Ինչու են Երևանի կենտրոնական որոշ փողոցների լուսացույցները պարբերաբար անջատվում. ինչի հետ է կապված խնդիրը

Վերջին ժամանակներում Երևանում, հատկապես Կենտրոն վարչական շրջանում, էլեկտրաէներգիայի անջատումներով պայմանավորված՝ պարբերաբար արձանագրվում են լուսացույցների խափանման աշխատանքներ, դրանք երբեմն մի քանի ժամ չեն գործում՝ երթևեկությունն անելով կաթվածահար, ստեղծելով վթարային իրավիճակներ:

Քաղաքացիները, հատկապես վարորդներն ահազանգում են՝ ո՞վ և ինչպե՞ս պետք է կարգավորի խնդիրը, որպեսզի էլեկտրաէներգիայի անջատման հետևանքով երթևեկությունը չտուժի։

Երևանի քաղաքապետարանի աշխատակազմի տրանսպորտի վարչության պետի պաշտոնակատար Վազգեն Հարությունյանը «Հայկական ժամանակ»-ի հետ զրույցում պարզաբանում է՝ Երևանում լուսացույցների սպասարկման պատասխանատվությամբ զբաղվող ընկերություն կա, պայմանագիր էլ կա կնքված, սակայն պարզվում է, որ եթե լուսացույցը չի աշխատում հոսանքի անջատված լինելու հետևանքով, այդ ընկերության լիազորություններն այդտեղ սահմանափակվում են։

Նրա խոսքով՝ տվյալ կազմակերպության առջև պարտականությունները հստակ նշված են, մնացած դեպքերում մնում է սպասել, թե երբ հոսանքը կվերականգնվի։

«Խնդիրը երկու մասից է բաղկացած․ հոսանքի անջատումների հետևանքով ընկերությունը շատ բան չունի անելու, ընդամենը կապվում է տվյալ տեղամասի էլեկտրացանցերի ներկայացուցչության հետ, որ հասկանա՝ որքան կտևի անջատումը։ Այսինքն՝ հոսանքի խափանման դեպքում ֆիզիկապես ոչինչ չի կարող անել։ Եթե խնդիրը պայմանավորված է ցածր լարման վահանից դեպի լուսացույցով եկող լարանցման հետ, այդ դեպքում ընկերությունը անմիջապես վերացնում է խնդիրը, ու վթարը վերականգնվում է»,- ասում է նա։

Հարությունյանը նաև վստահեցնում է՝ տվյալ ընկերությունը արագ վերացնում է լուսացույցների հետ կապված այնպիսի խնդիրները, երբ դրանք չեն աշխատում ճանապարհատրանսպորտային վթարների հետևանքով, իսկ եթե միանգամից մի քանի խաչմերուկում էլեկտրականությունը անջատվում է, երթևեկությունը՝ կաթվածահար լինում, ընկերությունը մեղավոր չէ․ «Օրինակ՝ վթարի հետևանքով լուսացույցը կոտրվել է, առավելագույն ժամկետ կա նշված, որը կազմակերպությունը կատարում է։ Եթե հոսանքն է պատճառը լուսացույցի չաշխատելու, ապա ո՛չ վարչությունը, ո՛չ ընկերությունը ոչինչ չունեն անելու։ Այդ պարագայում սպասում ենք հոսանքի վերականգնմանը, որ լուսացույցի բնականոն աշխատանքն էլ շարունակվի»։

Որոշ դեպքերում, սակայն, պետք էլ չէ սպասել լույսի վերականգմանը, Պարեկային ծառայությունն է գալիս օգնության ու իր միջոցներով կազմակերպում ու կարգավորում երթևեկությունը։ Եթե պարեկային ծառայողները ռեսուրսով չեն բավականացնում իրավիճակի կարգավորման համար, Հարությունյանի խոսքով՝ այլ գործիքակազմ օրենսդրությունն իրենց չի տրամադրում․ «Մաքսիմալ փորձում ենք խնդիրը շուտ վերացնել, նաև ՀԷՑ-ին ենք խնդրում, որ, որքան հնարավոր է, շուտ կարգավորի խնդիրը։ Լիազորությունների շրջանակներում այլ լուծում չունենք, այդ առումով սահամնափակված ենք»։

Ըստ Երևանի քաղաքապետարանի աշխատակազմի տրանսպորտի վարչության պետի պաշտոնակատարի՝ ամեն տարի անցկացվում է մրցույթ, թե որ ընկերությունը պետք է իրականացնի լուսացույցների սպասարկումը։ Այս տարի մրցույթ կհայտարարվի նոյեմբերին, նույն տրամաբանությամբ հետագայում էլ գործընթացը կշարունակվի:

Իսկ արդյոք քննարկվո՞ւմ է Երևանի փողոցներում այնպիսի լուսացույցներ ունենալու հարցը, որ դրանց աշխատանքը կախված չլինի միայն հոսանքից, Հարությունյանը մանրամասնում է՝ լուսացույցային օբյեկտները պետք է փոխվեն նոր սերնդին համապատասխան․ «Քննարկվում է ֆինանսական միջոցների իրականացումը, Երևան քաղաքում ունենալ հեռակառավարվող խելացի, արևային պանելներով աշխատող լուսացույցներ։ Դրանով կկարգավորենք խնդիրը»։

Ինչ վերաբերում է հարցին, թե արդյոք տվյալ պարագայում քննարկումներ տեղի՞ են ունենում ՀԷՑ-ի հետ, զրուցակիցը նկատում է, որ Հայաստանում էլենկտրաէեներգայի մատակարարման պատասխանատուն քաղաքապետարանի գործակարգավորական ամեն նիստին պարզաբանում է, թե հոսանքի անջատումների խնդիրները ինչի հետ են կապված։ Նրա խոսքով՝ քաղաքացիներից Երևանի քաղաքապետարանը հարցի վերաբերյալ ահազանգեր ու բողոքներ չի ստանում։

ՀՀ ներքին գործերի նախարարությունից նույնպես նկատում են, որ վերջին ժամանակներում հաճախակի են դարձել լուսացույցների խափանումները, որոնք պատճառ են դառնում երթևեկության՝ տվյալ հատվածների խցանումների։

ՆԳ նախարարի մամուլի խոսնակ Նարեկ Սարգսյանը մեզ հետ զրույցում ասում է, որ խնդիրը կարգավորելու համար օպերատիվ կերպով ներգրավվում են պարեկային կարգախմբեր․ «Լուսացույցների խափանումների մասին տեղեկատվություն ստանալուն պես ոստիկանության համապատասխան ստորաբաժանումը անմիջապես տեղեկությունը փոխանցում է քաղաքապետարան՝ խափանումը արագ վերացնելու նպատակով, իսկ մինչ վերացումը պարեկային ծառայողները կարգավորում են տվյալ խաչմերուկները»։

Վերջինս չի հերքում՝ խնդիրը հավելյալ ծանրաբեռնվածություն է ստեղծում Պարեկային ծառայության համար, քանի որ խաչմերուկներում հաճախակի և տևական ժամանակ լուսացույցների խափանումները լրացուցիչ ուժեր և միջոցներ են պահանջում:

Ըստ նրա՝ խնդրի վերաբերյալ Երևանի քաղաքապետարանի հետ քննարկումներ եղել են։

Մերի Խաչատրյան