Ժետոնի փոխարեն՝ QR կոդ. Երևանի մետրոյում «իրավիճակ» է փոխվել. քաղաքացիները և՛ գոհ են, և՛ մտավախություններ ունեն

Մի քանի օր է՝ Երևանի մետրոյում ավանդական նարնջագույն ժետոններին փոխարինելու են եկել Telcell-ի հեռախոսային հավելվածը, ինչպես նաև՝ մետրոյի ներսում տեղադրված սարքերից գնված QR կոդերով թղթերը:

Այժմ մետրո մտնելիս գանձապահին պետք է վճարել նույն 100 դրամը, սակայն ստանալ սպիտակ թուղթ՝ վրան սևով նշված QR-ը, որը հնարավոր է օգտագործել մեկ անգամ: Մոտենալով կայարանի անցակետերին՝ պետք է կանգնել դեղինով նշված գծից մի փոքր հետ, կտրոնը մոտեցնել սարքին։ Իսկ եթե հեռախոսում առկա է անհրաժեշտ հավելվածն ու գնված տոմսը, պետք է սարքին մոտեցնել սմարթֆոնը։

Առաջին հայացքից սա բարդ գործընթաց է թվում, սակայն քաղաքային իշխանությունը համոզված է՝ բնակչությունը արագ կընտելանա փոփոխությանը։ Նկատենք, որ միասնական տոմսային համակարգն ամբողջությամբ ուժի մեջ պետք է մտնի հունվարից, հոկտեմբերի 14-ից ժետոնից չօգտվելը այդ նպատակով է արվել, որ մարդիկ պատրաստ լինեն և անակնկալի չգան։

Սոցիալական ցանցերում գործարկված միասնական տոմսային համակարգից որոշակի դժգոհություններ կան: «Բարեկամություն» մետրոյի կայարանում «Հայկական ժամանակ»-ին հանդիպած քաղաքացիները հիմնականում դժգոհ էին հերթերից: Շատերն էլ դեռ ծանոթ չէին վճարման նոր տարբերակին:

Մետրոյից հաճախ օգտվող քաղաքացի Լուսինեն մեզ հետ զրույցում ասում է՝ եթե տոմսը գնում է հեռախոսի հավելվածով, հերթի մեջ չի սպասում: «Ժամանակի առումով այդ մասով լավ է, բայց ժետոնով ավելի արագ էր, գցում էինք ու արագ անցնում»,- նշում է նա:

Մեկ այլ քաղաքացի էլ, որ չներկայացավ, ասում է. «Ես նախընտրում եմ ծրագրով վճարել, բողոք չունեմ»։

Որոշ քաղաքացիներ էլ վստահ չեն, որ Telcell-ի հեռախոսային հավելվածում գրանցվելով՝ անձնական տվյալների արտահոսքի հետ կապված խնդիրներ չեն ունենա:

Նշենք, որ բոլոր կայարաններում հատուկ աշխատակիցներ կան, որոնք հետևում են, որ մարդիկ ճիշտ օգտվեն համակարգից։

Վերջիններս մեզ հետ զրույցում ասում են՝ հաճախ ուղևորները թուղթը սխալ են պահում համապատասխան հատվածում, և  սարքը չի կարողանում QR-ն ընթերցել։

«Օգնում ենք, բացատրում, թե ինչպես ճիշտ կատարեն գործողությունը։ Ամենասկզբում շատ դժվար էր, մեծ հերթեր էին, հիմա այդքան էլ դժվար չէ: Իհարկե, վեճեր, ևս լինում են։ Երբեմ դեղին գիծը հատելուց ու տվյալ անցակետից օգտվելու խնդիր ունենալուց հետո այլևս չեն ցանկանում փորձել երկրորդ անցակետը»,- ասում են նրանք:

Ըստ աշխատակիցների՝ քաղաքացիները հիմնականում թղթային տարբերակն են օգտագործում։ 

Երևանի Կ. Դեմիրճյանի անվան մետրոպոլիտենի տնօրենի պաշտոնակատար Բաբկեն Սեդրակյանն էլ «Հայկական ժամանակ»-ի հետ զրույցում նկատում է՝ նախորդ շաբաթ մետրոն 580 հազար ուղևոր է ունեցել, որից 90 տոկոսը օգտվել է վճարային միասնական համակարգից։ Վերջինս վստահեցնում է՝ «QR»-ը մետրոյից օգտվողների թիվը չի նվազեցրել:

«Դրանից լավ բա՞ն»,- ասում է Սեդրակյանը՝ շարունակելով. «Միջազգային հյուրերը գալիս ու զարմանում էին, անսովոր էր, որ ժետոն էին տեսնում, պատմում էին, որ իրենց մոտ վճարային համակարգ է առկա։ Օրինակ՝ հարևան Վրաստանում վճարումը քարտով է։ Հունվարի 1-ից մի քանի վճարային տարբերակների ենք անցնելու՝ ամսական, տարեկան քարտերը և այլն։ Երկիրն անցնում է թվային տարբերակների։ Մեկ տարի հետո լիարժեք կհամոզվենք, որ այս մոտեցումը արդարացված է։ Նույն ժետոնը հազար ձեռքից ձեռք էր անցնում, թուղթը մի անգամ են օգտագործում»:

Ըստ նրա՝ հունվարի 1-ից հետո դրամարկղերը շարունակելու են գործել, որպեսզի հավելվածից օգտվել չցանկացող քաղաքացիները թղթային QR-ներից օգտվեն․ «Աշխատակիցները նույնպես շարունակելու են մնալ մետրոյում, այսինքն՝ համակարգի ներդրմանը զուգահեռ մենք կադրային կրճատումներ չենք նախատեսել»։

Սեդրակյանը չի թաքցնում՝ տեխնիկական խնդիրներ երբեմն առաջանում են, սակայն, ըստ նրա, դրանց կարգավորումը մի քանի րոպե է պահանջում: 

Հարցին՝ ի՞նչ են արվելու ժետոնները, նա պատասխանում է՝ ժամանակի ընթացքում կարխիվացվեն և կոչնչացվեն:

Տնօրենի պաշտոնակատարը նաև հիշեցնում է, որ 74 միլիարդ դրամի ներդրումային ծրագրեր են նախատեսված մետրոյի համար, որի շրջանակներում փոխվում են 40 տարուց ավելի ծառայած շարժասանդուղքները։

Մերի Խաչատրյան