հանդիսացել ենթադրելու, որ գործարարը վախեցել է իր կյանքի համար, եւ ինքնապաշտպանության նպատակով իր մոտ հրազեն է պահել: