Բաքվում սկսվում են շինծու մեղադրանքներով հանցագործությունների համար մեղադրվող հայերի դատավարությունները

Ադրբեջանում հունվարի 17-ից սկսվում են շինծու մեղադրանքներով ռազմական հանցագործությունների համար մեղադրվող հայերի դատավարությունները։

Առաջին գործը կքննվի Բաքվի զինվորական դատարանում՝ դատավոր Զեյնալ Աղաևի նախագահությամբ։

ԱՀ գլխավոր դատախազության քննչական վարչությունը հետաքննություն է անցկացրել ագրեսիայի, օկուպացիայի, ցեղասպանության և խաղաղության ու մարդկության դեմ ուղղված այլ հանցագործությունների, ռազմական հանցագործությունների, ահաբեկչության և ահաբեկչության ֆինանսավորման փաստերի առթիվ հարուցված քրեական գործով, ինչպես նաև ներառված են բազմաթիվ այլ հանցագործություններ, որոնք, իբր, կատարվել են Ադրբեջանի Հանրապետության և նրա ժողովրդի դեմ։

2024 թվականի մայիսի 2-ին, Ադրբեջանի գլխավոր դատախազի որոշմամբ, գլխավոր դատախազությունում, ինչպես նաև հանրապետության տարբեր քննչական մարմիններում հոկտեմբերից ի վեր ԼՂ նախկին ղեկավարությանը վերագրվող հանցագործությունների վերաբերյալ քննվել է 1389 քրեական գործ։ 1988 թվականից մինչև 2024 թվականի ապրիլի 22-ը վերագրվող գործերը միավորվել են մեկ վարույթում:

Հետաքննությունն իրականացրել է Ադրբեջանի գլխավոր դատախազության գլխավորած խումբը՝ բաղկացած Պետական անվտանգության ծառայության, ՆԳՆ-ի, Մաքսային պետական կոմիտեի և Զինվորական դատախազության պրոֆեսիոնալ քննիչներից։

2548 դրվագով հավավաքված կեղծ և շինծու ապացույցների հիման վրա՝ որպես մեղադրյալներ են անցնում ապօրինի զինված կազմավորումների համար մեղադրվող 15 անձինք՝ ԼՂ նախկին նախագահներ Արկադի Ղուկասյանը, Արայիկ Հարությունյանը, Բակո Սահակյանը, ինչպես նաև Դավիթ Իշխանյանը, Դավիթ Բաբայանը, Լյովա Մնացականյանը, Դավիթ Մանուկյանը, Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը, Էրիկ Ղազարյանը:

Նրանց մեղադրանք է առաջադրվել Ադրբեջանի քրեական օրենսգրքի մի քանի հարյուր հոդվածով:

Ադրբեջանական լրատվամիջոցները նշում են, որ նրանց բոլորին տրվել են փաստաբաներ, թարգմանչի հնարավորություն, սակայն այդ ամենն արվել է կոպտագույնախտումներով, թարգամանիչները երբեմն ճիշտ չեն ներկայացնում խսքը, իսկ փաստաբանները միայն ադրբեջանցիներ են, որոնք բացառված չէ, որ գործում են երկրի իշխանությունների հրահանգներով:

Ադրբեջանի գլխավոր դատախազը 2024 թվականի դեկտեմբերի 16-ին հաստատել էր մեղադրական եզրակացությունը և ուղարկել Բաքվի զինվորական դատարան՝ քննարկման։

Հիշեցնենք՝ Բաքվի բանտում ապօրինի պահվող Ռուբեն Վարդանյանը հունվարի 16-ին ուղերձ էր հղել, որը փոխանցել էր ընտանիքին հեռախոսազանգի ընթացքում: Նա նշել էր, որ հունվարի 17-ին՝ ժամը 15:00-ին, նշանակված է իր գործով դատական նիստը:

«Ինձ ասվել է, որ ինձ առաջադրված է 42 մեղադրանք, որոնցից մի քանիսով նախատեսվում է ընդհուպ մինչև ցմահ ազատազրկում: Բայց մինչև հիմա ինձ հնարավորություն չի տրվել ծանոթանալու պաշտոնական մեղադրական եզրակացությանը: Ինձ և իմ փաստաբանին ընդամենը թույլ են տվել թերթել 422 հատորանոց քրեական գործը ադրբեջաներենով, որին ես չեմ տիրապետում, և դրա համար հատկացվել է բավականին կարճ ժամանակահատված՝ 2024թ. դեկտեմբերի 9-ից մինչև 2025 թ. հունվարի 8-ը:

Միևնույն ժամանակ ճնշում է գործադրվել իմ, իմ փաստաբանի և թարգմանչի վրա, որպեսզի ստիպեն մեզ ստորագրել փաստաթղթեր հետին թվով, այդ թվում՝ չկայացած հարցաքննությունների կեղծ արձանագրություններ:

Պաշտոնապես հայտարարում եմ հետևյալը. Իմ ձերբակալման առաջին օրվանից ի վեր ես ոչ մի ցուցմունք չեմ տվել, բացառությամբ առաջին հարցաքննության, որի ժամանակ ուղղակի ասել եմ իմ անուն-ազգանունը: Եվս մեկ անգամ ընդգծում եմ. իմ ստորագրությամբ բոլոր արձանագրությունները կեղծ են: Այդ փաստաթղթերն իրականում գոյություն չունեն: Իմ փաստաբանին և թարգմանչին ստիպել են իրենց ստորագրությունները դնել այդ փաստաթղթերի տակ»,- ասված էր Ռուբեն Վարդանյանի ուղերձում: